கதிரோனே ஒளியோனே அறிவோனே

கதிரே
உன்னை வணங்குகிறேன்

வாழ்வு என்பதை நீயாய் நாங்கள் உணர்கிறோம்
உலகென்பது எங்களுக்கு உனது ஒளியாய் அனுபவமானது
உன் கருணையை நாங்கள் உணவாய் அருந்தினோம்
உன் அன்பு எங்கள் மேல் மழையாய்ப் பொழிந்தது

எங்களை நீ அறிவாய்

எங்கள்
எல்லைகளை
சிறுமைகளை
இச்சைகளை
பூசல்களை
தடைகளை

ஒவ்வொரு நாளும்
வெள்ளிக்குப் பின்
முளைக்கும்
உன் முதற் கதிர்

எங்களை
மன்னிக்கிறது
எங்களுக்கு
வாய்ப்பு தருகிறது

இன்று உன்னிடம் யாசிக்கிறோம்
உனது ஆற்றலை
உனது திறனை
முடிவிலா உன் அன்பை