மைய நரம்பு மண்டலம்

இரண்டு நாட்கள் சென்னை சென்றிருந்தேன். மறைமலை நகரில் தங்கியிருந்தேன். அங்கிருந்து எழும்பூர் மின்சார ரயிலில் சிலமுறை சென்று வந்தேன். செங்கல்பட்டையும் சென்னை கடற்கரை ரயில் நிலையத்தையும் இணைக்கும் மின்சார ரயில் பாதையை சென்னையின் மைய நரம்பு மண்டலம் என நிச்சயமாகக் கூற முடியும். என் வயதில் என் பால்யகால நினைவுகளில் தாம்பரம் அவ்வளவு பெரிய ரயில் நிலையமாக இருக்கவில்லை. தாம்பரம் பேருந்துகளுக்கும் பேருந்து நிலையத்துக்கும் பேர் போன இடமாக இருந்தது. இப்போது தாம்பரம் ரயில் நிலையம் அடைந்திருக்கும் விரிவு பிரமிக்க வைக்கிறது. பல ஊர்களுக்கு பல ரயில்கள் தாம்பரத்திலிருந்து புறப்படுகின்றன. மின்சார ரயில்களுக்கு ஒரு தனிப் பாதை. வழக்கமான ரயில்களுக்கு ஒரு தனிப்பாதை என தாம்பரம் ஒரு முக்கியமான ரயில்வே மையமாக உருவெடுத்திருக்கிறது. 

தமிழ்ச் சிறுகதையின் ஆகப் பெரிய படைப்பாளிகளில் ஒருவரான புதுமைப்பித்தன் ‘’சுப்பையா பிள்ளையின் காதல்’’ என ஒரு சிறுகதை எழுதியிருக்கிறார். அக்கதை எழுதப்பட்டு 100 ஆண்டுகள் இருக்கக் கூடும். அக்கதையில் தாம்பரமும் சென்னை கடற்க்ரை ரயில் நிலையமும் ஒரு கதாபாத்திரம் போல. அக்கதையில் அந்த ஸ்டேஷன்கள் குறித்து எழுதப்பட்டிருக்கும் வரிகள் தமிழ் மொழியின் மூலம் அந்த ஸ்டேஷன்களை இறவா நிலை அடையச் செய்திருக்கும் வரிகள். சென்னையைக் குறித்து பல அறிஞர்கள் படைப்பாளிகள் வர்ணித்திருக்கின்றனர். திரு.வி.க வர்ணிக்கும் சென்னையின் சில குறிப்பிட்ட பகுதிகள் தற்போது திரு.வி.க மொழியில் மட்டுமே உயிர்த்திருக்கின்றன. ஸ்தூலமாக நம்ப முடியாத மாற்றம் கண்டு விட்டன. அவர் திருவான்மியூரிலிருந்து மாமல்லபுரம் வரையான கடலை ஒட்டிய பகுதி முழுவதும் மாந்தோப்புகளால் ஆனது என்கிறார். 

புதுமைப்பித்தன் எழுத்துக்களில் வெளிப்படும் தாம்பரம் , சென்னை கடற்கரை, மின்சார ரயில் ஆகியவை இப்போதும் சிறு சிறு மாற்றங்களுடன் அப்படியே உள்ளது. மேலும் பல காலம் இப்படியே இருக்கும்.  

பரஸ்பர மௌனம் (நகைச்சுவை)

இரண்டு தினங்களுக்கு முன்னால் ஒருவரைச் சந்திக்க நேர்ந்தது. அவரிடம் 2 மணி நேரம் உரையாடிக் கொண்டிருந்தேன். மிகவும் உற்சாகமான உரையாடல். எங்கள் பேச்சு புத்தகங்கள் குறித்து திரும்பியது என்பதே அந்த உரையாடல் அவ்வளவு சுவாரசியமாக இருந்ததற்கு காரணம். உரையாடல் நிறைவு பெற்று நாங்கள் விடைபெற்றுக் கொண்டோம். அன்று மாலை அவருக்கு ஃபோன் செய்து தயக்கத்துடன் ஒரு விஷயத்தைச் சொன்னேன். அதாவது எனக்கு ஒரு வலைப்பூ இருக்கிறது ; எனது வலைப்பூவில் நான் எழுதுகிறேன் என்று. நான் கூறியதைக் கேட்ட பின் அவரும் தயக்கத்துடன் இன்னொரு விஷயம் சொன்னார். அவருக்கும் வலைப்பூ இருக்கிறது ; அவரும் வலைப்பூவில் எழுதுகிறார் என்று. தமிழ்ச் சூழல் எவ்விதம் இருக்கிறது என்றால் 2 மணி நேரம் அறிவார்ந்த விஷயங்களை மனம் விட்டுப் பேசும் இருவர் தங்களை எழுதுபவர்கள் எனக் கூறுவதில் தயக்கம் காட்டும் நிலையே இருக்கிறது. ஏன் எழுதுபவர்கள் தங்களை எழுதுபவர்கள் எனத் தமிழ்ச் சூழலில் சொல்லத் தயங்குகிறார்கள். எழுத்து என்பது படைப்பூக்கத்தையும் அறிவார்த்தத்தையும் தன் தன்மைகளாகக் கொண்டது. தமிழ்ச் சமூகத்துக்குப் பொதுவாக படைப்பூக்கத்தின் அறிவார்த்தத்தின் சங்கேதங்களைப் புரிந்து கொள்ளும் திறனோ பயிற்சியோ கிடையாது.  அவர்களுடன் உரையாடுவது என்பது அஸ்ஸாமி மட்டுமே தெரிந்த ஒருவரும் கன்னடம் மட்டுமே தெரிந்த இன்னொருவரும் உரையாடிக் கொள்வது போன்றது. எழுத்தறிவு இல்லாத ஒருவரிடம் பேருந்தின் அறிவிப்புப் பலகையில் எழுதப்பட்டிருக்கும் ஊரின் பெயரை வாசிக்கச் சொல்வதற்கு சமம் அது. எழுதுபவர்கள் தங்கள் நெடிய அனுபவத்தில் தமிழ்ச்சூழல் அளிக்கும் அல்லலை பலமுறை அனுபவித்திருப்பார்கள். எனவே எங்கும் எவரிடமும் தான் எழுதுபவன் எனக் கூற மாட்டார்கள்.   நான் எப்போதுமே குறிப்பிடும் விஷயம் ஒன்று உண்டு. அதாவது தமிழ்ச் சமூகத்தின் எழுத்தறிவு 20 சதவீதமாக இருந்த காலகட்டத்தில் தான் திராவிட இயக்கம் தமிழின் ஆகப் பெரிய இலக்கியச் சாதனையான கம்பராமாயணத்தை தீயிட்டுக் கொளுத்த வேண்டும் எனக் கூறியது.  

