ஆயிரம் பசுக்கள்

தமிழக மக்கள் மிகவும் மகிழ்ச்சியுடன் கொண்டாடும் பண்டிகைகளில் ஒன்று தீபாவளி. அதற்கு ஒரு காரணம் உண்டு. பொதுவாக தமிழகத்தில் பண்டிகைகள் பகல் பொழுதில் இன்னும் சரியாகச் சொன்னால் நண்பகல் பொழுதில் கொண்டாடப்படுகின்றன. பொங்கல், வருடப் பிறப்பு, ஆயுத பூஜை ஆகியவற்றை உதாரணமாகக் கூற முடியும். காலை 10 மணிக்கு மேல் பொங்கல் வைக்கத் தொடங்கி படையலிட மதியம் 2 மணி ஆகி விடும். ஆயுத பூஜைக்கும் பூசனை மதியம் அல்லது மாலைப் பொழுதில் தான். வருடப் பிறப்பும் அவ்விதமே. எனினும் தீபாவளி மட்டுமே காலை மதியம் மாலை இரவு என நாள் முழுதும் கொண்டாடப்படும் பண்டிகை. காலை எழுந்ததுமே எண்ணெய் தேய்த்துக் கொள்ளுதல், கங்கா ஸ்னானம் ஆகியவை நிகழ்ந்து அனைவரும் புத்தாடை அணிந்து கொள்வர். தீபாவளியன்று இனிப்புகள் நிறைந்த காலை உணவு உண்பர். பின்னர் மதியமும் விருந்துணவு. மாலை பட்டாசுகள் வெடித்தல் என நாள் முழுதுமே அனைவருமே மகிழ்ச்சியாக இருக்கும் நாள் தீபாவளி.  

இன்று ஊருக்கு அருகில் இருக்கும் 1000 பசுக்கள் வாழும் ஆசாலைக்குச் சென்றிருந்தேன். ஒரு நல்ல நாளில் அந்த பசுக்களுடன் பொழுதை செலவிட்டது மிகவும் மகிழ்ச்சி தந்தது. பசுக்களுடன் பழகும் போது ஒரே சமயம் நாம் அன்னையாகவும் குழந்தையாகவும் இருப்போம். பசுவைப் போல சாதுவான பிரியமான இன்னொரு உயிர் இருக்குமா என்பது தெரியவில்லை. 

ஒளியை விரும்பு

நேசி

தோழமை கொள்

புரிந்து கொள்

உடன் இரு

பரவச் செய்

உரையாடு

வணங்கு

ஒளி பெறட்டும்

உடல்

மனம்

மொழி

ஒளி பெறட்டும்

உலகம்

ஒளி பெறட்டும்

உயிர்கள்

நிறையட்டும் ஒளி

எங்கும் 

இருளும் ஒளியும்

இருளிலிருந்து ஒளிக்கு இட்டுச் செல்க

மரணத்திலிருந்து அழியாமைக்கு இட்டுச் செல்க

என்கிறது உபநிஷத் பிரார்த்தனை. 

நித்யம் உலகின் ஒரு பாதி இருளிலும் உலகின் ஒரு பாதி ஒளியிலும் உள்ளது இயற்கையின் தன்மை. எனில் உபநிஷத் ஏன் இருளிலிருந்து ஒளிக்கு இட்டுச் செல்க என்கிறது? உலகில் உயிர்கள் இறப்பதும் பிறப்பதும் ஒவ்வொரு கணமும் நிகழ்வது. அவ்விதம் இருக்க உபநிஷத் ஏன் மரணத்திலிருந்து அழியாமைக்கு இட்டுச் செல்க என்கிறது?   

