நீ இல்லாத நான்

நீ இல்லாத வீட்டின்
பொழுதுகள் முடிவற்று நீண்டு இருக்கின்றன
காலக்கடிகை உன் கட்டுப்பாட்டில் வந்தது எங்ஙனம்
எவ்வளவு முயன்றும்
சோஃபாக்களை டீபாய்களை பிளாஸ்டிக் நாற்காலிகளை
முழுதாக ஒத்துழைக்கச் செய்ய முடியவில்லை
பொருந்திடாமல் லேசாகத் தவித்தன
வாஷ்பேசின்களை சுத்தமாகக் கழுவினேன்
அவை மௌனித்திருந்தன
சமையலறையில் கை தொடும் எப்பொருளும்
உத்தேசித்ததற்கு இரண்டு அடி தள்ளிப் போயின
தண்ணீர்க் குவளையும் டம்ளர்களும் மட்டும் எப்போதும் போல்
நீ இல்லாத வீட்டில்
நிரம்பியிருக்கின்றன உன் நினைவுகள்
எங்கும்
நானாக இல்லாமல் இருக்கிறேன்
நீ இல்லாத நான்