நீலோத்பலம்

அவள்
எப்போதும்
நீல நிறத்தை விரும்புகிறாள்
தன் வாழிடத்தை
அணி செய்யும் தோறும்
நீலத்தின் வெவ்வேறு தன்மைகளைப்
பயன்படுத்துகிறாள்
அவள் தேர்ந்தெடுக்கும்
மற்ற வண்ணங்களும்
நீலத்தின் சாயலை உள்வாங்கிக் கொள்கின்றன
அல்லது
நீலத்திற்கு மேலும் அழகு தருகின்றன

ஒருமுறை
ஹெலிகாப்டரில்
பயணித்த போது
ஜன்னல் திறந்து
வான் நீலத்தின் ஒரு துளியை
எடுத்துக் கொண்டாள்

அந்திச் சூரியனை நோக்கி
படகில் சென்ற போது
கடல் நீலத்தின் ஒரு துளியை
எடுத்துக் கொண்டாள்

அவற்றை ஒரு விதையாக்கி
தன் தோட்டத்தில்
இட்டு
தினமும் நீர் வார்த்தாள்

பின்னொரு பருவத்தில்
அச்செடி
அவள் இமைக்கும்
பொழுதெல்லாம்
நீலமாய்
மலர்ந்தது