ரயில் புத்தக வங்கி

அனுப்புநர்

*****

****

***

**

பெறுநர்

1. மத்திய ரயில்வே அமைச்சர்

ரயில்வே அமைச்சகம்

புதுதில்லி

2. மத்திய ரயில்வே இணை அமைச்சர்

ரயில்வே அமைச்சகம்

புதுதில்லி 

3. பொது மேலாளர்

தென்னக ரயில்வே

பார்க் டவுன் -சென்னை

ஐயா,

பொருள் ; ஒரு புதிய யோசனையை இந்திய ரயில்வே நிர்வாகத்துடன் பகிர்ந்து கொள்ளுதல்

தினமும் கோடிக்கணக்கான பயணிகள் பயணிக்கும் இந்திய ரயில்வே உலகின் மிகப் பெரிய பொதுப் போக்குவரத்து நிறுவனம் ஆகும். கடந்த சில ஆண்டுகளில் ரயில்வேயின் உள் கட்டமைப்பிலும் தூய்மையிலும் நிகழ்ந்துள்ள பாய்ச்சல் பிரமிக்கத்தக்கது. தற்போது ரயில்வே நிர்வாகம் ரயில் நடைமேடைகளையும் ரயில்வே துறையின் அசையா சொத்துக்களையும் மிகச் சிறப்பான ஆக சாத்தியமான வழிகளில் பயணிகள் உபயோகத்துக்குப் பயன்படுத்துகிறது. 

என்னிடம் ஒரு புதுமையான யோசனை உள்ளது. அந்த யோசனை பயணிகளுக்கும் பொதுமக்களுக்கும் சிறந்த முறையில் உபயோகமானது . அதாவது , ரயில் நிலையங்களில் ‘’ரயில் புத்தக வங்கி’’ என்னும் அமைப்பொன்றை உருவாக்க வேண்டும். ரயில் புத்தக வங்கி ரயில் நடைமேடைகளில் அமைவது சிறப்பு. ரயில் பயணிகள் எந்த ரயில் நிலையத்திலும் புத்தகத்தின் விலையைக் கொடுத்து நூலை வாங்கிக் கொள்ள வேண்டும். ரயில் பயணத்தில் அதனைப் படித்து விட்டு எந்த ரயில் நிலையத்தில் இறங்கிக் கொள்கிறார்களோ அங்கே அந்த நூலை அங்கேயிருக்கும் ரயில் புத்தக வங்கியில் கொடுத்து விட்டு நூலுக்கான தொகையைப் பெற்றுக் கொள்ளலாம். அந்தப் புத்தகத்தை சொந்தமாக்கிக் கொள்ள விரும்பினால் தங்கள் வசமே வைத்துக் கொள்ளலாம். 

தற்போது மானுட குலம் ‘’ஸ்மார்ட்ஃபோன்’’ அடிமைத்தனத்துக்கு உள்ளாகியிருக்கிறது. அறிவார்ந்த சமூகங்கள் தன் குடிகளை எவ்விதம் ஸ்மார்ட்ஃபோன் அடிமைத்தனத்திலிருந்து மீட்பது என்பது குறித்து சிந்திக்கின்றன. நாகரிக சமூகங்கள் இந்த சிக்கலை எதிர்கொள்ள புத்தக வாசிப்பை முன்வைக்கின்றன. இந்திய ரயில்வே ரயில் புத்தக வங்கி திட்டத்தைச் செயல்படுத்தினால் உலகின் பிற ரயில்வேக்களும் இந்திய ரயில்வேயின் இந்த செயல்முறையை பின்பற்ற முனையும். 

சாமானிய பொதுமக்கள் ‘’ஸ்மார்ட்ஃபோன் அடிமைத்தனத்துக்கு’’ ஆட்பட்டிருக்கும் இன்றைய சூழலில் ரயில் புத்தக வங்கி வெற்றிகரமாக இயங்குமா என்னும் ஐயம் எழுவது இயல்பானது. அவநம்பிக்கையாளர்களால் இத்தகைய ஐயம் எழுப்பப்படும். ஓரிடத்தில் இருள் இருந்தால் தீபம் ஏற்ற வேண்டும் ; ஓரிடத்தில் பெரும் இருள் இருந்தால் அப்போதும் தீபம் ஏற்ற வேண்டும் என்பதே தீர்வு. இருள் ஒளியால் நிரப்பப்படும் ; இருள் இருளால் நிரப்பப்படுவதில்லை. 

ரயில் புத்தக வங்கி யோசனையை பரிசீலிக்குமாறும் சிந்திக்குமாறும் ஆய்வு செய்யுமாறும் கேட்டுக் கொள்கிறேன். ரயில் புத்தக வங்கி யோசனையை செயல்படுத்துமாறு கேட்டுக் கொள்கிறேன். 

தங்கள் உண்மையுள்ள

****

இடம் : மயிலாடுதுறை

நாள் : 29.10.2026

மென்முறுவல்

செவ்விலக்கியங்கள் நாம் எதிர்பாராத வகையில் திறந்து கொள்பவையும் கூட. அவ்விதம் திறக்கும் போது செவ்வியல் படைப்பாளிகளின் ஞானம் நம்மை புன்னகை கொள்ளச் செய்யும். அந்தப் பிரதியில் நகைச்சுவைக்கான உப பிரதியையும் செவ்வியல் படைப்பாளி வைத்திருந்தானா என எண்ண எண்ண மேலும் புன்னகைப்போம்.  

என் மனதில் அவ்வப்போது ஏதேனும் செவ்வியல் படைப்பின் வரிகள் ஓடிக் கொண்டிருக்கும். சென்ற வாரம் ‘’விதியின் பிழை’’ என்ற கம்பராமாயண வரி. 

இன்று ஒரு திருக்குறள் மனதில் தோன்றியது. 

இருவேறு உலகத்து இயற்கை திருவேறு

தெள்ளிய ராதல் வேறு. 

என்னும் குறள். 

இந்தக் குறளுக்கு நான் இதுநாள் வரை எண்ணியிருந்த அர்த்தம் ‘’ஒருவன் அறிவுபடைத்தவானாக இருப்பது என்பது வேறு. செல்வம் உடையவனாக இருப்பது என்பது வேறு’’ என்பது தான். அது சரியானதும் கூட. 

படைப்பின் வரிகள் உலகியல் தளத்தில் எவ்விதம் அர்த்தமாகின்றன என்பதைக் கண்டவாறு இருப்பது அந்த வரிகளை மேலும் புரிந்து கொள்ள உதவிகரமானது. 

மேலே உள்ள குறளுக்கு நான் புரிந்து கொண்ட அர்த்தம் அறிவுடையவன் ஒருவன் செல்வம் சேர்க்க முயல்கிறான் என்றால் அவன் அறிவுடையவன் என்பதே அவனுக்கு செல்வம் சேர நிபந்தனை ஆகி விடாது. அறிவுடையவனாயிருத்தல் என்பது வேறு. செல்வம் சேர்த்தல் என்பது வேறு. இவை இரண்டும் இரு வேறு வேறு பகுதிகள். 

உண்மைதான். அறிவுடையவனாயிருத்தல் ‘’சிருஷ்டி’’ - படைப்பூக்கம் என்னும் நிலையைச் சேர்ந்தது. செல்வம் சேர்த்தல் என்பது ‘’ஸ்திதி’’ - நிலைப்படுத்துதல் என்னும் நிலையைச் சேர்ந்தது. 