இருள் என்பது துவக்க நிலை. இருளில் அனைத்தும் பகுதியளவிலேயே காணப்படுகின்றன. ஒளி என்பது மேல்நிலை. ஒளியில் அனைத்தும் முழுதாகக் காணப்படுகின்றன. மேல்நிலையில் உணர துவக்க நிலையில் உணர்ந்தது அடிப்படையாக இருக்கும். துவக்க நிலையை முற்றுணராமல் மேல்நிலையை முற்றுணர முடியாது. இருளை முழுதாக அறியாமல் ஒளியை முழுதாக அறிய முடியாது. இருளும் ஒளியும் ஒரே விதமாக இருக்க உலகின் காட்சிகள் கணமும் மாறிக் கொண்டிருக்கின்றன. வளர்ச்சியும் சிதைவும் நிகழ்த்தும் தொடர் நாடகமே உலகம். 

மரணத்தை அறிந்த உணர்ந்த ஒருவரால் மட்டுமே அழியாமையை உணர முடியும். அழியாமையை உணர்தலின் ஒரு பகுதியே மரணத்தை உணர்தல் ; மரணத்தை அறிதல். 

உபநிஷத் இமைப் பொழுதும் ஓயாத ஒரு பயணத்தை பிரார்த்தனை செய்கிறது. உயிர்கள் ஒளியை முற்றுணரும் பயணம் ; உயிர்கள் அழியாமையை முற்றுணரும் பயணம். 

இருளிலிருந்து ஒளிக்கு இட்டுச் செல்க

மரணத்திலிருந்து அழியாமைக்கு இட்டுச் செல்க

இரு அன்னையர்

உற்சாகமும் உத்வேகமும் எனக்குத் தேவைப்பட்டது. காலைப் பொழுதில் நான் படித்த பள்ளியை நோக்கி இன்று நடந்தேன். ஒரு பள்ளி மாணவனாக பள்ளிக்கு நடந்து செல்லும் பருவம் என்பது இனிமையானது ; உன்னதமானது ; மகத்தானதும் கூட. என்னை சொந்தப் பிள்ளையாக - சொந்த பிள்ளையை விடவும் ஒரு படி மேலாகக் கருதிய - ஆசிரியர்கள் என் பள்ளியில் எனக்கு இருந்தார்கள். நடு வயதில் இருக்கும் நான் இப்போது எண்ணிப் பார்க்கிறேன். 10 வயது சிறுவனிடம் - 10 வயது சிறுவர்களிடம் ஆசிரியர்கள் அகத்துக்குத் தென்பட்ட ஒளி என்ன ? நம்பிக்கை என்ன? மானுடத்தில் பால பருவத்தின் ஒளியை தினமும் கண்ணுறும் ஆசிரியர்கள் பேறு பெற்றவர்கள். அத்தகைய ஆசிரியர்களிடம் பயிலும் பாலர்கள் மேலும் பேறு பெற்றவர்கள். என் பள்ளியில் என் மீது மிகவும் பிரியம் காட்டிய இரு ஆசிரியைகள் இருந்தனர். அவர்கள் பெயர் என்ன? எல்லா மகத்தான பெயர்களும் அவர்களின் பெயர்களே. பள்ளி முன் சென்று அந்த இரு ஆசிரியைகளையும் - அந்த இரு அன்னையரையும் - எண்ணிக் கொண்டேன். உளம் பொங்கி அழுதேன். அவர்கள் இருவரையும் நினைத்துச் சிந்தும் கண்ணீர் புனிதமானது. அவர்களை எண்ணி கண்ணீர் சிந்துபவன் என்பதே எனது தகுதி. 

