காலையில்
பால் கறக்கச் செல்லும் பால்காரர்
வாகனம் அவசரத்துடன் விரைகிறது
இன்றும் தாமதம்
இன்னும் நாலு வீடு பாக்கி
பாக்கெட் பால் போடுபவர்
காற்று ஒலிப்பான்
ஆர்வமின்றி
சப்திக்கிறது
மதிலின் மேல் பாக்கெட்
வைத்துவிட்டு
வேலைக்குச் செல்லும் பெண்ணின்
சமையலறை
வாணலியில்
கரண்டி புழங்கும் சத்தமும்
குக்கர் விசிலும்
பொருந்தாமல் ஒலிக்கிறது
ஒரே நேரத்தில்
இன்னும்
முழுதாகத் தூக்கம் கலையா பிள்ளைகள்
தெருமுக்கில்
காத்திருக்கின்றன
பள்ளிப் பேருந்துக்கு
அவசரம்
சிகர உச்சம் கொள்ளும்
காலையில்
வாகனங்கள் விரைகின்றன
அங்கும் இங்கும்
பெரும்பாலானோர்
கவனத்தில் இல்லாமல்
இன்று வெள்ளி முளைத்து
நூறு ஆயிரம் நட்சத்திரம் உதிர்ந்து
சிவந்த வானில்
மெல்ல
மிக மெல்ல
உதித்தது
உதயசூரியன்