சிருஷ்டிகரம் - படைப்பூக்கம் என்பது அகத்தில் ஒன்றிலிருந்து பத்து = பத்திலிருந்து நூறு - நூறிலிருந்து ஆயிரம் எனப் பெருகுவது . அதாவது பாய்ச்சலை நிகழ்த்துவது. 

ஸ்திதி - நிலைப்படுத்துதல் என்பது ஒரு விஷயத்தை மிகச் சுருக்கமாக சிறு அசைவு கூட இல்லாமல் அப்படியே வைத்துக் கொள்வது. செல்வம் சேர இந்த ‘’ஸ்திதி’’ என்னும் தன்மை தேவை. கடைக்காரர்கள் ஒரே இடத்தில் அமர்ந்தவாறு கடையைக் கவனிப்பதை இதற்கு உதாரணமாகக் கூறுவார்கள். கடைக்காரர்கள் காலை 9 மணியிலிருந்து இரவு 9 மணி வரை கல்லாவிலேயே இருப்பார்கள். உணவு கூட வீட்டுக்குச் செல்லாமல் கடைக்கு கொண்டு வந்து அருந்துவார்கள். கடைக்கு விடுமுறை கொடுக்க மாட்டார்கள். மங்கள நிகழ்வுகளுக்கு வீட்டில் இருப்பவர்களையே அனுப்புவார்கள் ; தாங்கள் கடையிலேயே இருப்பார்கள். இந்த தன்மை இருப்பதால் - இந்த நிலைப்படுத்தல் - இருப்பதால் செல்வம் அவர்களிடம் நிலையாக இருக்கிறது அல்லது அவர்களிடம் செல்வம் இருக்க அது ஒரு பிரதான காரணம். 

என் உலகியல் அனுபவத்திலிருந்து நான் இவ்விதம் அர்த்தப்படுத்திக் கொண்டேன். 

இன்று எனக்கு அந்தக் குறளின் இன்னொரு அம்சம் புலப்பட்டது. 

ஒரு வணிகர் இருக்கிறார். ஊரின் பெரிய வணிகர். நிறைய வணிகங்கள் அவருக்கு இருக்கின்றன. நிறைய செல்வம் இருக்கிறது. 

அவர் மனம் உறைந்து - நிலைப்பட்டு - இருக்கும். அவர் மனத்தைப் படைப்பூக்கம் கொண்டு எழச் செய்ய முடியுமா - படைப்பூக்கம் கொண்டு பாயச் செய்ய முடியுமா - என எண்ணினேன். அதை எண்ண எண்ண நாள் முழுதும் புன்னகைத்துக் கொண்டேயிருந்தேன். 

படைப்பூக்கம் ஒரு கடைக்காரருக்கு நிகழுமா? ஒரு மலரைக் கண்டு நிலவை - ஒரு பறவையக் கண்டு விண்மீனை - கார்மேகம் கண்டு நதியை - மழையைக் கண்டு ஒளியை அவர் அடுத்தடுத்து கற்பனை செய்து கொள்ள சாத்தியம் உண்டா? 

இப்போது மீண்டும் அந்தத் திருக்குறளை எண்ணிப் பார்த்தேன். 

இருவேறு உலகத்து இயற்கை திருவேறு

தெள்ளிய ராதல் வேறு. 

திருவள்ளுவர் அந்தக் கடைக்காரரிடம் சொல்லியிருப்பார். ‘’தம்பி ! செல்வம் சேர்ப்பது என்பது வேறு. படைப்பூக்கம் என்பது வேறு’’ என. 

திருவள்ளுவர் ஊழ் குறித்துப் பேசும் போதும் சமநிலையுடனே இருக்கிறார். 

வீர சுதந்திரம் வேண்டி நின்றார்

 

நூல் : சுதந்திரப் போராட்டத்தில் தமிழக பிராமணர்கள் ஆசிரியர் : ஆரியத்தமிழன் பக்கம் : 140 விலை : ரூ.140 பதிப்பகம் : பாரதி நூலகம், 1/87, அக்ரஹாரம், தேப்பெருமாநல்லூர் (அஞ்சல்), கும்பகோணம் (வழி)- 612204

நாடு சுதந்திரம் பெற்று 80 ஆண்டுகள் ஆகி விட்டது. சுதந்திரத்துக்குப் பின் ஐந்து தலைமுறை கடந்து ஆறாவது தலைமுறை இப்போது வாழ்ந்து கொண்டிருக்கிறது. நமது நாட்டின் சமூகங்கள் கல்வியறிவு பெற்றிருக்கின்றன. நமது நாட்டின் சமூகங்கள் இப்போது வறுமையையும் பசியையும் வென்றிருக்கின்றன. நாம் இப்போது உலகத்தரத்திலான உள் கட்டமைப்பு வசதிகளை ஏற்படுத்திக் கொண்டு இருக்கிறோம். நாம் சந்திரனில் உலகில் இது வரை எவரும் செல்லாத இடத்தில் நம் தடங்களைப் பதித்திருக்கிறோம். 

100 ஆண்டுகளுக்கு முன்னால் 150 ஆண்டுகளுக்கு முன்னால் நம்மை நம் நாட்டை அன்னிய பிரிட்டிஷ் ஆட்சி சுரண்டியது. நம் மக்கள் மீது பசியையும் பஞ்சத்தையும் திணித்தது. அன்று பிரிட்டிஷ் சாம்ராஜ்யம் உலகின் மிகப் பெரிய வல்லாதிக்க சக்தி. இருப்பினும் அதனை இந்நாட்டின் சாமானியர்கள் எதிர்க்க முற்பட்டார்கள். உலகின் அத்தனை பெரிய பொருளியல் வல்லமை முன் ராணுவ வல்லமை முன் அந்த சாமானியர்கள் அளவிலும் பலத்திலும் மிகச் சிறியவர்கள். அத்தனை சிறிய வாமனர்களை அவர்களின் தேசபக்தி விஸ்வரூபம் கொள்ளச் செய்தது. 

’’சுதந்திரப் போராட்டத்தில் தமிழக பிராமணர்கள்’’ என்னும் இந்நூல் தமிழகத்தைச் சேர்ந்த பல சுதந்திரப் போராட்ட வீரர்களின் சரித்திரத்தை சுருக்கமாக எடுத்துரைக்கிறது. இந்நூலில் குறிப்பிடப்பட்டிருக்கும் வீரர்கள் பல விதமானவர்கள். காந்தியின் அஹிம்சைப் போராட்டத்தை ஏற்று ஊர் ஊராகச் சென்று சுதேசி துணியான கதராடை வாங்கிச் சொல்லி பிரசாரம் செய்தவர்கள், சட்டசபை உறுப்பினர்களாக இருந்து மக்கள் நலனுக்காக பங்களிப்பாற்றியவர்கள், நாட்டின் பெரிய பொறுப்புகளை வகித்தவர்கள், பட்டியல் ஜாதியினர் நல்வாழ்வுக்காக மகத்தான பணிகளைச் செய்தவர்கள், பொதுவுடமை இயக்கத்தில் பங்களிப்பாற்றியவர்கள், சுபாஷ் பாபுவின் தலைமையை ஏற்றவர்கள் என பல விதமான வீரர்களின் வாழ்வை சுருக்கமாக இந்நூல் முன்வைக்கிறது. 