லஞ்சத்தை நீக்க முயலும் அரசாங்கம்

ஓர் இந்தியக் குடிமகனாக அரசு நிர்வாகத்தில் லஞ்சம் ஒழிக்கப்பட வேண்டும் என நான் எப்போதும் எண்ணுவேன். சாமானிய குடிமக்கள் தங்கள் அவசியத் தேவைகளுக்காக அரசை அணுகும் ரேஷன் அட்டை தொடர்பான குடிமைப் பொருள் வழங்கும் துறை, தங்கள் நிலவிற்பனையைப் பதிவு செய்யும் பத்திரப் பதிவுத் துறை, பட்டாவுக்கு விண்ணப்பிக்கும் வருவாய்த்துறை, வீடு கட்ட அனுமதி அளிக்கும் உள்ளாட்சித் துறை, தங்கள் மோட்டார் வாகனங்களைப் பதிவு செய்யும் சாலைப் போக்குவரத்து துறை ஆகியவற்றில் லஞ்சம் முழுமையாக நீக்கப்பட வேண்டும் என எண்ணுவேன். சாமானிய பொதுமக்கள் இந்த அரசு அலுவலகங்களுக்கு மட்டுமே செல்ல வேண்டிய அவசியம் அடிக்கடி இருக்கிறது. இங்கே லஞ்சம் கேட்கப்பட்டால் தினமும் அந்த அலுவலகங்களுக்குச் செல்லும் லட்சக்கணக்கான மக்கள் அரசமைப்பின் மீதும் ஜனநாயகத்தின் மீதுமே அவநம்பிக்கை கொள்ளும் சூழல் உருவாகிறது என்பதால் குறைந்தபட்சம் இந்தத் துறைகளிலாவது லஞ்சம் நீக்கப்பட வேண்டும் என நான் எண்ணுவேன். 

தமிழகத்தை ஆண்ட திராவிடக் கட்சிகள் கடந்த 60 ஆண்டுகளில் மேலே குறிப்பிட்ட துறைகள் அனைத்திலும் லஞ்சத்தைக் கட்டவிழ்த்து விட்டன. பொதுப்பணித்துறை, நெடுஞ்சாலைத் துறை, மின்சாரத் துறை ஆகியவற்றில் கொள்ளை ஊழல்களை அரங்கேற்றிய திராவிடக் கட்சிகளின் அரசுகள் மேலே குறிப்பிட்ட துறைகள் மூலமும் லஞ்சம் பெற்றன ; தங்கள் ஊழல் வெளியில் தெரியாமல் இருக்க அரசு ஊழியர்கள் லஞ்சம் பெற முழுமையாக அனுமதித்தனர். 

தற்போது தமிழகத்தை ஆளும் அரசாங்கத்தில் ,  சாமானிய குடிமக்கள் தங்கள் அவசியத் தேவைகளுக்காக அரசை அணுகும் ரேஷன் அட்டை தொடர்பான குடிமைப் பொருள் வழங்கும் துறை, தங்கள் நிலவிற்பனையைப் பதிவு செய்யும் பத்திரப் பதிவுத் துறை, பட்டாவுக்கு விண்ணப்பிக்கும் வருவாய்த்துறை, வீடு கட்ட அனுமதி அளிக்கும் உள்ளாட்சித் துறை, தங்கள் மோட்டார் வாகனங்களைப் பதிவு செய்யும் சாலைப் போக்குவரத்து துறை ஆகியவற்றின் ஊழியர்கள் லஞ்சம் பெற லஞ்சம் கேட்க தயங்குகிறார்கள் ; அவர்களிடம் அச்சம் நிலவுகிறது. லஞ்சம் கேட்டால் பொதுமக்கள் எவரேனும் புகார் அளித்து விட்டால் அரசாங்க மேலிடம் தங்களைப் பாதுகாக்குமா என்னும் ஐயம் இப்போது அரசு ஊழியர்களுக்கு ஏற்பட்டிருக்கிறது. எனவே இப்போது பொதுமக்களைக் கசக்கிப் பிழிந்து லஞ்சம் வாங்கும் போக்கு மட்டுப்பட்டிருக்கிறது. 

மாநில அரசாங்கம் சாமானிய பொதுமக்கள் லஞ்சத்தால் பாதிக்கப்படக் கூடாது என எண்ணுவதை உணர்ந்து தங்கள் அறியாமையை நீக்கிக் கொண்டு விழிப்புணர்வுடன் அரசு ஊழியர்கள் லஞ்சம் கேட்டாலும் லஞ்சம் கொடுப்பதில்லை என்ற உறுதியுடன் இருப்பார்களேயானால் தமிழகத்தில் லஞ்சம் இல்லாமல் ஆகும். 

