ஆயிரம் கரங்கள்

தீ எழட்டும்
எப்போதும் விண் நோக்கியே
எழும்
தீ எழட்டும்
வானின் மேன்மைகளை
மண்ணின் உயிருக்குத்
தன் தளிர்க்கரங்களால்
கொண்டு சேர்க்கும்
தீயின்
ஆயிரம் ஆயிரம் கரங்கள்
எழட்டும்
எங்கள் எல்லைகளை அவியிடுகிறோம்
எங்கள் பேதங்களை அவியிடுகிறோம்
எங்கள் அறியாமையை அவியிடுகிறோம்
தீயே
எங்களைத் தூய்மைப்படுத்து
எங்களை ஆற்றல் கொண்டவர்களாக்கு
புவியெங்கும்
அன்பை நிலைபெறச் செய்