என்னிடம் மோட்டார்சைக்கிள் இருக்கிறது

என்னிடம் மோட்டார்சைக்கிள் இருக்கிறது
100சி.சி
சாதாரணமானது
அற்புதங்களை நிகழ்த்தக் கூடியது

வீட்டின்
சிறிய பரப்பிலிருந்து
ஆல் வீற்றிருக்கும் நெற்களங்களுக்கு
தொன்மையான பேராலயங்களுக்கு
நதியின் கரைகளுக்கு
புஷ்கரணிகளுக்கு
உடன் கூட்டிச் சென்று விடும்

அதனுடன் சேர்ந்து
அஸ்தமிக்கும் சிவப்பு சூரியனைப் பார்த்திருக்கிறேன்
ஒளிரும் வெண் திங்கள் கண்டிருக்கிறேன்
இரவில் பணியாளர் மட்டும் இருக்கும் லெவல் கிராசிங்கில்
எங்களைத் தாண்டிச் சென்றிருக்கிறது ரயில்

என்னிடம் மோட்டார்சைக்கிள் இருக்கிறது
சாதாரணங்களிலிருந்து
அசாதாரணங்களுக்கு
இட்டுச் செல்லும்
மோட்டார் சைக்கிள்