ஆச்சர்யம்

அப்பா
வீட்டில்
ஒரு பிரத்யேக உலகை
உருவாக்கியிருக்கிறார்
அதனை
அக்கறை கொடுத்து
காக்கவும்
செய்கிறார்

பொழுது விடிந்ததிலிருந்து
ஓயாமல்
வீட்டில்
இங்கும் அங்கும் செல்கிறார்
மாடிக்கு ஏறுகிறார்
பால்கனிக்கு சென்று வருகிறார்

உடைந்த பிளாஸ்டிக் வாளிகளில்
மண்ணும் உரமும்
நிரப்புகிறார்
சமையல் கழிவுகளை
மக்கச் செய்து
அதில் இடுகிறார்

குறைவான நீரை
எல்லா செடிகளுக்கும்
தேவையான அளவு
பார்த்து ஊற்றுகிறார்

சணல் கயிற்றால்
பிளாஸ்டிக் நாடாவால்
மாடிக்கும்
தரைத்தளத்துக்கும்
ஆங்காங்கே
இணைப்பு அளித்திருக்கிறார்
அத்தடங்களில்
தளிர்கள் துளிர்க்கின்றன
பூக்கள் மலர்கின்றன
பீர்க்கங்காய்
திடீரென
ஒருநாள் காய்த்துத் தொங்குகிறது
பாகல் தோன்றுகிறது

அழகாய் உருவாகியிருக்கும்
அப்பாவின் உலகத்தை
ஆச்சர்யத்துடன்
பார்க்கிறேன்

அப்பாவைப் பார்ப்பது போலவே