அவன் 3 வயது குழந்தையாக இருந்த போது ஒரு சினிமா வெளியானது. அந்த சினிமாவின் ஹீரோ அந்த சினிமாவின் வில்லனைத் தொலைபேசியில் அழைப்பார். வில்லர் ரிசீவரை எடுத்து ‘’ஹலோ! யாரு?’’ எனக் கேட்க ஹீரோ அதற்கு எதிர்முனையில் இருந்து ‘’பராசக்தி ஹீரோ டா’’ என்று பதில் சொல்வார். இந்த வசனம் அவனுக்குப் பிடித்துப் போய் விட்டது. சக வயது குழந்தைகளுடன் எங்கள் வீட்டுக்கு வருவான். தொலைபேசியில் ‘’ஆர்’’ என்ற ஆங்கில அட்சரம் உள்ள பட்டனை அமுக்கினால் அது கடைசியாக பேசிய எண்ணுக்கு போகும் என்பது அவனுக்குத் தெரியும். அதனால் வீட்டுக்கு வந்ததும் நேராக ஃபோனுக்கு சென்று ‘’ஆர்’’ பட்டனை அழுத்துவான். லைன் போகும். ஃபோனை எடுத்து யாராவது ஹலோ யார் பேசறது என்பார்கள். இவன் இங்கிருந்து ‘’பராசக்தி ஹீரோ’’ என்பான். இதில் அவன் அவனுக்கும் அவன் சக நண்பர்களான குழந்தைகளுக்கும் ஒரு மகிழ்ச்சி.
