நிறை அறை

என் அறையை
ஏதேனும் ஒரு விதத்தில்
மாற்றியமைத்துக் கொண்டும்
தூய்மைப்படுத்திக் கொண்டும்
இருக்கிறேன்
உனது கண்களின் வழியே
காணும் தோறும்
அறையில்
ஏதேனும் ஒன்று செய்ய வேண்டியதாகவே இருக்கிறது
தரையை இருவேளை பெருக்கினேன்
பின்னர் தண்ணீர் கொண்டு துடைத்தேன்
ஜன்னல் திரைச்சீலைகளை
ஒளி பளீரென பரவாமல்
மென்மையாக நிறைவது போல் அமைத்தேன்
கிருமிநாசினிகளால்
பாத்ரூம் தரையை தினமும் சுத்தம் செய்தேன்
தினமும் ஊதுவத்தி ஏத்தச் சொல்வாய்
சாம்பலை மறுநாள் வரை வைத்திருப்பதை
நீ விரும்ப மாட்டாய்
எப்போதும் கைக்கெட்டுமாறு தண்ணீர் பாட்டிலை
வைக்கச் சொல்வாய்
தண்ணீர் தீரப் போனால்
அலுப்பு படாமல்
சமையலறை சென்று
உடன் நிரப்பிக் கொண்டு வர வேண்டும்
ஒரு கணம் கூட
அறையில் ஓய்ந்து அமர
முடியவில்லை
இன்னும் நான் எத்தனை
சீராக்கப்பட போகிறேன்
உனது கண்கள்
எனக்கு
அவ்வப்போது வருவது எப்படி
உனது கண்கள்
எனது அறையில்
உனது மனம்
என் கண்களில்
நிறைவதன் சதவீதக் கணக்கு என்ன
என் அறையின் மையத்தில்
என் மையத்தைக் குறித்து
யோசிக்கிறேன்
எப்போதும்
என் அறைக்கே வந்திராத
புன்னகைக்கும் உன் முகம்
மட்டும்
நினைவில் எழுகிறது
அந்திச் சூரியனுக்கும்
கண்களுக்கும்
இடையே
நிறையும் மேகங்களைப் போல