பார்வை முன்
விரிந்திருக்கும் பாறைத் திரைகளையும்
குத்திட்டிருக்கும் மரங்களையும்
கை தொடுகையில்
ஒட்டிக் கொண்டிருக்கும் மேகங்களையும்

அப்படியே விட்டு விட்டு

ஊர் திரும்ப வேண்டியிருக்கிறது
மலைப் பிரதேசத்திலிருந்து

09.05.2018
09.10

கூற நினைத்து

சொல் சேர்த்து

ஒத்திகை பலமுறை பார்த்து

எப்போதுமே

சொல்லாத சொற்கள்

ஆங்காங்கே தனித்திருக்கின்றன

பூஞ்சோலைகளாக

மலைப் பாறைகளாக

திக்குத் தெரியாத காடாக

கடற்கரை மணற்பரப்பாக

அன்னியனாக

சென்று வருவதுண்டு

அவ்வப்போது

தாயகம்

காலைப்பொழுதில் நெடுஞ்சாலையில் குடத்துடன் நடந்து கொண்டிருக்கிறாள் ஒரு பெண்

தேனீர்க்கடையின் கண்ணாடி தம்ளர்களை கழுவிக் கொண்டிருக்கிறாள் ஒருத்தி

தூங்கி எழுந்து அமர்ந்திருக்கும் குழந்தைகளுக்கு ரொட்டியுடன் காய்ச்சிய பால் தருகிறாள் ஓர் அன்னை

கல்லூரிக்குச் செல்ல பெட்ரோல் நிரப்ப வருகிறாள் யுவதி

முன்பகலில் கார் ஓட்ட கற்றுக் கொள்கிறாள் நடுவயதுப் பெண்

பனிமூட்டம் முழுதகலாத பொழுதில் தேர்வுக்குச் செல்கின்றனர் சிறுமிகள்

வங்கி பணம் செலுத்து சீட்டில் முத்திரையை சத்தமாகப் பதிக்கிறார் பெண் காசாளர்

விரைந்து செல்லும் வாகனத்தின் வயர்லெஸ்ஸில் அலுவலர்களுக்கு குறிப்பு அளிக்கிறார் பெண் அதிகாரி

