மீண்டும்

ஒரு பெரிய முயற்சிக்குப் பிறகு

ஒரு பெரிய நம்பிக்கை இல்லாமல் போன பிறகு

ஓர் எதிர்பார்ப்பு நிறைவேறாத பிறகு

தவிர்க்க நினைத்த கசப்பு வீரியத்துடன் எதிர்ப்பட்ட பிறகு

எந்த விளக்கமும் சொல்ல முடியாத பிறகு

தோல்வி தரும் அசௌகர்யங்கள் அன்றாடம் ஆன பிறகு

நாம்

இந்த உலகின்

முடிவற்ற

தீராத பாடங்களிடமிருந்து

மீண்டும்

கற்கத் தொடங்குகிறோம்

20/03/2018

23.10

யாரோ ஒருத்தி

யாரோ ஒருத்தி
எப்போதோ அளிக்கப்பட்ட சொல்லுக்காக
இன்னும் காத்துக் கொண்டிருக்கிறாள்

யாரோ ஒருத்தி
ஐயங்களின் மேகங்களை மிச்சமில்லாமல் அகற்றி
முழுமையாக நம்புகிறாள்

யாரோ ஒருத்தி
உறவின் இனிமையான பொழுதுகளை
உவகையுடன் எண்ணிப் பார்க்கிறாள்

யாரோ ஒருத்தி
மனதில் ஓயாமல் உழலும்
கசந்த அவமானத்தால் அவதிப்படுகிறாள்

யாரோ ஒருத்தி
கண்ணீர் சிந்திக் கொண்டிருக்கிறாள்

யாரோ ஒருத்தி
பாடும் பாடலில்
தூங்குகிறது
ஒரு குழந்தை

எப்போதாவது

டைரிக் குறிப்புகளில் இருக்கின்றன
தன்மை
முன்னிலை
எவரிடமோ சொல்லாமல் போன சொற்கள்
வெளிப்படுத்த இயலாத பிரியங்கள்
விழைவுகள்
செலவுக் கணக்குகள்
மறக்க முடியாத நாட்கள்
மனம் கசந்து வெளிப்பட்ட கண்ணீர்
குறிப்பாய் இருக்கும் அவமானங்கள்

எப்போதாவது
இடம் பெற்று விடுகின்றன
சில கவிதைகள்

14.03.2018
06.45

மழைப்பொழுது

தொலைதூரப் பயணியின் ஆசுவாசத்தோடு
விண்ணிலிருந்து
இறங்கிக் கொண்டிருக்கிறது
மழை நீர்
மாடிப் பரப்பில் கொட்டிக் கொண்டு
கொக்குகளின் ஒற்றைக் கால்களைப் போல ஊன்றி
கொட்டகைகளின் உலோகத் தகடுகளில் ஒலியெழுப்பி
ஊடுறுவவே இல்லாத தார்ச்சாலையில் ஓடி வழிந்து கொண்டு
மேய்ச்சல் மாடுகள் புரியாமல் பார்க்கின்றன
மரக்கிளைகளில் ஒடுங்கிக் கொள்கின்றன பறவைகள்
நின்ற பின்னும் காற்றில் நிரம்பியிருக்கிறது ஈரத்தின் நீர்மை
துலக்கமாகின்றன பகல் காட்சிகள்
எங்கும் தென்படுகின்றன தூய்மையின் சுவடுகள்
செருப்புக் கால்கள் நிறையும் வரை

மழை நீராடல்

மழைக் குளியல் போட்டேன்
மாடியில்
நனைத்து நீராட்டியது
மழையின் ஆதுரத் துளிகள்
மௌனமாய் நீராடின
விருட்சங்களும்
வீட்டுக் கூரைகளும்
வீதிகளும்
உடன் குளித்த கடல் மட்டும்
அலையாட்டம் போட்டது

அலைத்தீவு

கருக்கிருட்டில்
படகுக்காய்
காத்திருந்தோம்
அருகாமைத் தீவு செல்ல

இருள் முறியா
கணம்
ஒன்றில்
துவங்கியது
எம் பயணம்

யாம் முதலில் பெற்றது
உப்புநீர்க் காற்று
பயணத் தள்ளாட்டம்
விடியலின் சிவப்புச் சூர்யோதயம்
எலுமிச்சையின் வாசம்