ஓரிரு நாட்கள் முன்னால் கட்டிட அனுமதி பெறுவதில் நிறைய புது வழிமுறைகளை மாநில அரசாங்கம் அறிவித்திருக்கிறது என்பதை அறிந்தேன். மிகவும் வரவேற்புக்குரிய விஷயமாகும் அது.  

ரயில்வே பதில் - சி பி கி ராம் ஸ்

இன்று சி பி கி ராம் ஸ் இணையதளம் மூலம் தெற்கு ரயில்வே சமீபத்தில் நான் அளித்திருந்த புகாருக்கு பதில் அளித்திருந்தது. ரயில்வே சந்திப்பின் நடைமேடை 4ல் காலை 6.15க்கு நிற்கும் ரயில் சேலம் புறப்பட்டுச் சென்ற பின் அதே நடைமேடையில் வடக்குப் புறமாக நிற்கும் திருச்சிராப்பள்ளி ரயிலை நடைப்பாலத்துக்கு அருகில் கொண்டு வந்து நிறுத்துவது பயணிகளுக்கு உதவிகரமாக இருக்கும் எனக் கூறியிருந்தேன். ரயிலின் புறப்படும் நேரத்துக்கு 30 நிமிடம் முன்பே ரயில் இயக்கும் குழு ரயிலில் பொறுப்பெடுக்கும் என்றும் அப்போது பயணிகள் பலர் ரயில் ஏறுவதும் இறங்குவதுமாய் இருக்கும் நிலையில் இரயிலை இயக்குவது பயணிகள் நலனுக்கு உகந்தது அல்ல எனக் கூறியிருக்கிறார்கள். 

அவர்கள் பதில் எவராலும் ஏற்கக் கூடிய ஒன்றே. 

