தன்னைப் போல்

சமீபத்தில்
பட்டறையை மூடிய கார் மெக்கானிக்
ஒரு டூ-வீலர் ஒர்க் ஷாப்பில் அமர்ந்திருக்கிறார்
ஒரு சின்ன ஸ்டூலில்
டூ-வீலர் மெக்கானிக்களுக்கு
அவரால் எந்த விதத்திலும் உதவமுடியவில்லை
அது அவரை சங்கடப்படுத்துகிறது
ஏதோ ஒரு வெளியூர் கார்
சாலையில் நின்று போகும் போது
ஊர்க்காரர்கள்
ஊரில் இருக்கும் ஒரே மெக்கானிக்
என அடையாளப்படுத்தி
இவர் இருக்கும் இடம் சொல்லி
அனுப்பிவைக்கின்றனர்
ஒரு சிறு மூட்டையாய் கட்டப்பட்டிருக்கும்
அவரது உபகரணங்கள் முழுமையாக ஒத்துழைக்கின்றன
சிக்கல்களை சரிசெய்து விடுகிறார்
ஒரு நாளைக்கு இரண்டு மூன்று வாகனமாவது
வேலைக்கு வருகிறது
ஒரு வேப்ப மர நிழலில்
காரை நிறுத்தி வசதியாக வேலைபார்க்கிறார்
மழைக்காலத்தில் எப்படி வேலை செய்வீர்கள்
கேட்கிறான் காரில் பயணித்த குடும்பத்தின் சுட்டிப்பையன்
வானத்தைக் காட்டி
தெய்வம் உதவி செய்யும் என்கிறார்
நீங்கள் எங்களுக்குச் செய்தது போலவா
என்கிறான் சுட்டிப்பையன்