கண்மணி வளர்ந்து கொண்டிருக்கிறான்
தன் குதூகங்களுடன்
தன் மகிழ்ச்சிகளுடன்
தன் ஆர்வங்களுடன்
அவனது பொம்மைகள் பரிணாம வளர்ச்சி அடைந்துள்ளன
அவனது உலகில் தொழில்நுட்பம் பெரும் பாய்ச்சலை நிகழ்த்தியுள்ளது
இப்போதும்
ஆடு மாடுகளை நேசிக்கிறான்; அவற்றுடன் பேசிக் கொண்டிருக்கிறான்
தெருவின் நாய் அவனைக் கண்டதும் உடல் குழைத்து சுற்றுகின்றது
ஓயாமல் ஓடி வியர்த்து மூச்சிறைக்கிறான்
எழுத்துக் கூட்டி ஓரிரு சொற்களை வாசித்து விட்டு
அச்சிட்ட காகிதங்களை இப்போதும் கிழிக்கிறான்
புறஒழுங்கு வற்புறுத்தப்படும் உலகில் தன்னைப் பொருத்திக் கொண்டும்
கண்மணி வளர்ந்து கொண்டிருக்கிறான்
