மாற்றம்

அலைகடலின் முன்
ஈரக்காற்று முகம் தீண்ட
நனைந்த கால்களுடன்
தொடுவானத்தை
இமைக்காமல்
நீ
பார்த்துக் கொண்டேயிருந்த கணம்

நிழற்சாலையில்
சேர்ந்து
நடந்த போது
அன்றைய
புதிய மலர்
கண்டு
புன்னகைக்கையில்
எழுந்த ஒளி

மேகங்கள் நகரும் வானத்தை
குதூகலத்துடன்
அடையாளப்படுத்திய
உனது கை விரல்கள்

தீபச் சுடரொளி
பிரதிபலிக்கும்
உனது முகம்

பிரிவின் துயர் காட்டிய
கண்ணீர்த் துளிகள்

மணி ஒலிக்கையில்
கோபுரத்திலிருந்து
சடசடத்து எழும் பட்சிகள்
மௌனத்தில்
அமர்கின்றன
மீண்டும்