உன்னைச் சந்தித்த நாளிலிருந்தே
எனது ஆகப் பெரிய சிக்கலாய் இருப்பது
உன்னை எப்படிக் கையாள்வது என்பது
பெயரும் நட்சத்திரங்கள் போல
உனது விருப்பங்கள் மாறி விடுகின்றன
உனது தேர்வுகள் மாறி விடுகின்றன
உனது ரசனைகள் மாறி விடுகின்றன
எப்போதும் ஒரு அடி முன்னால் இருக்கிறாய்
எனது கணிப்புகளின் எல்லைக்கு
ஒரு கண்ணாடியைக் கையில் வைத்திருப்பது போல
ஒரு பந்தை சுழற்றிக் கொண்டிருப்பது போல
ஒரு கத்தியை கரத்தில் வைத்திருப்பது போல
உன்னை ஏந்தும் தருணங்கள் இருக்கின்றன
கையாளத் தெரியாததை கையாள்வதின்
பதட்டம் இல்லாமல் இருக்கிறது
உன்னை எதிர்கொள்ளும் போது
உன்னைச் சந்தித்த நாளிலிருந்தே
எனது ஆகப் பெரிய சிக்கலாய் இருப்பது
உன்னைக் கையாள்வது எப்படி
என்பது