இத்தகைய மகத்தான மனிதர்களின் தியாகத்தால் இன்று நாம் சுதந்திரமாக நம் மண்ணில் வாழ்ந்து கொண்டிருக்கிறோம். நாம் சுதந்திரமாக வாழ தங்கள் வாழ்வை அர்ப்பணித்த தியாகிகள் அவர்கள். அவர்கள் வாழ்வை எண்ணிப் பார்ப்பதன் மூலம் நாம் நம் வாழ்வென்பது முன்னோர்களின் தியாகமே என்பதை மீண்டும் ஒருமுறை உணர்கிறோம். 

நன்நிமித்தம்

 

சென்ற வாரம் ‘’1000 பெண்கள் - 1000 பசுக்கள்’’ முயற்சி குறித்து 3 வங்கி மேலாளர்களுக்கு கடிதம் எழுதியிருந்தேன். அக்கடிதத்தின் நகலை 3 வங்கிகளின் தலைமை அலுவகத்துக்கும் அனுப்பியிருந்தேன். மேலும் மாவட்ட ஆட்சியர் , வருவாய் கோட்டாட்சியருக்கும் அனுப்பி வைத்திருந்தேன். அது ஒரு காந்திய வழிமுறை. நாம் என்ன செய்ய விரும்புகிறோம் என்பதை முன்கூட்டியே தெரிவிக்கும் போது அந்த விஷயம் குறித்து ஒரு விவாதம் உருவாகும். நாம் எதிர்பார்த்திராத உத்தேசித்திராத அம்சங்கள் நமக்கு சுட்டிக் காட்டப்படலாம். நமது செயல்முறையை வடிவமைத்துக் கொள்ள அது பெரிய அளவில் உதவும். இன்று 3 மேலாளர்களையும் சந்தித்து அறிமுகப்படுத்திக் கொண்டேன். தொடர்ந்து சந்திக்கிறேன் எனக் கூறி அடுத்தடுத்த நிகழ்வுகளை விளக்குவதாகக் கூறினேன். 

வங்கிகளுக்கு செல்லும் போது வழியில் 1000 மலைமாடுகளைக் கொண்ட ஒரு மாட்டு மந்தையைக் கண்டேன். சாலையில் இடையர்கள் அந்த மந்தையை வழிநடத்திக் கொண்டு சென்று கொண்டிருந்தனர். வயல்களில் மாட்டுக் கிடைக்காகச் செல்கின்றன. மாட்டுக் கிடை என்பது விவசாயிகள் மாட்டு மந்தையை தங்கள் விளைநிலத்தில் தங்க வைப்பர். அங்கிருக்கும் புல்லைத் தின்று அந்த வயலில் மாடுகள் சாணம் இடும். மாட்டுச் சாணம் சிறப்பான உரம் என்பதால் வயலுக்கு விவசாய வேலைக்கு பயிர் வளர்ச்சிக்கு அது சிறப்பாக உதவும். ‘’1000 பெண்கள் - 1000 மாடுகள்’’ விஷயமாக வங்கி மேலாளர்களைக் காணச் செல்கையில் 1000 மலைமாடுகளைக் கண்டதை நன்நிமித்தமாகக் கருதினேன். 

1000 பெண்கள் - 1000 பசுக்கள் - கிராமத்தில் எவை நிகழும்?

சிட்டுக்குருவிகளுக்கு வல்லூறை எதிர்க்கும் ஆற்றலைத் தருகிறேன். 

- குரு கோவிந்த் சிங்

நாம் சிந்தித்திருக்கும் ’’1000 பெண்கள் - 1000 பசுக்கள்’’ தற்போது துவக்க நிலையில் இருக்கிறது. நம் திட்டமிடல் வெற்றி பெற சாத்தியக்கூறுகள் மிக அதிகம். ஏனெனில் இதன் லாபவிகிதம் முதல் மூன்று ஆண்டுகளுக்கு 33 சதவீதம். நான்காம் ஆண்டிலிருந்து லாபவிகிதம் 100 சதவீதம். ஒரு தொழில் 33 சதவீத லாபத்துடன் இயங்குகிறது என்பது மிகச் சிறப்பானது என்பதை லௌகிகம் அறிந்த எவரும் எளிதில் உணர்வார்கள். ஒரு தொழில் 100 சதவீத லாபத்துடன் இயங்கினால் அதன் மதிப்பை எவரும் உணர்வார்கள். பெரும் தொகை ஒரு சிறிய கிராமத்தில் முதலீடு செய்யப்படுவதால் அதன் பெரும் லாபத்திலிருந்து ஒரு சிறு பங்கை அக்கிராம வளர்ச்சிக்குப் பயன்படுத்த முடியும். அவ்விதம் அந்த கிராமத்தில் என்னென்ன செய்ய வேண்டும் என்பதைப் பட்டியலிடுகிறேன். 

(1) 1000 பசுக்களின் சாலையின் ஒரு பகுதியாக ஒரு வேத பாடசாலை இயங்கும். அங்கே வேதியர்கள் 7 பேர் நாள் முழுதும் வேதம் ஓதிக் கொண்டு இருப்பார்கள். நித்ய வேத பாராயணம் நிகழ்ந்து கொண்டிருக்கும். வேதம் பயிலும் மாணாக்கர்கள் 20 லிருந்து 30 பேர் அங்கே வேதம் பயில்வார்கள். அவர்கள் குடும்பத்துக்கு மாதாமாதம் ஒரு கணிசமான தொகை அனுப்பி வைக்கப்படும். வேதம் பயிலும் மாணவர்களுக்கு வேதக்கல்வியுடன் பல்வேறு மொழிகளில் நிபுணத்துவம் அளிக்கும் கல்வியும் பிற அடிப்படைக் கல்விகளும் அளிக்கப்படும். 

(2) 1000 பசுக்களின் சாலையின் ஒரு பகுதியாக தினமும் கணபதி ஹோமம், அக்னி ஹோத்ரம் ஆகிய வேள்விகள் நிகழும். 

(3) ஓதுவார்கள் மூலம் தேவாரம் நாள் முழுதும் ஓதப்படும். தேவாரம் மாணவர்களுக்குப் பயிற்றுவிக்கப்படும். தேவாரம் பயிலும் மாணாக்கரின் குடும்பத்துக்கு மாதாமாதம் கணிசமான தொகை அனுப்பி வைக்கப்படும்.

(4) ஸ்ரீநாலாயிர திவ்யப் பிரபந்தம் நாள் முழுதும் ஓதப்படும். ஸ்ரீநாலாயிர திவ்யப் பிரபந்தம் மாணவர்களுக்குப் பயிற்றுவிக்கப்படும். பிரபந்தம் பயிலும் மாணவர்களின் குடும்பத்துக்கு மாதாமாதம் கணிசமான தொகை அனுப்பி வைக்கப்படும். 

