எவ்வளவு அற்புதம்

ஒரு பெருவெள்ளம் ஓய்ந்ததற்குப் பின்னால்
நதியின் கரைகளில் நிறைந்திருக்கிறது
புது சேற்றின் தடங்கள்
அடித்து வரப்பட்ட தாவர தழை இலைகள்
பின் மாலையின் இருளில்
சூரியத் தடங்கள் முற்றாய் மறைந்திருக்கின்றன
ஓயாமல் பெய்த மழை
தூய்மையாக்கிய காற்றில்
புதுப்பிறப்பு கொண்டுள்ளது
நாம் காணும் காட்சிகள்
எல்லா இனிமைகளும் நிறைந்த
ஒரு புதிய தினம்
தினம் தினம்
உதிக்கிறது
என்பது
எவ்வளவு மகிழ்ச்சியானது
எவ்வளவு அற்புதமானது