எனது மோட்டார்சைக்கிள்

எனது மோட்டார்சைக்கிள்
எப்போதும்
அமைதியாகக்
காத்திருக்கிறது
எனக்காக

அது
என்னை அறியும்
என்னை விடவும்
என்னைப் பற்றி
நன்றாக அறியும்

முதல் முறையாக
அதில் பயணித்த போது
நான் அடைந்த குதூகலத்தை
நாங்கள்
பரஸ்பரம்
இன்னும்
மறக்கவில்லை

எனது முனைப்புகளை
எனது ஆர்வங்களை
எனது செயல்பாடுகளை
எனது மனம் இயங்கும் விதத்தை
எனது சுபாவத்தை
அது
மிக நன்றாக அறிந்திருக்கிறது
எவரை விடவும்
எனினும்
ஒருநாளும்
என்னிடம் எதுவும் சொன்னதில்லை

அதன் மௌனத்திலிருந்து
நான் எத்தனையோ பெற்றிருக்கிறேன்
ஆலோசனைகளை
சம்மதங்களை
மேலான வாய்ப்புகளை

நான்
அதனை முறையாகப் பராமரிப்பவன் இல்லை
என்ற வருத்தம்
எனக்கு உண்டு
அதற்கு என் மீது புகார் எதுவும் இல்லை

அது இருக்கிறது
கடவுள் யார் மீதும் புகாரற்று இருப்பது போல
அது காத்திருக்கிறது
எனக்காக