தாழ்வாரங்களில் கேட்கிறது மழையின் கீதம்
தளிரின் இளம் பச்சை அளிக்கும் நம்பிக்கை
விபத்தால் வெளியேறிய ஆட்டின் குடலென மண்ணின் குழைவு
தலையால் வாங்கி கால்வரை கசிய விடும் பழு மரம்
வேடிக்கை வெறுமனே பார்க்கும் விலங்குகள்
அவ்வப்போது இருளும் பகலில்
பதறி மீளும் பறவைகள்
அன்னை முகம் நோக்கி மகவுகள்
படுக்கை ரணமாகி மரண விஸ்வரூபம் காண
காத்திருக்கும் முதியோர்
இனிமையும்
காதலும்
காமமும்
அலைக்கழிக்கும்
ஆண்களும் பெண்களும்
தூவானம் விடவில்லை
(நவீன விருட்சம் இதழில் பிரசுரமானது)
