பொழுதுகள் ஐந்து

ஒரு மலைக்கிராமத்தில்
அசையும் திரைச்சீலைகளென
பனிப்பொழியும் காலையில்
முழுக்கைகளுக்கும் கம்பளி அணிந்து
லேசாக பெருமூச்செடுத்து
காலைநடையில்
உடன் வருகிறாய்

ஒரு மென்பகல் பொழுதில்
நெடுஞ்சாலையில்
எதிர்பாராமல் பழுதான வாகனத்தில்
பயணித்தவர்களுக்கு
உதவச் சொல்லி
அவர்கள் வீட்டின் பெண்களுடன்
விழுதுகள்
சற்று முயன்றால்
மண்ணைத் தொட இயலும்
மரத்தின் கீழே உரையாடி நிற்கிறாய்

உச்சி வேளை ஒன்றில்
ஒரு தொல் நதியின்
புராதான படித்துறை
ஒன்றில்
நிழலில் அமர்ந்து
ஓடும் நதியை
உற்சாகமாகப்
பார்த்துக் கொண்டிருக்கிறாய்

முன்மாலையில்
அலை எழும்
விரிந்த சமுத்திரத்தின்
முன்
அமைதியாய்
நிற்கிறாய்

இரவில்
அந்த சிற்றாலயத்தில்
தீபங்கள் ஒளிரும்
கருவறை முன்
எரியும் தீயென
வணங்கி நிற்கிறாய்