(5) 1000 பசுக்களின் சாலையின் ஒரு பகுதியாக ஆயுர்வேத மருத்துவமனையும் ஆயுர்வேத மருந்துகள் தயாரிக்கும் மையமும் இயங்கும். ஆயுர்வேத மருத்துவர்களுக்கும் பணியாளர்களுக்கும் சிறப்பான ஊதியம் வழங்கப் பெறும். 

(6) ஊரில் ஒரு அலோபதி மருத்துவமனை இயங்கும். 

(7) ஊரில் உள்ள குழந்தைகள் கால்பந்து, கை பந்து, வாலிபால், பேட்மிட்டன் ஆகிய விளையாட்டுகளை விளையாடுவதற்கு உலகத் தரமான விளையாட்டு மைதானங்கள் உருவாக்கப்படும். 

(8) களரி பயிற்சி மையம் உருவாக்கப்படும்.

(9) ஊர் மக்கள் பயன்படுத்தும் விதமான சிறப்பான உடற்பயிற்சிக் கூடம் உருவாக்கப்படும். 

(10) 1000 பசுக்களின் சாலையின் ஒரு பகுதியாக ஊரில் பல மொழிகள் பயில்வதற்கான கல்விச்சாலை நிறுவப்படும். தமிழ், சமஸ்கிருதம், ஹிந்தி, ஆங்கிலம், ஃபிரெஞ்ச், ஜெர்மன், ஜப்பானிஸ், சீனம், அரபி, லத்தீன், கிரீக், ஸ்பானிஷ் ஆகிய மொழிகள் தினமும் பயிற்றுவிக்கப்படும். 

(11) பல்வகை தொழில்நுட்பங்கள் குறித்த அடிப்படைக் கல்வி வழங்கப்படும். 

(12) அடிப்படை விவசாயக் கல்வி அனைவருக்கும் அளிக்கப்படும். 

(13) அடிப்படை சட்டக் கல்வி அனைவருக்கும் அளிக்கப்படும்.

(14) அனைவருக்கும் யோகக் கல்வி அளிக்கப்படும். யோகப் பயிற்சிகள் அனைவரும் செய்யும் விதமான கட்டமைப்பு உருவாக்கப்படும். 

(15) ஊர் முழுதும் ஆயிரக்கணக்கான மரங்கள் நடப்பட்டு அவை பராமரிக்கப்படும். 

(16) ஊரில் புதிய நீர்நிலைகள் உருவாக்கப்படும் ; ஊரின் நீர்நிலைகள் பராமரிக்கப்படும். 

***

‘’பெரிதினும் பெரிது கேள்’’ என்றான் நம் மூதாதை பாரதி. 

அதன் படி மகாசக்தியிடம் நாம் நம் கோரிக்கைகளை சமர்ப்பிப்போம்.  

ரூ.500 செலவில் சென்னை சென்று வருவது எப்படி? (நகைச்சுவைக் கட்டுரை)

அமைப்பாளர் மானசீகமாக தன்னை ஒரு சிறுவனாக எண்ணிக் கொண்டிருக்கிறார். அதனால் அவர் சிறுவனாக இருந்த போது விலைவாசி எப்படி இருந்ததோ அப்படியே இப்போதும் இருக்கும் என்னும் அறிவிக்கப்படாத நம்பிக்கை அவரிடம் இருக்கிறது. 

காலை 4.45க்கு திருச்செந்தூர் - சென்னை விரைவு வண்டி ஊர் வழியே செல்லும். காலையில் எழுந்து குளித்து முழுகிக் கிளம்ப அந்த ரயில் உகந்தது அல்ல. காலை 6 மணிக்கு விழுப்புரம் பாசஞ்சர் இருக்கிறது. அதில் சென்றால் விழுப்புரத்தில் 9.25க்கு பல்லவன் விரைவு ரயிலைப் பிடித்து விடலாம். 11.30 மணியளவில் சென்னை சென்றடையலாம். இவை அனைத்தையும் தாண்டி காலை 7.30க்கு திருச்சிராப்பள்ளி - தாம்பரம் இண்டர்சிட்டி விரைவு ரயில் இருக்கிறது. காலை உணவை முடித்து விட்டு வண்டி ஏறினால் மதிய உணவுக்கு சென்னை சென்று விடலாம். மதியம் 1.30 போல் சென்ற வேலையைப் பார்த்தால் இரவு ரயில் பிடித்து ஊர் திரும்பலாம். 

அமைப்பாளர் காலை 5 மணிக்கு அலாரம் வைத்திருந்தார். எனினும் 4.30க்கே விழிப்பு வந்து விட்டது. குளித்துத் தயாராகி ரூ.500 மட்டும் எடுத்துக் கொண்டு சென்னை கிளம்பினார். கூட சில்லறையாக ரூ.25 இருந்தது. 2 கிமீ தொலைவில் இருக்கும் பேருந்து நிலையம் நோக்கி நடக்கத் தொடங்கினார். கடைவீதி சென்றடைந்த போது காலை மணி 6.20. உணவகம் ஒன்றில் காலை உணவு தயாரா என்று கேட்டார். அப்போது அங்கே காஃபி மட்டுமே இருந்தது. இன்னும் 15 நிமிடம் ஆகும் என்றனர். 

உணவகங்கள் திறக்கும் நேரம் காலை 5 மணி என்றால் அப்போதே காலை உணவு என ஒரு சில உணவு வகைகளாவது தயாராக இருக்க வேண்டும். நெடுந்தூரம் செல்பவர்கள் காலை உணவு அருந்தி விட்டு தங்கள் பயணத்தைத் தொடங்குவார்கள் என்னும் புரிதல் உணவக உரிமையாளர்களுக்கு இருக்க வேண்டும். நெடுந்தூரத்திலிருந்து பயணித்து ஊர் வந்தடைபவர்கள் உணவருந்த நினைக்கலாம். அதற்காகவும் உணவகங்கள் தயாராக இருக்க வேண்டும். உணவகங்களில் காலை உணவு முழுமையாகத் தயாராக காலை 8 மணி ஆகி விடுகிறது. காலம் மாறி விட்டது என அமைப்பாளர் எண்ணினார். 

இன்னொரு உணவகம் சென்றார். உணவு தயாரா என்று கேட்டார். 5 நிமிடம் உட்காருங்கள் என்றனர். பொங்கல் என்றார் அமைப்பாளர். பொங்கல் மட்டும் தான் தயாரித்திருந்தனர். அமைப்பாளர் முதல் வாடிக்கையாளர் என்பதால் முதலில் கேசரி வைத்தனர். பின்னர் பொங்கல். பொங்கல் சில மணி நேரங்களுக்கு தாக்குப் பிடிக்கும். ஒரு காஃபி அருந்தினார். பில் தொகை ரூ.100. டிப்ஸ் ரூ.5 சேர்த்து ரூ.105 ஆகக் கொடுத்து விட்டு ரயிலைப் பிடிக்கக் கிளம்பினார். டவுன் பஸ் ஒன்றில் ஏறி ரயில் நிலையம் சென்றார். சென்னை எழும்பூருக்கு ஒரு டிக்கெட் எடுத்துக் கொண்டார். ரூ.130 ரயில் கட்டணம். அமைப்பாளர் கையில் இப்போது ரூ.270 இருக்கிறது. இதை வைத்துக் கொண்டு சென்னை சென்று திரும்ப வேண்டும். 