ஆ(கா)ட்சி மாற்றம்

எனது நண்பரின் நெருங்கிய உறவினர் ஒருவர் சில வாரங்களுக்கு முன்னால் இயற்கை எய்தினார். இறப்புச் சான்றிதழ் பெற வேண்டியிருந்தது. நண்பர் என்னை உதவிக்கு அழைத்துச் சென்றார். அவரிடம் நான் கூறினேன். ‘’நான் வரணும்னா அவுட் ஆஃப் வே ல பிரைப் தர்ரத ஒத்துக்க மாட்டேன்’’ என்றேன். ’’இறப்புச் சான்றிதழ் கொடுக்க பணம் கேப்பாங்கலே’’ என்றார். ‘’கேட்டா கொடுக்க முடியாதுன்னு சொல்லணும்னு முடிவு பண்ணிக்கங்க ; மேலதிகாரிகிட்ட சொல்லுவோம்னு  அவங்க கிட்ட சொல்ல உங்களை தயார் பண்ணிக்கங்க’’ என்றேன். அரை மனத்துடன் நண்பர் சம்மதித்தார். ஒருவர் இறந்து 21 நாட்களுக்குள் அவரது இறப்பைப் பதிவு செய்ய மனு கொடுக்க வேண்டும். நண்பரின் உறவினர் இறந்து ஒரு வாரத்தில் அரசு அலுவலகத்தில் மனு கொடுத்து விட்டு வந்தோம். மனுவை நான் தான் நிரப்பினேன். எல்லா விபரங்களும் தெளிவாக எழுதியிருந்தேன். மனுவைக் கொடுக்கும் போது நண்பர் என்னிடம் ‘’ஃபார்மாலிட்டி எதுவும் உண்டா என்று கேட்போம்’’ என்றார். ‘’நான் உங்க கிட்ட என்ன சொன்னன் ; நான் கூட வரணும்னா எந்த பிரைபும் கொடுக்க ஒத்துக்க மாட்டன்னு சொன்னேன்ல’’ என்றேன். மனுவை எந்த ஃபார்மாலிட்டியும் இல்லாமல் கொடுத்து விட்டு வந்து விட்டோம். நண்பர் அவருக்கு வேண்டியவர்களிடம் விசாரித்திருக்கிறார். ரூ.4000 லிருந்து ரூ.5000 வரை கையூட்டாகக் கேட்பார்கள் என்று என்னிடம் சொன்னார். ‘’இப்ப சூழ்நிலை மாறி இருக்கு. கொஞ்சம் வெயிட் பண்ணுங்க’’ என்றேன். நண்பருக்கு நண்பர் ஒருவர். அவருக்கு வேண்டியவர் அவரிடம் ஃபோன் செய்து ஆஃபிஸில் உங்கள் நண்பர் பேப்பர் கொடுத்திருக்கிறாரா என்று விசாரித்திருக்கிறார்கள். நண்பர் என்னிடம் தகவல் சொன்னார். ‘’எதுக்கும் பதில் சொல்லாதீங்க. ரியாக்ட் பண்ணாம இருங்க’’ என்றேன். மனு கொடுத்து 30 நாள் ஆகியது. நண்பரை அழைத்துக் கொண்டு அரசு அலுவலகம் சென்றேன். ‘’ஒரு மாசம் முன்னாடி ஒரு டெத் சர்டிஃபிகேட்டுக்கு அப்ளை செஞ்சிருந்தோம். ரெடி ஆயிடுச்சா? வாங்கிட்டு போகலாம்னு வந்தோம்’’ என்றேன். இறந்தவரின் பெயரைக் கேட்டார்கள். சொன்னோம். கம்ப்யூட்டரில் சில நிமிடங்கள் தேடினார்கள். ‘’நாம கொஞ்சம் வெளியில வெயிட் பண்ணுவோம்’’ எனக் கூறி நண்பரை அழைத்துக் கொண்டு வெளியில் வந்து விட்டேன். ஐந்து நிமிடம் கழித்து உள்ளே சென்றோம். சான்றிதழ் பிரிண்ட் அவுட் இருந்தது. நண்பரிடம் ‘’இதுல இருக்கற கியூ ஆர் கோட் தான் சர்டிஃபிகேட். அத உங்க ஸ்மார்ட் ஃபோன்ல சேவ் செஞ்சு வச்சுக்கங்க. இதுல இருக்கற ரிஜிஸ்ட்ரேஷன் நம்பரை நோட் பண்ணிக்கங்க. செண்ட்ரல் கவர்மெண்ட் வெப் சைட் ஒன்னு பிறப்பு இறப்பு பதிவுக்கு இருக்கு. அதுல இந்த நம்பரை கொடுத்தா எப்பவும் டவுண்லோட் செஞ்சுக்கலாம்’’ என்றேன். ’’ஒரு ரூபாய் கொடுக்காமல் சர்டிஃபிகேட் கிடைச்சது  ஆச்ச்ர்யமா இருக்கு’’ என்றார் நண்பர். ’’ஆட்சி மாறுனதால காட்சியும் மாறி இருக்கு.’’ என்றேன். கூடவே ‘’மக்கள் மனோபாவமும் மாற வேண்டும் ‘’ என்று சேர்த்து சொன்னேன். 

