ஜெனிவாவிலிருந்து நண்பர் கணேஷ் பெரியசாமி அனுப்பிய ஸ்விஸ் மிலிட்டரி கத்தி கைக்கு வந்த பின் நான் விரும்பும் பொருட்கள் பட்டியலில் இருந்த மற்ற பொருட்கள் என்ன என்று பார்த்தேன். பந்துகள். கண்டங்கள் தாண்டி கடல் தாண்டி ஸ்விஸ் கத்தி வந்து விட்டது. பந்துகள் உள்ளூரிலேயே கிடைக்கும் என்பதால் நேற்று விளையாட்டு உபகரணங்கள் விற்பனை செய்யும் கடைக்குச் சென்றேன். இரண்டு டென்னிஸ் பந்துகள் வாங்கினேன். ஒரு கிரிக்கெட் பந்து. இரண்டு ரப்பர் பந்துகள்.
இன்று ரப்பர் பந்துகளை வைத்து தூக்கிப் போட்டு பிடித்து விளையாடிக் கொண்டிருந்தேன். உற்சாகமாக இருந்தது. பந்து , யானை, ரயில் ஆகியவை என்றுமே உற்சாகம் தருபவைதான். பந்து கையிலிருந்து காற்றில் பறந்து மறுகையை அடையும் போது அதன் அசைவுகளில் சுழற்சியில் மனம் ஈடுபட்டது சந்தோஷம் தந்தது. சிறு வயதில் கையில் ஒரு பந்து கிடைத்தால் உடன் விளையாட யார் இருக்கிறார்கள் என்று எண்ணத் தோன்றும். இப்போது பந்தே ஒரு நண்பன் தான். என்னை உற்சாகப்படுத்தும் நண்பன்.
டென்னிஸ் பந்துகள் மெல்லியவை. கிரிக்கெட் பந்து சற்று இறுக்கமானது. அவற்றையும் வைத்துக் கொண்டு விளையாட வேண்டும். சிறு விளையாட்டு
கூட பெரிய அளவில் உதவி புரிகிறது என்பதே உண்மை. இன்று ஸ்விஸ் கத்தியை வைத்து ஒரு ஸ்கூருவைக் கழட்டினேன்.
பட்டியலில் ஒரு பாக்கெட் ரேடியோ இருக்கிறது. நேற்று ஃபிளிப்கார்ட்டில் பார்த்து வைத்தேன். ஒரு Sony ரேடியோ. அழகாக கச்சிதமாக இருந்தது. பார்த்து வைத்துக் கொண்டேன். இன்னும் ஓரிரு நாளில் ஆர்டர் செய்து விடுவேன்.
கதராடைகள் வாங்க வேண்டும். அதனை வருடப் பிறப்புக்கு முன்னர் கடைசி வாரத்தில் வைத்துக் கொள்ளலாம்.
எனது விருப்பங்கள் இவ்வளவுதான் என்பதில் மகிழ்ச்சி. அவை நிறைவேறி விட்டன என்பது மேலும் மகிழ்ச்சி.
