95

 வெண் மலர்கள்

உன் மாசற்ற தன்மையை 

நினைவுபடுத்துகின்றன

சிவந்த மலர்கள்

ஓயாத உன் நம்பிக்கையை

நினைவுபடுத்துகின்றன

96

எல்லா குழந்தைகளும்

மலர்மொழியின்

அட்சரங்களைப்

பயில்கின்றன 

97

ஒரு மலரைப் பறிக்கும் போது

அம்மலருக்கு வலிக்குமோ

என

ஒரு குழந்தை

ஐயுறுகிறது

98

மலர்களைக் காணும் போது

மலர்களைச் சூடும் போது

அவற்றுடன்

காதல் நினைவுகள்

இணைந்து விடுகின்றன 

99

மலர்கள்

எத்தனை அளிக்கப்பட்டாலும்

இன்னும்

காதலை

முழுமையாகச் சொல்லிட

மலர்களால்

முடியவில்லை

100

ஒரு மலரை

ஒரு புன்னகையாக

ஒரு இன்சொல்லாக

ஒரு பிரியமாக

ஒரு அன்பாக

மேன்மைகள் அனைத்துமாகவும் கூட

புரிந்து கொள்ள முடிகிறது

101

மலர்களின் பிராந்தியங்களில்

வேலிகள் இல்லை

கதவுகள் இல்லை

அங்கே

மிகச் சிலரே

செல்கின்றனர்

102

மலர்கள்

மௌனமே

ஆகச் சிறந்த மதிப்பளித்தல் என்றும்

ஆகப் பெரிய ஆறுதல் என்றும்

அறிந்திருக்கின்றன

துயருற்றவர்களை

அவை

மௌனத்தால் எதிர்கொள்கின்றன 

103

மலர்களின் உலகில்

துயரம் இல்லை

எனினும்

யாரேனும் கலங்கும் போது

மலர்கள்

துயரப்படுகின்றன 

104

மலர்கள்

எங்கும் செல்வதில்லை

அங்கேயே இருக்கின்றன

மலர்களைப் பார்க்க

அவ்வப்போது

கடவுள்கள் வருகின்றனர்