குளம் காக்க - தேசிய பசுமைத் தீர்ப்பாயம்

 

அனுப்புநர்

*****
****
***

பெறுநர்

தேசிய பசுமைத் தீர்ப்பாயம்

சென்னை

ஐயா,

பொருள் : மயிலாடுதுறை மாவட்டம் – மாவட்ட ஆட்சியர் அலுவலகம் எதிரில் உள்ள குளம் தூர்க்கப்பட்டு சாலையாக மாற்றப்படுவதை தடுத்து நிறுத்தவும் – குளத்தை தூர்க்கும் நெடுஞ்சாலைத்துறை மீது நடவடிக்கை எடுக்கவும் – மனு

பார்வை : மயிலாடுதுறை மாவட்டம் – மாவட்ட ஆட்சியர் அலுவலகம் எதிரில் உள்ள தூர்க்கப்படும் குளத்தின் ஒளிப்படம்

1.மயிலாடுதுறை தரங்கம்பாடி சாலையில் மாவட்ட ஆட்சியர் அலுவலகத்துக்கு மிக அருகே தோராயமாக 200 அடி அகலமும் 200 அடி நீளமும் 10 அடி ஆழமும் கொண்ட குளம் அமைந்துள்ளது.

2.அந்தக் குளம் தோராயமாக ஒரு கோடி லிட்டர் நீரைச் சேமிக்கும் தன்மை கொண்டது.

3.அந்தக் குளத்தை முழுமையாகத் தூர்த்து சாலை அமைக்க நெடுஞ்சாலைத் துறை குளத்தை மண் கொட்டி மூடுதல், இரும்புக் கம்பிகளைக் கட்டமைத்தல், கான்கிரீட் பீம்களை உருவாக்குதல் ஆகிய குளத்தினை தூர்க்கும் பணிகளைச் செய்து வருகிறது.

4.நீர் சேமிக்கும் குளம் ஒன்றைத் தூர்க்க அரசுத் துறைகளுக்கு அதிகாரம் கிடையாது. மேற்படி குளம் சாலைப் பணிகளுக்காகத் தூர்க்கப்படுவதில் பசுமை விதிகள் முழுமையாகப் பின்பற்றப்பட்டுள்ளதா என்பதும் குளம் தூர்க்கப்படுவது சட்டத்துக்குப் புறம்பாக நடக்கிறதா என்பதும் தேசிய பசுமைத் தீர்ப்பாயத்தால் விசாரிக்கப்பட வேண்டிய விஷயமாகும்.

5.குளத்தினைத் தூர்க்க பணிகளைச் செய்து வரும் நெடுஞ்சாலைத்துறை அதிகாரிகள் ஒப்பந்ததாரர் ஆகியோர் மீது நடவடிக்கை மேற்கொள்ளப்பட வேண்டும் என்றும் நெடுஞ்சாலைத்துறை அதிகாரிகள் ஒப்பந்ததாரர் ஆகியோர் மீது பசுமை விதிகளின் படி அபராதம் விதிக்கப்பட வேண்டும் என்றும் இந்த மனு மூலம் கோரப்படுகிறது.

6.மயிலாடுதுறை தரங்கம்பாடி சாலையில் மாவட்ட ஆட்சியர் அலுவலகத்துக்கு மிக அருகில் இருக்கும் தூர்க்கப்படும் குளத்தைப் பாதுகாக்க தேசிய பசுமைத் தீர்ப்பாயம் நடவடிக்கை எடுக்க வேண்டும் என்று கேட்டுக் கொள்ளப்படுகிறது.

7.தூர்க்கப்படும் குளத்தின் புகைப்படம் தேசிய பசுமைத் தீர்ப்பாயத்தின் பார்வைக்கு இத்துடன் இணைக்கப்பட்டுள்ளது.

தங்கள் உண்மையுள்ள,

***

இன்னொரு புன்னகை

அருளில்லார்க்கு அவ்வுலகம் இல்லை பொருளில்லார்க்கு

 இவ்வுலகம் இல்லாகி யாங்கு 

இருவேறு உலகத்து இயல்பு திருக்குறளைப் போலவே ஹாஸ்யமான இன்னொரு குறள் இது. 

பொருளிலார்க்கு இவ்வுலகம் இல்லை - இது மானுடர் அனைவராலும் ஏற்கப்படுவது. பொருள் இருப்பவர்களும் பொருள் இல்லாதவர்களும் பொருள் தேடுபவர்களும் அனைவரும் ஏற்கும் விஷயம் இது. 