அமைப்பாளர் கையில் மிகக் குறைவாகப் பணம் வைத்துக் கொள்ள ஒரு காரணம் உண்டு. அது என்னவெனில் அவருடைய கட்டுமானத் தொழிலில் கட்டுமான இடத்தில் 30 லிருந்து 50 பணியாளர்கள் பணி புரிவார்கள். அமைப்பாளர் அனைவருக்கும் ஊதியத்தை அன்றன்றே வழங்கி விடுவார். என்றாலும் பணியாளர் எண்ணிக்கை அதிகம் என்பதால் தினம் ஒருவர் ஏதேனும் காரணத்தைக் கூறி ரூ.500 கொடுங்கள் ரூ.1000 கொடுங்கள் என்று கேட்பார்கள். ஒருவருக்குக் கொடுத்தால் அதையே முன்னுதாரணமாகக் காட்டி அனைவரும் கேட்பார்கள். அதைத் தவிர்க்க அமைபாளர் மேற்கொள்ளும் வழி கட்டுமான இடத்துக்கு காலை செல்லும் போது கையில் பணமே இல்லாமல் வெறும் கையுடன் செல்வார். யாராவது பணம் கேட்டால் இன்று என் கையில் எந்த பணமும் இல்லை ; சாயந்திரம் சம்பளம் கொடுக்கவே ஏற்பாடு செய்ய வேண்டும் என்று கூறுவார். கையில் பணம் இல்லாமல் அதனைக் கூறுவதால் உள்ளதைச் சொல்வதன் சாதகங்கள் அமைப்பாளருக்குக் கிட்டும். கையில் பண இருப்பு இல்லாத ஒருவரிடம் யாரும் பணம் கேட்டு மேலும் வற்புறுத்த மாட்டார்கள். அமைப்பாளர் மட்டுமல்ல கட்டுமானத் தொழில் புரியும் அனைவருமே இந்த உபாயத்தைக் கைகொள்வார்கள். இந்த வழகத்தின் படி எங்கு சென்றாலும் கையில் பணமே இல்லாமல் செல்வது அல்லது குறைவான தொகை கையில் வைத்துக் கொள்வது என்பதைச் செய்கிறார் அமைப்பாளர்.

சென்னை சென்றடைய மதியம் 1 மணி ஆகி விட்டது. வழியில் இரு தேனீர் கொஞ்சம் சுண்டல் வாங்கி சாப்பிட்டார். சென்னையில் ஒரு உணவகத்தில் திருப்தியாக லெமன் சாதம் அருந்தி விட்டு நண்பருக்கு ஃபோன் செய்தார் அமைப்பாளர். நண்பர் வந்து தனது காரில் பிக் அப் செய்து கொண்டார். பார்க்க உத்தேசித்திருந்த வேலையை இருவரும் சேர்ந்து பார்த்தனர். மாலை 5 மணிக்கு இருவரும் காரில் ஊருக்குப் புறப்பட்டனர். 8 மணிக்கு புதுச்சேரி வந்தடைந்தனர். நண்பரின் வாகனம் இ வி கார். அங்கே 30 நிமிடம் கார் எலெக்ட்ரிக் சார்ஜ் செய்யப்பட்டது. அந்த நேரத்தில் இருவரும் இரவு உணவு அருந்தினர். உணவுக்கான தொகையை அமைப்பாளர் கொடுத்த பின்னும் அவர் கையில் ரூ.50 மீதி இருந்தது. 

நள்ளிரவு 11.30க்கு நண்பர் அமைப்பாளரை வீட்டுல் கொண்டு வந்து விட்டு விட்டு சென்றார்.  

சி பி ஜி - சென்னை ஐ ஐ டி

2003ம் ஆண்டு பொறியியல் கல்வி நிறைவு பெற்ற வேளையில் புதுதில்லி ஜவஹர்லால் நேரு பல்கலைக்கழகத்தில் எம். ஏ (அரசியல் விஞ்ஞானம்), எம்.ஏ (சமூகவியல்) படிப்புகளில் சேர விண்ணப்பத்திருந்தேன். அது தொடர்பாக ஒரு நுழைவுத் தேர்வு எழுத வேண்டியிருந்தது. நாடெங்கும் பல இடங்களில் நுழைவுத்தேர்வை நடத்தியது புதுதில்லி ஜவஹர்லால் நேரு பல்கலைக்கழகம். அவ்விதம் தேர்வு நிகழ்ந்த இடங்களில் சென்னை ஐ ஐ டி யின் கேந்திரிய வித்யாலயா பள்ளி வளாகமும் ஒன்று. நான் அங்கே தேர்வு எழுதினேன். அடர்ந்த மரங்களுக்கு நடுவே அமைந்திருந்த ஐ ஐ டி வளாகம் மிகவும் மனதைக் கவர்ந்தது. 23 ஆண்டுகளுக்குப் பின் மீண்டும் இன்று ஐ ஐ டி வளாகத்தில் நுழைந்தேன்.  சென்னை ஐ ஐ டி யில் உள்ள மாணவர் விடுதியின் உணவுக் கழிவுகளைக் கொண்டு சி பி ஜி தயாரிக்கும் ஆலைக்கான பணிகள் நடைபெற்று வருகிறது. 1000 பெண்கள் - 1000 பசுக்கள் தொடர்பாக நேரடிக் கள அனுபவம் பெற இயங்கிக் கொண்டிருக்கும் சி பி ஜி ஆலையைப் பார்வையிடுவது என் புரிதலை அதிகரிக்கும் என்பதால் இன்று நேரில் சென்று பார்த்து வந்தேன். முக்கியமான அனுபவமாக இருந்தது. 

விவசாய நண்பருக்கு ஒரு கடிதம் - வாசகர் கடிதம்

 இது அருமையான முயற்சி அண்ணா

நான் சின்ன பிள்ளையாக இருந்தபோது எங்கள் வீட்டில் மாடுகளும், பயோ கேஸ் பிளாண்ட்டும் இருந்தது.

கிராம அளவில் செய்ய கூடிய விஷயம் தான் - மக்கள் மனம் திறந்து முன் வரனும்.

 வாழ்துக்கள் அண்ணா

 நன்றி

அன்புடன்,

ரா.வெ.ராமன்

 

அன்பு நண்பருக்கு,

 

தாங்கள் பதிவை வாசித்ததும் அதற்கு பதிலளித்ததும் மகிழ்ச்சி அளித்தது.

 

முன்னர் கோபர் கேஸ் என இருந்ததற்கும் தற்போது சிபிஜி எனக் கூறப்படும் பயோ கேஸுக்கும் முக்கியமான வேற்றுமைகள் உள்ளன.