பெருநகரின் மனிதத்திரளாய்
சூழ்ந்திருந்தது நீர்
அன்னிய அசௌகர்யத்தால்
எம்பிப் பார்த்தன மீன்கள்

உச்சி வெயில் நின்றிருந்த
கடல் உணவுகள் உப்பிட்டு காயவைக்கப்பட்டிருந்த
வலைகள் உலர்ந்து கொண்டிருந்த
தீவில்
அப்பொழுது
யாரும் இல்லை

நித்தம்

தட்டித் திறக்காத கதவுகள்
சொல்லிக் கேட்காத மனிதர்கள்
கைவிட்டுப் போன வாய்ப்புகள்
இழந்த காதல்கள்
பிரிந்த நட்புகள்
நினைவில் அழிந்து போன நாட்கள்
மீளா சாதாரணத்துவத்தின்
கேடயம் ஏந்தி
சமருக்குச் செல்கிறேன்
வாள் இல்லாமல்
தினமும்

அகக் காட்சி

அனல் பரவும்
கோடை மாதத்தில்
பெரு மரத்தின்
நிழலில்
ஓய்வெடுத்துக்
கொண்டிருந்தார்
ஐயனார்
உடன்
ஒரு பிறழ் மனதினனும்
ஒரு வழிப்போக்கனும்
ஒரு லோடு லாரியும்

பிளந்து வெளியேறிய
பாறைகள்
குவிந்து கிடக்கும் நிலத்தில்
தென்பட்ட
எங்கோ இருக்கும் பச்சையை
நோக்கிப்
பயணப்பட்டன
உள்ளூர் ஆடுகள்
இடையன் பார்த்துக் கொண்டிருக்க

வண்டிக்காரன்
எண்ணப்படி நடக்கின்றன
மாடுகள்
புல் மேய்ந்து
விட்டு
புல் சுமந்து கொண்டு

இயந்திரம்
உரித்து விட்டு
விசிறி எறிகிறது
சோள சக்கைகளை

வேகமாக நடப்பவனைப் போல
பார்வையில் கடந்து செல்கின்றன
கண்டெய்னர் லாரிகள்

வண்ணமான சினிமா போஸ்டர்
உலர்ந்து
பார்க்கிறது
போவோரையும் வருவோரையும்

இயக்கமற்ற இரவில்
தீண்டிச் செல்கிறது
மென் காற்று

நீர் வேட்டை

வரலாற்று நதியின்
கரை நகரில்
நிகழத் துவங்கியது
நீர் வேட்டை

ஆழ்ந்து
ஆழ்ந்து
எலிகள் போல்
துளைகளிட்டனர்
நகர் மாந்தர்

மணலின்
ஊற்று முகங்களுக்கு
தேடி சலித்தன
விழிகள்

வெவ்வேறு நிறங்களில்
மண்
வெளியே
குமிந்து
கொண்டிருந்தது

வேட்கை
கொண்ட
மக்கள்
தொலை ஆழங்களை
வசப்படுத்த
ஆயத்தமாயினர்

திசைகளை ஆடையாய்க் கொண்ட
கடந்து போகும் துறவி
சிரித்துக் கொண்டே சொன்னான்
எளிமையாய் இருங்கள்
கருணையை வேட்டையாடிப் பெற்றிட முடியாது

சாலையில்

நான் சென்று கொண்டிருந்த சாலையில்
வாகனம் சுமந்த வாகனங்கள் சென்றன
வாகனம் இயக்கும் மனிதர்கள் சென்றார்கள்
வாகனம் இயக்கா மனிதர்கள் சென்றார்கள்
பிராணிகள் சுமக்கும் சரக்குகள் சென்றன
என்னைப் பார்த்து
கண் சிமிட்டியவாறு
முள்ளங்கி கேரட் முட்டைகோஸ்
காய்கறிகளும் சென்றன