உயிர் ஒளி

ஒரு வரைபடத் தாளில்
ஓரிடத்தில்
அதை அடி என்பதா
அதை முடி என்பதா
என இப்போது சொல்ல முடியாத
ஓரிடத்தில்
பல வண்ணம் கலந்த
ஒரு புள்ளியை இடுகிறேன்
பின்னர்
அவை எங்கும் நீண்டன
பின் தொடர்ந்து கொண்டேயிருக்கிறேன்
நீளும் வழி தோறும்
அதன் ஒரு கை ஆழ்கடலில் துழாவியது
பாதத் தடங்கள் வானில் பதிந்தன
உச்சி மலைகளை நோக்கி உடல் நகர்த்தியது
விடாய் தீர குருதி கேட்டது
புலிக்குருளைகளின் கர்ப்ப ஈரமாய் பிசுபிசுத்தது
உலகெங்கும் உதிரும் கண்ணீர்த்துளிகளின் உப்பானது
மண்ணிலிருந்து பசும் தளிராய் முளைத்தது

என் திருப்திக்கு
அதற்கு
உன் பெயரை
இட்டுக் கொண்டேன்