கொலுக்களை
கொலு பொம்மைகளை
காணும்
ஒரு சிறுவனுக்கு
ஆனந்தமானது
இந்த உலகம்
என்று
தோன்றிவிடுகிறது
அல்லது
ஆனந்தமானது
கொலு பொம்மைகளின் உலகம்
என்று
செட்டியார் பொம்மை
அவனுக்குப் பிடித்திருக்கிறது
ஆச்சி பொம்மையும்
மிருதங்கம் வாசிக்கும் நந்தி
அர்த்த நாரீஸ்வரர்
மீனாட்சி கல்யாணம்
சீதா கல்யாணம்
அமைதியாய் இருக்கும் நரசிம்மர்
மானுடக் கல்யாண கோஷ்டி ஒன்று
ராமன் கிருஷ்ணன் அனுமன் இலக்குவன்
அரவில் பள்ளி கொள்ளும் பெருமாள்
அம்மாக்களும்
அக்காக்களும்
பாட்டிகளும்
அமைக்கும்
கொலு
ஒவ்வொன்றையும்
அவன் ஒவ்வொரு முறையும்
ஆர்வத்துடன் பார்க்கிறான்
அவர்கள்
மகிழ்ச்சியான உலகை
உருவாக்க
அல்லது
மகிழ்ச்சியின் வெவ்வேறு வடிவங்களைக்
காட்சிப்படுத்துவதாய்
எண்ணம் தோன்றுகிறது
கொலு அமைப்பவர்கள்
ஏன்
அத்தனை மகிழ்கிறார்கள்
என அறிய வேண்டும்
என்ற தீரா ஆவல்
அவனுக்கு உண்டாகிறது
கேட்கத் தெரியாமல் கேட்கிறான்
அவர்கள் மௌனமாகப் புன்னகைக்கின்றனர்
அந்த புன்னகை
மகிழ்ச்சிக்கானது
என
அவனுக்குப்
புரிகிறது
