நமக்கு
ஒரு அகம் இருக்கிறது
எளிய
அழகிய
நேர்த்தியான அகம்
தென்னைகள் நிறைந்த
அங்கும் இங்கும்
அணிலாடும்
சின்னஞ்சிறு பறவைகள்
கீச்சொலி
எப்போதும் எழுப்பும்
அகம்
நடந்து நடந்து நடந்து
எந்நேரமும்
சிறு சிறு
சீரமைத்தல்களை
எப்போதும் மேற்கொள்கிறாள்
அன்னை
அன்னை அமைத்த அகத்தில்
மனிதர்கள் பிறக்கிறார்கள்
மனிதர்கள் இறக்கிறார்கள்
அகத்தில் எப்போதும் சுடர்கிறது
அன்னை ஏற்றிய தீபச்சுடர்
அன்னையர் ஏற்றிய தீபச்சுடர்
அந்த
அந்தி தீபத்தின்
சிறு ஒளியை
நாளும்
தன்னுள்
ஏந்திக் கொள்கிறான்
நாளவன்
***
தீர்த்தக் கரையில்
காத்திருக்கிறேன்
நீ சொன்ன படி
இந்த உலகம் அழகியது
என்பதை
மீண்டும் மீண்டும் மீண்டும்
உணர்ந்து கொண்டு
நீ சொன்ன நேரம்
கடந்து விட்டது
அதன் பின்
எத்தனையோ
அந்திகள் விடியல்கள்
எழுந்து மறைந்து விட்டன
யுகங்கள்
தோன்றி மறைந்து விட்டன
எதிர்பார்ப்பு
ஏக்கம்
வலிகள்
துயரங்கள்
துக்கம்
தவிப்பு
அலைகளென எழுந்தன
வித வித
உணர்வுகள்
தன் சிறகுகளால்
தன் சிறகுகளுக்குள்
வானும்
விண்மீன்களும்
காற்றும்
ஒளியும்
மண்ணும்
நீரும்
பொதிந்து கொண்டன
என்னை
அலைகள் அல்ல கடல்
தீர்த்தக்கரையில்
காத்திருக்கிறேன்
நீ சொன்ன படி
***
காட்டாளன்
சுடலைப் பொடி பூசி
உடுக்கடிக்கிறான்
எனக்கு ஆயிரம் உடல்கள்
எனக்கு ஆயிரம் கபாலங்கள்
எனக்கு ஆயிரம் அறியாமைகள்
காட்டாளனே வா
என்னை அழி
என் கபாலங்களை
சூடிக்கொள்
காட்டாளனே வா
என்னை அழி
என் கபாலங்களை
சூடிக்கொள்
***
ஓவியம் : எல் ஆர்
