மாமூல் வாழ்க்கை

ஒரு புராதன நகர்
மெல்ல
ஜனநாயகத்துக்குள்
வந்து
பெரும் பரபரப்புகள்
இன்றி சாதாரணமாய்
இருந்தது

அதன் நீண்ட மதில்சுவர்கள்
எதையும் காக்க வேண்டிய அவசியமின்றி இருந்தன
அதன் கண்காணிப்பு கோபுரங்கள்
பறவைகளின் எச்சத்திலிருந்து முளைத்த விருட்சங்களால் அசௌகர்யமாகியிருந்தன
அதன் கொத்தளங்களில் கிரிக்கெட் ஆடினர்
பள்ளி விடுமுறைச் சிறுவர்கள்
அதன் தொழுவங்களில்
பயன்படாமல் ஆக்கப்பட்ட ஜீப்கள் நின்றிருந்தன
அதன் அந்தப்புரங்களின் ஒரு பகுதி
பிறப்பு இறப்பு சான்று வழங்கும் இடமாகவும்
அடையாள அட்டைக்கு புகைப்படம் எடுக்கும் மையமாகவும் இருந்தது
தர்பார் மண்டபத்தின் தூண்களில்
ஒளிந்து விளையாடிக் கொண்டிருந்தன
சுற்றுலா வந்த குழந்தைகள்

அரச முறைகள்
மாறினாலும்
பெரிய மாற்றங்கள் ஏதுமின்றி
மாமூல் வாழ்க்கை வாழ்கின்றன
கோட்டையின் மரங்களும்
பழந்தின்னி வௌவால்களும்
பச்சைக்கிளிகளும்
சிட்டுக்குருவிகளும்