பள்ளி முடிந்த பின் மெல்ல நடந்து சென்று கொண்டிருக்கிறார் ஆசிரியை

துர்க்கையின் ஆலயத்தில் அகல் தீபம் ஏற்றுகின்றனர் இளம்பெண்கள்

மானுடரின் பிரார்த்தனைகளை கேட்டுக் கொண்டு நடந்து கொண்டே இருக்கிறாள் கங்கை

நாம் வாழும் உலகம்

அங்கும் இங்கும்
தாவிச் செல்லும்
சிட்டுக்குருவி

அந்தர வளையத்தில்
உள் நுழைந்து
வெளியேறும்
தூக்கணாங்குருவி

வயல் வெளி
கம்பி அமர் கரிச்சான்கள்

காலை மதியத்தில்
மாலைப்பொழுதுகளில்
கூடிக் கரையும் காகங்கள்

கோபுர இடுக்குகளில்
வாசம் புரியும் புறாக்கள்
பச்சைக் கிளிகள்

அழகானது
இந்த உலகம்
நாம் வாழும் உலகம்

பல்லாண்டுகளாய்
அலைகள் கரை தொடும்
கடல் கரையில்

பல்லாண்டுகளாய்
அலைகளில் மிதக்கும்
பழுப்பேறிய கட்டுமரங்கள்

பல்லாண்டுகளாய்
வீசும் சந்திர ஒளியின்
பொழுதில்

பல்லாண்டுகளாய்
பார்த்துக் கொண்டிருக்கிறது
கடலை
கரையை
ஒளியை

சில ஆண்டுகளாய்
அவ்வப்போது
வந்து போகும்
என்னையும்

குளக்கரை மரத்தடியில்

நூறாண்டுகளாய்

அமர்ந்திருக்கும்

பிள்ளையாருக்கு

எட்டு ஆண்டு அகவை கொண்ட

சிறுமி

அருகம்புல் மாலை சாத்துகிறாள்

சிறுமியின் கொடிவழியை

நினைவு கூர்ந்து

மலைக்கிறார்

கண ஈசர்

மண் பூக்கும் நிலம்

வானம் கரு கொண்ட 

நாள் ஒன்றில்

காணா பிரதேசம் ஒன்றுக்கு

உடன் 

மழை வர

தரை மார்க்கமாய்

பயணித்தேன்

மண் நின்ற

கிளைகளில்

பொற்கதிர்

மண் சாய்ந்த நிலம்

கடந்து போனேன்

அதலம்

கொதி குழம்பாய்

லட்சம்

ஆண்டுகளுக்கு

முன்னால்

பொங்கி வந்த

மண்ணில்

இப்போது

மீன்கள் நீந்திய சுனையில்

ஆடையற்ற குழந்தைகள்

குதித்துக் கும்மாளம் போட்டன

எப்போதோ பூக்கும் பல்லாண்டு

மரத்தோப்பு

மத் திய நேரத்தில்

ஆசுவாசமாய் வேடிக்கை பார்த்தது

சூழலையும் சுற்றத்தையும்

மலை உடைந்து

கூழாங் கல் ஆன நிலத்தில்

மஞ்சள் மலர்

கதிர்

பார்த்து

சிரித்தது

மேல் கூரை

என் வாழிடத்தின்
கூரை
பெரிதாய் இருந்தது
மிகப் பெரிதாய்

பாதி நேரம்
எண்ணற்ற துளைகளுடன்
மிகக் குறைந்த சலனங்களுடன்
முழுக் கருமையிலிருந்து
முழு வெண்மைக்கும்
முழு வெண்மையிலிருந்து
முழுக் கருமைக்கும்
நிறபேதம் கொண்டு

மீதி நேரம்
மெல்ல நெருங்கிக் கொண்டிருந்தது
அனலும்
குளிரும்

கூரையை
மாற்ற விரும்பினேன்
என் எண்ணப்படி
பொருந்திக் கொண்டன
தாவர பாகங்கள்

நிழல் குளுமை
ஆசுவாசமளித்தது
நாளெல்லாம்

அடிக்கடி பார்ப்பதுண்டு
முன்பிருந்த
மேல் கூரையை

07.05.2018
20.10

வசுதைவ குடும்பம்

நிலங்களில் சஞ்சரிக்கும்

பயணி

விளையாட்டு

மைதானத்தில்

முதலில்

கேட்டான்

‘உலகம் ஒரு குடும்பம்’

மன மண்ணில்

விதையாய்

விருட்சமாய்

எழுந்தது

அச்சொல்

டிராக்டர் உழும் வயல்கள்

நீர் பீறிடும் மோட்டார் கொட்டகைகள்

குவித்துப் போட்டு உருளைக்கிழங்கு ஏற்றும் லாரிகள்

மூடை வெங்காய மண்டிகள்

முள்ளங்கி வயல்கள்

உப்பளங்கள்

மோட்டார் படகுகள்

விமான நிலையங்கள்

எஸ்கலேட்டர்கள்

என்ஜின் லோகோக்கள்

சுங்க சாவடிகள்

டூ வீலர் ஒர்க் ஷாப்கள்

ஷாப்பிங் மால்கள்

செருப்புக் கடைகள்

பொக்கே ஷாப்கள்

பத்திரிக்கை கட்டு ஏற்றும் லோடு வண்டிகள்

ராணுவ சோதனைச் சாவடிகள்

பதுங்கு குழிகள்

கசாப்புக் கடைகள்

ஆயுதபாணிகளின் பயிற்சி முகாம்கள்

சிறைச்சாலைகள்

ராக்கெட் ஏவுதளங்கள்

வேதி ஆலைகள்

எங்கும் பயணித்து

மைதானம் மீண்டான்

பெரு விரி வெளியில்

நடை பயிலா குழந்தை

மானுடரையும்

கோள்களையும்

மதியையும்

ஞாயிறையும்

சக ஆட்டக்காரர்களாய் கொண்டு

துவங்கியது

ஓர் ஆட்டத்தை

நான் எழுதுவேன்

நான் எழுதுவேன்
தன்னல மறுப்புகளிலிருந்து
மறுக்கப்பட்ட நீதியிலிருந்து
செலுத்தப்பட்ட படைக்கலன்களிலிருந்து
பூட்டிய அறைகளிலிருந்து
வீச்சம் அடிக்கும்
இன்னும் உலராத குருதியிலிருந்து
ஓயாத வதையிலிருந்து

பெருகும் கண்ணீரை
ஓயாமல் பெருகும் கண்ணீரை

நான் எழுதுவேன்
நான் இன்னும் எழுதுவேன்