 

முன்னர் சாணம் மட்டுமே இட முடியும். தற்போது சாணத்துடன் கணிசமான அளவு தாவரப் பொருட்களும் இடப்பட வேண்டும். முன்னர் சாண எரிவாயு குறைவாகவே உற்பத்தி ஆகும். தற்போது மீத்தேன் மிகப் பெரிய அளவில் உற்பத்தி ஆகும்.

 

அப்போது எரிவாயுவைப் பயன்படுத்தி கார், ஆட்டோ, சரக்கு வாகனங்கள் இயக்கும் தொழில்நுட்பம் கிடையாது. அந்தத் தொழில்நுட்பம் கடந்த 15 ஆண்டுகளில் உருவாகி நிலைபெற்றிருப்பது. இப்போது நாம் சி பி ஜி பயன்படுத்தி பேருந்து, கார் , டிரக் ஆகியவற்றை இயக்க முடியும்.

 

இந்த விஷயங்களுடன் சேர்த்து சி பி ஜி குறித்து சிந்திப்பது முழுமையான வாய்ப்புகளை உணரச் செய்யும்

அன்புடன்

பி ம

 

புரிகிறது.. நன்றி

உங்க பதிவுகளை தொடர்ந்து படித்து வருகிறேன். 

ரா.வெ.ரா

விவசாய நண்பருக்கு ஒரு கடிதம்

அன்புள்ள நண்பருக்கு,

வணக்கம். நலமாக இருக்கிறீர்களா? வீட்டில் அனைவரும் நலம் தானே? முக்கியமான ஒரு விஷயம் குறித்து தங்களுக்கு அறிமுகப்படுத்த முக்கியமான அந்த விஷயம் குறித்து தாங்கள் சிந்திக்க பரிசீலிக்க இந்தக் கடிதத்தை எழுதுகிறேன். இந்த விஷயம் தனிநபராகிய தங்களுக்கும் தங்கள் குடும்பத்துக்கும் ஊருக்கும் நாட்டுக்குமே மிக முக்கியமான விஷயம் ஆகும்.  

உலக வரலாற்றில் கடந்த 100 ஆண்டுகளாகவே எரிபொருள் என்பது மனிதர்களின் மிக முக்கியமான மிக அத்தியாவசியமான தேவையாக இருக்கிறது. எந்த சமூகங்கள் எந்த நாடுகள் எரிபொருள் இருப்பைக் கொண்டிருக்கிறார்களோ அந்த நாடுகள் அந்த சமூகங்கள் பொருளியலில் பெரும் வளர்ச்சி அடைந்திருக்கின்றன என்பதை நாம் கடந்த 100 ஆண்டு உலக வரலாற்றைக் கூர்ந்து கவனித்தால் உணர முடியும். 

எரிபொருளின் ஒரு வடிவமான எரிவாயு இன்று உலகில் எல்லா வீடுகளுக்கும் சமையலுக்குப் பயன்படுத்தப்படும் அடிப்படைத் தேவையாக மாறி 40 ஆண்டுகளுக்கு மேலாகிறது. எரிவாயுவைக் கொண்டு மோட்டார் வாகனங்கள் இயக்க முடியும் என்னும் நிலை கடந்த 15 ஆண்டுகளில் நிலை கொண்டுள்ளது. எரிவாயு மூலம் மின்சாரமும் தயாரிக்கப்படுகிறது. இந்த தொழில்நுட்பங்களில் ஒரு முக்கிய முன்னேற்றமே சி பி ஜி எனப்படும் பயோ கேஸ் ஆகும். 

புல்லையும் சாணத்தையும் கலப்பதன் மூலம் உருவாகும் மீத்தேன் வாயுவைக் கொண்டு பயோ கேஸ் பெரிய அளவில் தயாரிக்க முடியும். இயற்கை எரிவாயுவும் பெட்ரோலியமும் பூமியில் நமக்குக் கிடைக்கும் அறிவியலின் இன்னொரு வடிவமே பயோ கேஸ் தொழில்நுட்பம் ஆகும். பல்லாயிரம் ஆண்டுகளுக்கு முன்பு பூமிக்கு அடியில் மக்கிப் போன வனங்களே பெட்ரோலியமாகவும் இயற்கை எரிவாயுவாகவும் நமக்குக் கிடைக்கிறது. தாவரங்களை சாணம் கொண்டு மக்கச் செய்து அதன் மூலம் மீத்தேன் வாயு தயாரிக்கும் தொழில்நுட்பமே பயோ கேஸ் ஆகும். 

விவசாயிகளுக்கு குறிப்பாக காவிரி வடிநில விவசாயிகளுக்கு இந்த பயோ கேஸ் மூலம் 3 விதமான பயன்கள் உண்டு. 

1. பயோ கேஸ் தயாரிக்க மாட்டுச் சாணம் அடிப்படை மூலப்பொருளாகும். எனவே மாடு வளர்ப்பும் மாடு பராமரித்தலும் இதனுடன் இணைந்தது. 

2. பயோ கேஸ் தயாரிக்க கணிசமான அளவில் புல் வளர்க்க வேண்டும். இந்தத் தீவனப்புல் மாட்டுக்கு உணவு என்ற விதத்தில் பயோ கேஸ் தயாரித்தலின் ஒரு பகுதியாக தீவனப்புல்லுக்கு நல்ல விலை கிடைக்கும். 

3. மாடுகளிலிருந்து கிடைக்கும் பால், தயிர், வெண்ணெய், நெய் ஆகியவை நல்ல விலைக்கு விற்பனை ஆகும். 

பயோ கேஸ் தேவை உலக அளவில் பெரிதாக இருப்பதால் பயோ கேஸுக்கு நல்ல விலை எப்போதும் கிடைக்கும். 

காவிரி வடிநிலத்தில் உள்ளவர்களுக்கு வழக்கமாக எழும் ஐயம் ஒன்று உண்டு. தீவனப்புல் அதிகம் வளர்த்தால் நெல் சாகுபடிப் பரப்பு குறைந்து விடாதா என்பது. ஒரு ஊரில் விவசாய நிலம் 1000 ஏக்கர் இருக்கிறது என்றால் அதில் 150 ஏக்கரில் தீவனப்புல் வளர்த்தாலே 1000 மாடுகளுக்கு ஆண்டு முழுவதும் புல் அளிக்க முடியும். இது மொத்த நிலத்தில் ஏழில் ஒரு பங்கு மட்டுமே ஆகும். இதனால் நெல் சாகுபடி பாதிக்கப்படாது. 

ஒரு கிராமத்தில் 1000 குடும்பங்கள் இருப்பார்களெனில் அவர்களை ஒரு கூட்டுறவு அமைப்பாக ஒருங்கிணைத்து கிராமத்தில் ஒரு பயோ கேஸ் உற்பத்தி மையம் அமைத்தால் தோராயமாக ஒவ்வொரு குடும்பமும் மாதம் ஒன்றுக்கு ரூ.3500 வருமானமாகப் பெறும். 

மத்திய அரசு ‘’கோபர் தன்’’ என்னும் திட்டம் மூலம் பயோ கேஸ் உற்பத்தி மையம் தொடங்க பெரும் நிதியுதவி அளிக்கிறது. வங்கிகள் பெரும் தொகையைக் கடனாக அளிக்கின்றன. 

