14

 உன்னை

மலர்கள் அறியும்

உன்னை

இறைமை அறியும்

15

 நீ

சூடிக் கொள்ளும்

மலரும்

மலர்களும்

உன்னிடம்

அத்தனை இயல்பாக

பொருந்திக் கொள்வது

எதனால்?

16

 மலரை அர்ப்பணிக்கிறேன்

மலரிடம் 

அர்ப்பணம் ஆகிறேன்

17

 மலரின்

மகரந்தத்திலும்

வீற்றிருக்கிறது

இறைமை

18

 ஒரு மலர்

பலவற்றை

உணர்த்துகிறது

மலர்தலையும்

19

தம்பூராவின் சுருதியில்

நாத ஸ்வர இசையில்

வீணையின் நரம்பொன்றின் அதிர்வில்

இசை பயிலும் மகவொன்றின்

குரலிசையில்

பாயும் போது

மலர்கிறாள்

காவேரி

20

தவத்தில் சுடர்ந்த

ஒரு முனிவன்

குறுமுனிவன்

அவன்

கமண்டல நீராய்

மலர்ந்திருந்தது

யோகம்

அந்த மலர்

பரவியது

நிலத்தில்

கலையென

இசையென

காவிரி

என

21

நீ

உணர்ந்த கடவுளை

உணர்கிறேன்

நறு மணமாய்

நிறையும்

உன் இசை

மூலம்

22

 ஒரு மலர்

வான் நோக்குவது

போல

உன் குரல்

உன் இசை

மேலெழுகிறது

இறைமையை

நோக்கி

23

புல்லும்

ஒரு மலரென

புரியத் தொடங்குவது

எப்போது

24

மருதநிலம்

காத்திருக்கிறது

மழைக்காக

வானம் மகரந்தமென

தூவுகிறது

மழையை

மழை கொண்ட நிலம்

பூக்கிறது

புல்லாக

25

மருத நிலம்
நீரில்
பூக்கிறது
இளம் நாற்றுகளாக

26

புன்னகைக்கிறாய்
உதட்டினை மடித்துக் கொள்கிறாய்
இமை உயர்த்துகிறாய்
உள்ளம்கைகளில்
முகத்தினை வைத்துக் கொள்கிறாய்
ஒரு முகம்
எத்தனை 
மலராக மலர முடியும்

27

மலர்க்கண்களால்

மலர்ப்பார்வையால்

நோக்குகிறாய்

உன் உலகம்

உன் உலகம்

நீர்மை

கொள்கிறது

உன் கண்கள்

நீர்த்திரை கொள்கின்றன

ஒரு கணம்

விழி மூடி

விழி திறக்கிறாய்

உலகில் மலர்கின்றன

ஆயிர மாயிரம்

மலர்கள்

28

ஒரு

மலரில்

அமிழ்ந்திருக்கிறது

ஒரு பெரும் காடு

29

சில்வண்டுகளின் ஒலி காட்டின் மௌனம்

மௌனத்தின் மீதேறி

ஊர்கின்றன

மலர்களின் மகரந்தங்கள் 

30

பறவைகள்

பறக்கும் மலர்கள் 

31

மீன்கள் சலனமுறச் செய்யும்

நீர்மலர்த் தடாகத்தை

உன் மென் விரல்களால்

தீண்டுகிறாய்

சிலிர்ப்பு 

32

உன் முகம்

ஒரு மலர்

உன் கண்கள்

இரு மலர்கள் 

33

வான் பார்க்கிறாய்

நிலம் பார்க்கிறாய்

காற்று தீண்டுகையில்

மேலும்

உயிர் கொள்கிறாய்

மலராக 

34

மல்லிகை

இயல்பு கொள்ள

விரும்புவதாக

நீ

ஒருநாள்

சொன்னாய் 

35

ஒரு விதையின்

கனவில்

முடிவில்லாமல்

மலர்கள்

பூத்துக் கொண்டே

இருக்கின்றன 

36

உனது பிரதேசத்தில்

பேதம் இல்லை

துயரம் இல்லை

வலிகள் இல்லை

ஒரு மென் துடிப்பு மட்டுமே இருக்கிறது

உயிரின் துடிப்பு

உயிர் பூக்கும்

மண்ணின் துடிப்பு

37

நிலவு அறியும்

மலரை

மலர்கள் அறியும்

நிலவை 

38

தடாகம் வானம்

பூத்திருக்கும்

சின்னஞ்சிறு மலர்கள்

விண் மீன்கள்

வெண் பெரும் மலர்

நிலவு 

39

நிலவை

மலர் என்றும்

மலரை

நிலவு என்றும்

புரிந்து கொள்கிறது

அக்குழந்தை 

40

ஒரு மலர்

உடன் வருவதைப் போல

உடன் இருப்பதைப் போல

ஏன்

எல்லாரும் இருப்பதில்லை

என்ற வினா

அக்குழந்தைக்கு 

41

ஒரு சிறு பூந்தோட்டம்

மகிழ்ச்சியைக் கொண்டு வருகிறது

நம்பிக்கை அளிக்கிறது

துணை நிற்கிறது

தோட்டத்திற்கு 

தினமும்

நீர் வார்க்கும்

தோட்டக்காரன்

மகிழ்ச்சியை

நம்பிக்கையை

மலரச் செய்கிறான்

தோட்டத்துக்கு வெளியிலும் 

42

மலரின் ஒளி

எதனால்

ஆனது?

43

மலர்களுக்கும்

மலர்களின் மகரந்தங்களுக்குமான

உறவு

உனக்கும்

உனது அகத்துக்கும்