கதை ஆனது

அதாவது
கதை என்ன ஆனது என்றால்
எல்லாரும் எதிர்பார்த்த
எல்லார் கவனமும் கூரான
இடம்
எல்லார் ஞாபகத்திலும் இருந்தது
ஆனால்
கதாபாத்திரங்கள்
கதையில் அந்த இடத்தை
தன் போக்குக்கு
மாற்றியமைத்துப் பார்த்தனர்
எங்கேயோயிருந்த வெட்டவெளி
இங்கே வந்து சேர்ந்தது
மேய புல் தேடிய சில ஆட்டுக்குட்டிகள்
சுவாரசியமில்லாமல் கடந்து சென்றன
களத்துமேட்டில் பல நாளாக நின்ற டிராக்டரை
இழுத்து வந்து போட்டனர்
சட்டெனக் கூடிய ஒரு கும்பல் வாய்ச்சண்டையில் இறங்கியது
சுவாரசியமாகக் கதை கேட்டவர்கள்
கதை என்ன ஆனது
கதை என்ன ஆனது
என்றனர்
நான் தான் சொல்கிறேனே
என்றான்
வெட்டவெளியின் கதை சொல்லும்
கதைசொல்லி