நீ எங்கும் இருக்கிறாய்

இரண்டு ஜன்னல்கள் கொண்ட
நான்கு சுவர் உள்ள அறையில்
முழுவதும் உன் நினைவு
பரவியிருக்கிறது
என வெளியே சென்றேன்
நீ எங்கும் இருக்கிறாய்
வானில் மிதக்கும் புள்ளில்
குளத்தின் குளிர் நீரில்
அதன் படிகளுக்கருகில்
சில கணங்கள் மோனித்திருக்கும் மீன்களில்
எரியும் நெருப்பில்
நெற்கதிரில்
சூரியகாந்திப் பூவில்
அரச மர நிழலில்
அந்திப் பொழுதில்
வான்மீனில்
வெண்நிலவில்
நீ எங்கும் இருக்கிறாய்