பால்யத்தில்
கை நழுவிப் போன
ரப்பர் பந்து
தற்செயலாய்
வந்து சேர்ந்தது
இன்று
வானுக்கும்
பூமிக்கும்
இடையே
பறந்து கொண்டிருக்கையில்

மல்லிகை மணம் இருக்கும்

பிராந்தியத்தில்

பிரவேசித்தேன்

என் வாகனத்துடன்

முன்னால்  சென்ற

இளம்பெண்ணின் சிரசில்

பூத்திருந்தன

மல்லிகைப் பூக்கள்

வானில்

எம்பிக் குதித்த

ஒரு மலர்

இருந்தது

மிதந்து கொண்டும்

சென்று கொண்டும்

அன்னமாகவும்

வராகமாகவும்

பின் தொடர்ந்தேன்

அடி முடி இல்லா

அனந்தத்தில்

எங்கோ ஆழத்தில்
தொலை ஆழத்தில்
பறந்து கொண்டிருக்கின்றன
இரு சிறகுகள்
இரு பறவைகள்
இரு நகரங்கள்
புரண்டு படுப்பவனின்
முகத்தில்
ஒரு சிறு புன்னகை
சாம்பல்
உயிராக உருமாறிக் கொண்டிருந்தது
நிலமெங்கும்

மீண்டும் ஒருமுறை
இன்று
பொழுது விடிந்திருக்கிறது
புலரியின் முதற்புள் ஒலி கேட்டிருக்கிறது
செங்கதிர்
அலைகளிலிருந்து எழுந்து
மேகங்களில் மறைந்து சஞ்சரிக்கிறது
தவ்விய தவளை
உருவாக்கிய அதிர்வுகள்
குளத்து நீரில் மேலும் கீழும்
எழுந்து விழுகிறது
கொத்தப்பட்ட மீன்கள்
நீந்திக்கொண்டிருக்கின்றன
வானத்தில்

ஒரு துயரத்தின் முன்

ஒரு துக்கத்தின் முன்

ஒரு கைவிடுதலின் முன்

ஒரு துரோகத்தின் முன்

ஒரு அவமானத்தின் முன்

தீரா வாதை ஒன்றின் முன்

ஓசைகள் ஏதுமற்ற ஓர் உலகம் இருக்கிறது

பின்னர்

ஓயாது அரற்றும்

ஓர் அலறலும்

சில கண்ணீர்த்துளிகளும்

மௌனம்

நிரம்பியிருக்கிறது

தெளிந்த உலகத்தில்

அகண்ட நதியில்
நிறைந்து
செல்கிறது
சேற்று நிறத்தில்
நீர்
வானில் ஓயாமல்
பறக்கும்
கழுகு
நதியின்
மீன் கவ்வ
இறங்குகிறது
மீண்டும்
மீண்டும்
அகப்படாமல்
தப்பிய
தப்பிய
மீன்
வேகமாய் செல்கிறது கடலுக்கு
தன் விரைவிலும்
நதி விரைவிலும்

தடங்கள்

மெல்ல
முன்னேறிச் செல்கின்றன
சிற்றடிகள்
திசையெங்கும் சூழ்ந்த வனங்களில்
தம் மக்களின்
பசித்தீ அணைக்கும்
ஒரு பிடி உணவுக்காக
வெள்ளி முளைக்கும் பொழுதுகளில்
ஏரெடுத்து
புகலடைந்த ஊரில்
குடி காக்க
போரின்
தூரத்துச் சத்தங்களை
அவதானித்து
அறிவின் தீராத வியப்பில்
உணர்வின் அலைப் பெருக்கில்
என்றோ
ஒரு கணம்
பதிந்தன
வானத்து மேகங்களில்

களப்பலி

எப்போதும்
எங்கும்
முன்நிற்கிறது
முன்வருகிறது
முன்னேறிச் செல்கிறது
பசுந்தளிர் மென்மையுடன்
ஓர் உணர்வு

ஒவ் ஒரு கணத்தையும்
உற்சாகமான
பல பல நுண் கணங்களாய்
அனுபவித்து
திளைக்கிறது
ஓர் ஊழ்கத்தில்

யுகங்கள்
பலவான பின்னும்
ஜீவித்திருக்கிறது
ஒரே உற்சாகம்

வெட்டவெளியில்
உங்களுக்குத்
தேர்வுகளோ
மறைவிடங்களோ
இல்லை
நீங்கள்
நனைந்தே
தீர வேண்டும்

நதி வணக்கம்

நகரும் நீர்மையே
நகரும் அமிர்தமே
நகரும் வாழ்வே

உனக்கு
முதல் வணக்கம்

நான் நாம்

தனியாகக் கிளம்பிய
ஒரு பயணத்தில்
வீடு திரும்பினேன்
புன்னகையுடன்
எங்கும்
நான்
நிறைந்திருந்த
பாதையில்
எல்லாம்
நானான
உலகில்