55

அவள் 

ஒரு மலரைப் போன்றிருக்கிறாள்

அத்தனை மென்மையாக

அத்தனை மேன்மையாக

தன் கைவிரல்களால்

மலர்தலை

அபிநயிக்கிறாள்

அக்கணம்

மலரும்

ஆயிரம்

ஆத்ம மலர்கள் 

56

வாழ்வை

மலராக்கிக் கொள்ளும்

விந்தையை

நீ பெற்றது எப்படி?

நீ அடைந்தது எப்படி? 

57

விண்மீன்கள்

நிலவு

மேகம்

கடல்நுரை

அனைத்தும்

நீ சூடும் மலர்கள்

என்றாகின்றன 

58

ஒரு குழந்தைக்கு

மலர்

என்பது

தீரா வசீகரமாகவும்

முடிவில்லாப் புதிராகவும்

எப்போதும்

இருக்கிறது 

59

தூய்மையின்

அன்பின்

உணர்வின்

கண்ணீர்த் துளிகள்

மலர்களாக

விழுகின்றன 

60

ஒரு மலரின்

முன்

பணிதல்

இந்த வாழ்வை

எத்தனை

அழகாக்குகிறது? 

61

கரைந்து போகையில்

எண்ணிக் கொள்ளவோ

சொல்லிக் கொள்ளவோ

ஏதேனும் உள்ளதா என்ன? 

62

 மலர்களின் உலகில்

கரைதல் மட்டுமே இருக்கிறது

கரைதலின்

விடுதலை மட்டுமே இருக்கிறது

63

ஆயிரம் நிலவுகள் உதிக்கையில்

பூக்கிறது

ஆத்ம மலர் 

64

உனது விரல்கள்

மலர்களை

நெசவு செய்து கொண்டிருக்கின்றன

உனது எண்ணங்கள்

மலர்களை பூக்கச் செய்கின்றன

உனது கற்பனைகள்

மலர்வாசம் கொண்டுள்ளன