நேரத்தைக் கடைப்பிடிப்பது என்ற வழக்கம் தமிழ்நாட்டில் மிகவும் குறைவானதாக உள்ளது. நேரத்தைக் கடைப்பிடிப்பது என்ற பழக்கத்தை முயற்சி செய்து பழகிக் கொள்ள வேண்டும். ஆனால் தமிழ்நாட்டில் நேரத்தைக் கடைப்பிடிக்காமல் இருப்பதை நூற்றுக்கு 99 சதவிகிதத்தினர் மிக இயல்பாகப் பழகியிருக்கின்றனர். இருவர் சேர்ந்து ஒரு இடத்துக்கு செல்ல வேண்டும் என்றால் இருவரும் சேர்ந்து இத்தனை மணிக்கு புறப்படலாம் என முடிவு செய்தால் ஒருவர் அந்த நேரத்துக்கு ஐந்து நிமிடத்துக்கு முன்பு தயாராக இருப்பார். இரண்டாமவர் 15லிருந்து 20 நிமிடம் தாமதமாக வருவார். நேர உணர்வு இல்லாத சமூகத்தில் கூட்டுச் செயல்பாட்டுக்கான வாய்ப்பு மிகவும் குறைவாக இருக்கும். சமத்துவமான வாய்ப்புகளுக்கு சாத்தியம் இல்லாமல் இருக்கும். நான் தவிர்க்க இயலாமல் ஏதேனும் நிகழ்ந்தாலன்றி தாமதமாக மாட்டேன். ஆனால் 99 சதவிகித நிகழ்வுகளில் நான் நேரத்துக்குச் சென்று காத்துக் கொண்டிருக்க வேண்டிய நிலை ஏற்படும்.
