புறப்பாடு

ஒரு புத்தம் புதிய ஆடையை
முதலில் அணிந்து கொள்கிறாய்

இன்னும் ஒப்பனை துவங்காமலும்
அவை பேரழகாகவே காட்சி தருகின்றன

உனது நீண்ட கூந்தலுடன்
பலவிதமான பேச்சுவார்த்தைக்குப் பின்
ஓர் உடன்பாட்டை எட்டுகிறாய்

உன் முகம்
ஒவ்வொரு நாளும்
திகழ்கிறது
அழகின் புதிய புதிய சாத்தியங்களுடன்

உனது மோதிரங்களும் வளையல்களும்
உனது கூடுதல் கண்களாக
உலகைப் பார்க்கின்றன

குழந்தைகளைப் போல்
கட்டுப்பாடுகளுக்கு அப்பால் இருக்க
பிரியப்படுகின்றன
தோடுகள்

தவிர்க்க இயலாத உறவாக
உன்னுடன் பிணைத்துக் கொள்கிறது
கழுத்துச் சங்கிலி

பாதுகாப்பு வளையம் போல
சூழ்கிறது
உனது வாசனைத் திரவியங்கள்

என் வியப்பெல்லாம்
அலங்காரங்களைப் பார்த்து பார்த்து செய்து
மனிதர் சுபாவங்களை
அப்படியே ஏற்கிறாயே
என்றுதான்

19.03.2018
15.58