நகர் நீங்கும் செய்தி
அறிவிக்கப்பட்டபோது
ஓய்வுக்கான
தளர்ச்சியே
வெளிப்பட்டது
பணியாளர்
ஒருக்கங்களை
மேற்கொண்டனர்
எவ்வளவு விரைவில் முடியுமோ அவ்வளவு
பூசலின்றி
ஒருங்கிணைந்து
வேகத்துடன்
பணிகள் எப்போதும் இப்படித்தான் நடந்தன
என
அவளை நம்பவைக்க
கடைசி முயற்சி மேற்கொள்ளப்பட்டது
மனிதக் குரல் எழாமல்
பொருட்களின் ஓசை மட்டும்
கேட்டது
யாரும் பேசத் தயாராக இல்லை
பார்வையின் மௌனத்தை
அவளுக்கு அளிக்க முயற்சி செய்தனர்
தாளிடப்பட்ட அறையிலிருந்து
அவள் எப்படி வெளிப்படப்போகிறாள்
என்பதை
என்றும் போல்
அன்றும்
காண விரும்பினர்
இளவரசி
எப்போதும் போல் அலங்கரித்துக் கொண்டாள்
ஆடி நோக்கினாள்
முழுதாய் மலர்ந்திருந்த செவிப்பூவை
மாற்றி
மொக்காய்
இருந்ததை
அணிந்து கொண்டாள்
அகம் சூடும் மாலையை
எளிமையானதாக
தேர்ந்தெடுத்தாள்
கூந்தலைப் பிரித்து
தோளின்
முன்னும்
பின்னும்
புரள விட்டாள்
தன் அறையின்
தாள் நீங்கும் ஒலியின்
அடர்த்தியை
எப்போதையும் விட
கூடுதலாக
ஆக்கிக் கொண்டாள்
அறைக்கு வெளியே
தாழ்வாரங்களைத் தாண்டி
முற்றத்துக்கு அப்பால்
கூடியிருந்தோர் ஒலிகள்
சன்னமாக
கதவிடுக்கின் காற்றென
கேட்கத் துவங்கின
பணியாளர் அனுமதி கேட்டு உள்நுழைந்தனர்
அவளில் எந்த மாற்றத்தையும் உய்க்க இயலவில்லை
மெல்லிய குரல் சிலவற்றை விசாரித்து அறிந்தது
அதே குரல் சில குறிப்புகளையும் அளித்தது
அவள் தொழுவத்தை நோக்கிச் சென்றாள்
அது யாரும் எதிர்பாராததாக இருந்தது
அவளை தொலைவில் கண்டு கனைப்பை வெளிப்படுத்தின குதிரைகள்
பசுக்கள் மா என அழைத்தன
கன்றுகள் துள்ளல் கொண்டன
அவள் கைப்பிடியின் புல்
உண்ணப்பட்டது
பிராணிகளால்
புறப்பட்ட போது
உடன் வந்தன
அவிழ்க்கப்பட்ட சில கன்றுகள்
உப்பரிகைக்கு
படியேறி வந்த போது
அவளால் காக்கப்பட்ட சிட்டுக்குருவி
ஏதும் அறியாமல்
எப்போதும் போல் பறந்தது
இங்கும் அங்கும்
