இன்று காலை மேஜையை சீர் செய்தேன். அதாவது மேஜையின் மேல்பரப்பை. மேஜையின் மேல்பரப்பில் ஒரு குறிப்பேடும் ஒரு பேனாவும் ஒரு பென்சிலும் மட்டும் இருந்தால் போதுமானது. நாட்குறிப்புகள், கோப்புகள் ஆகிய்வை மேஜையின் மேல் இருக்க வேண்டிய அவசியமில்லை. மடிக்கணிணி இருக்கிறது. நான் மடிக்கணிணியை மேஜைக்கணிணி போல் பயன்படுத்துவேன். காகிதங்கள் அதற்குரிய கோப்பிலும் கோப்புகள் கோப்பு அலமாரியிலும் புத்தகங்கள் புத்தக அலமாரியிலும் இருக்க வேண்டும் என்று முடிவு செய்து கொண்டாலே மேஜை சீராக இருக்கும். சீரான மேஜை சீரான சூழ்நிலையை உருவாக்கும். என் மேஜை மேல் எப்போதும் பல புத்தகங்கள் இருக்கும். அது பல வருட பழக்கம். அதனால் பல புத்தகங்களை உள்ளடிக்கிய கிண்டிலை மேஜை மேல் வைத்துக் கொண்டேன். பல புத்தகங்கள் மேஜை மேல் இருப்பதாகவும் ஆயிற்று ; குறைவான இடத்தை மட்டுமே எடுத்துக் கொள்கின்றன என்பதாகவும் ஆயிற்று !
