நிழல்

 ஒரு மரத்தின் நிழலில் அமர்கிறேன்

அரசமரம்

சிறு மகவின் உள்ளங்கையென

இலைகள்

கொட்டிக் கிடக்கின்றன

மண்ணில்

மண்ணுடன் பிணைந்துள்ளன வேர்கள்

தடிமனான அடித் தண்டு

நீண்டிருக்கும் கிளைகள்

அந்த மரம் பிரார்த்தித்துக் கொண்டிருக்கிறது

அந்த மரம் அரற்றிக் கொண்டிருக்கிறது

அந்த மரம் நன்றி பாராட்டிக் கொண்டிருக்கிறது

வானின்

ஒளியின்

நம்பிக்கைகளின் 

கருணையை 

தன் நிழல் பரப்பாக

தன் இருப்பாக

கொள்கிறது

அந்த மரத்தின் நிழலில் அமர்கிறது மானுடம்

காலகாலமாக

அந்த மரத்தின் நிழலில் அமர்ந்திருக்கிறேன்

இப் பொழுது