பொருளை ஸ்தூலமாகக் காண முடியும். 

அருள் அவ்விதமாக ஸ்தூலமாகக் காண முடியாது. கண்ணுக்குத் தெரியாதது. கண்ணுக்குத் தெரியாதது என்பதாலேயே மானுடரால் எளிதில் உய்த்தறிய இயலாதது. 

பொருள் என்பதை மானிடர்கள் புரிந்து கொள்வார்கள். அது கண்ணுக்குத் தெரிகிறது என்பதால். அருளைப் புரிந்து கொள்வது பொருளைப் புரிந்து கொள்வது போல் எளிதல்ல. 

ஒரு கோடி மனிதர்கள் இருக்கிறார்கள் என்றால் அதில் ஒரு கோடி பேருக்கும் பொருள் என்றால் என்ன என்று தெரியும். 100 க்கு 100 தெரிந்த விஷயத்தைக் கூட 100க்கு 100 பேரும் அடைந்திடுவது இல்லை. பொருள் 100ல் 1 வருக்கோ 2 வருக்கோ வசப்படுகிறது. 

ஒரு கோடி மனிதர்கள் இருக்கிறார்கள் என்றால் அதில் ஒரு கோடி பேருக்கும் அருள் என்றால் என்ன என்று தெரியாது. ஒரு கோடி பேரில் ஒருவரோ இருவரோ அருள் பெற்றி பெறுகிறார்கள். 

பொருளிலார்க்கு இவ்வுலகம் இல்லை. அருளிலார்க்கு அவ்வுலகம் இல்லை. 

அவ்வுலகத்திற்கு ஒருவன் செல்லும் போது இவ்வுலகத்தில் அவன் பொருள் பெற்றிருந்தானா அல்லது பொருள் பெற்றிலாமல் இருந்தானா என்பதற்கு எந்த மதிப்பும் கிடையாது. அங்கே மதிப்பிடப்படுவது அருள். 

மயிலாடுதுறை ஜங்ஷன் - ஒரு சி பி கி ராம் ஸ் புகார்

மயிலாடுதுறை சந்திப்பு ரயில் நிலையத்தில் காலைப் பொழுதுகளில் மயிலாடுதுறை - சேலம் ரயிலும் மயிலாடுதுறை - திருச்சிராப்பள்ளி ரயிலும் நான்காவது நடைமேடையிலிருந்து புறப்படுகின்றன. சேலம் ரயில் காலை 0600 மணிக்கு புறப்படுகிறது. திருச்சிராப்பள்ளி ரயில் காலை 0750க்கு புறப்படுகிறது. இரண்டும் மேற்கு நோக்கி செல்லும் ரயில்கள் என்பதால் சேலம் ரயில் நான்காம் நடைமேடையின் தெற்குப் பக்கமாகவும் திருச்சிராப்பள்ளி ரயில் நடைமேடையின் வடக்குப் பக்கமாகவும் நிற்கின்றன. காலை 0600 மணிக்கு சேலம் ரயில் புறப்பட்டுச் சென்ற பின்னும் திருச்சிராப்பள்ளி ரயில் நடைமேடையின் வடக்குப் பகுதியிலேயே உள்ளது. நடைமேடையின் வடக்குப் பகுதி பயணிகள் நடைப்பாலத்திலிருந்து மிகவும் தொலைவில் இருக்கிறது. ஆதலால் ரயில் பயணிகள் குறிப்பாக 60 வயதுக்கு மேற்பட்டோர் நீண்ட தூரம் நடந்து சென்று ரயிலேற வேண்டியிருக்கிறது. காலை 0600 மணிக்கு சேலம் ரயில் புறப்பட்டுச் சென்றதும் திருச்சிராப்பள்ளி ரயிலை பயணிகள் நடைப்பாலத்துக்கு அருகில் கொண்டு வந்து நிறுத்துமாறு கேட்டுக் கொள்கிறேன்.