பயணத்தில்
கைவிடப்பட்ட கடவுள்கள் இருக்கிறார்கள்
கைவிடப்பட்ட நகரங்கள் இருக்கின்றன
கைவிடப்பட்ட மண்டபங்கள் இருக்கின்றன
கைவிடப்பட்ட சிற்பங்கள் இருக்கின்றன
கைவிடப்பட்ட கிராமங்கள் இருக்கின்றன
கைவிடப்பட்ட பெண்கள் கண்ணீர் சிந்திக் கொண்டிருக்கிறார்கள்
கைவிடப்படுதலின் பிரும்மாண்டத்தின் முன்
கடந்து செல்பவன் மௌனித்திருக்கிறான்
ஒரு பெரிய கான்கிரீட் பாலக் கட்டுமானம் நடைபெறுகிறது
அதன் அருகே ஓடக்காரன் படகை இயக்கிக் கொண்டிருக்கிறான்
பாலம் வேலை முடிந்த பின் நீ ஓடத்தைக் கைவிடுவாயா
பயணி கேட்கிறான்
நான் நதியைக் கடந்து கொண்டே இருந்தேன்
ஓடம் இன்றி மக்கள் நதியைக் கடப்பது பார்த்து மகிழ்வேன்
ஓடக்காரன் பதில் சொன்னான்
