உச்சி

கதவுகள் மூடியிருக்கின்றன
விதவிதமான கதவுகள்
விதவிதமான கதவடைப்புகள்
யாரோ சிலர் வாசலில் தயங்கி நிற்கிறார்கள்
கலைந்து கிடக்கும் செருப்புகளைப் பார்த்துக் கொண்டிருக்கிறார்கள்
உச்சிவெயிலில் வீதியில் தனியாக
நடந்து செல்கின்றனர் வழிப்போக்கர்
குடிக்க தண்ணீர் வேண்டும்
பார்வையில் நிரம்பி
மெல்ல வயிற்றில் நிரம்பும்
குளிர்ந்த நீர்
வேப்பமர நிழலில்
முத்து மாரியம்மன்
வந்து சேர்ந்த
நாதஸ்வர கோஷ்டி
தவில் நாதஸ்வரத்தை
பத்திரப்படுத்தி விட்டு
துண்டை விரித்துப் படுக்கிறது
கிளைகளில் கிரீச்சிடுகின்றன
அவ்வப்போது
சில குருவிகள்