ஒரு கிராமத்தில் 1000 பெண்களைக் கொண்ட கூட்டுறவு அமைப்பொன்றை உருவாக்கி அதன் மூலம் 1000 நாட்டு மாடுகளைப் பராமரித்து பால் பொருட்கள் உற்பத்தியும் பயோ கேஸ் உற்பத்தியும் செய்ய திட்டமிட்டுள்ளேன். முயற்சி செய்து வருகிறேன். அதன் ஒரு பகுதியாகவே இக்கடிதத்தை தங்களுக்கு எழுதுகிறேன். இந்த விஷயம் குறித்தும் இதனைப் போன்று தங்கள் கிராமத்தில் செயல்படுத்துவது குறித்தும் தாங்கள் சிந்திக்க பரிசீலிக்க வேண்டும் என்பது எனது விருப்பம். இந்த விஷயம் செயல்படுத்தப்படுவது தங்களுக்கும் தங்கள் குடும்பத்துக்கும் ஊருக்கும் நாட்டுக்கும் உலகுக்கும் நன்மை பயப்பது. 

இது குறித்து சிந்திக்குமாறும் பரிசீலிக்குமாறும் கேட்டுக் கொள்கிறேன். 

அன்புடன்,

இடம் : மயிலாடுதுறை

நாள் : 22.10.2026 

சமூகமும் அரசாங்கமும்

என்னிடம் எப்போதும் ஒரு கேள்வி கேட்கப்படுவதுண்டு. அதாவது, ‘’காவிரி போற்றுதும்’’ பல விஷயங்களைத் திட்டமிடுகிறது ; செயல்படுத்துகிறது. ஒரு நுண் அமைப்பு சிந்தித்ததை அரசாங்கம் சிந்திக்காமல் இருக்குமா? அரசாங்கம் ஒரு விஷயத்தை சிந்தித்தால் எளிதில் செய்து விடும் அல்லவா?

இந்தக் கேள்வி ஆழ்ந்து யோசித்து பரிசீலிக்க வேண்டிய ஒன்றே. இந்தக் கேள்விக்கு பல பதில்கள் உண்டு. என் அனுபவத்திலிருந்து எனக்குத் தெரிந்த பதிலை நான் கூறுகிறேன்.  

அரசாங்கம் என்பது பொதுமைப்படுத்தப்பட்ட ஒரு பெயர். அரசாங்கம் என்பதும் அரசாங்க மனநிலை என்பதும் ஒரே விதமானது அல்ல ; அவை பலவிதமானவை. 

நம் மாநிலத்தில் ( மாநிலத்தை ஏன் குறிப்பிடுகிறேன் என்றால் சாமானிய குடிமக்கள் காணும் மத்திய அரசாங்கம் என்பதும் அஞ்சல்துறையும் ரயில்வேயுமே. மாநில அரசாங்கத் துறைகளான வருவாய்த்துறை, வாகனப் போக்குவரத்து, நகராட்சி, ஊராட்சி, பத்திரப் பதிவுத் துறை ஆகியவற்றுடனே பொதுமக்களுக்கு அதிக தொடர்பு) மாநில அரசாங்க மாநில அரசாங்க ஊழியர் மனப்பான்மை என்பது தங்கள் உயர் அதிகார அமைப்புக்கு பணிந்து நடத்தல் என்பது மட்டுமே. உயர் அதிகார அமைப்பு எதிர்பார்க்கும் பணியை செய்து முடிக்க மாட்டார்கள். தலைமையிடம் பணிவாகப் பேசுவார்கள் ; பணிவாக நடந்து கொள்வார்கள். அவ்வளவே. குறிப்பிட்ட கால வரையறைக்குள் எந்த பணியையும் செய்யும் இயல்பு என்பது அவர்களுக்குக் கிடையாது. 

சமூகம் வளர வேண்டும் என நினைப்பவனுக்கு சமூகம் வளர வேண்டும் என பணி புரிப்வனுக்கு அத்தகைய வளர்ச்சி சமூகத்தின் அங்கத்தினர்களான பொதுமக்களால் மட்டுமே நிகழும் என்பதும் அரசாங்கம் மூலம் நிகழும் வளர்ச்சி என்பது மிக நுண்ணியது என்பதும் தெரியும். 

அரசாங்கம் சமூகத்துக்கு எதுவுமே செய்ததில்லையா? செய்திருக்கிறது. மருத்துவம் , கல்வி ஆகிய துறைகளில் பொதுமக்களுக்குப் பயன் தரும் விதத்தில் எவ்வளவோ விஷயங்களைச் செய்திருக்கிறது. எந்த ஜனநாயக அரசிடமும் எதிர்பார்க்கக் கூடிய விஷயமே அது. 

சமூக வளர்ச்சிக்கு அரசு 1 சதவீதம் துணை புரிகிறது எனக் கூறலாம். இந்த மதிப்பீடு கறாரானது என எண்ணினால் சமூக வளர்ச்சிக்கு அரசு 9 சதவீதம் துணை புரிகிறது என்று சொல்லலாம். இதில் முக்கிய விஷயம் என்னவென்றால் சமூக வளர்ச்சிக்கு பொதுமக்களே 90 லிருந்து 99 சதவீதம் வரை பங்களிப்பாற்ற வேண்டும் என்பதே. 

வாசகர்கள் இந்த விஷயம் குறித்து தங்கள் அபிப்ராயங்களை ulagelam(at)gmail(dot)com என்ற முகவரியில் தெரிவிக்கலாம். 

1000 பெண்கள் - 1000 பசுக்கள் (துண்டுப் பிரசுரம்)

உ

கணபதி துணை

***

வடவரையை மத்தாக்கி வாசுகியை நாணாக்கிக்

கடல்வண்ணன் பண்டொருநாள் கடல்வயிறு கலக்கினையே

கலக்கியகை அசோதையார் கடைகயிற்றாற் கட்டுண்கை

மலர்க்கமல உந்தியாய் மாயமோ மருட்கைத்தே

-சிலப்பதிகாரம் (ஆய்ச்சியர் குரவை)

***

வாழ்க அந்தணர் வானவர் ஆவினம்

வீழ்க தண்புனல் வேந்தனும் ஓங்குக

ஆழ்க தீயதெல் லாம்அரன் நாமமே

சூழ்க வையக முந்துயர் தீர்கவே. 

-திருஞானசம்பந்தர் தேவாரம்

***

கறவைகள் பின்சென்று கானம் சேர்ந்துண்போம்
அறிவொன்று மில்லாத ஆய்க்குலத்து உன்தன்னைப்
பிறவி பெறுந்தனைப் புண்ணியம் நாம்உடையோம்
குறைவொன்று மில்லாத கோவிந்தா உன்தன்னோடு
உறவேல் நமக்கு இங்கு ஒழிக்க ஒழியாது
அறியாத பிள்ளைகளோம் அன்பினால் உன்தன்னை
சிறுபேர் அழைத்தனவும் சீறி யருளாதே

இறைவாநீ தாராய் பறையேலோ ரெம்பாவாய். 

-திருப்பாவை (பாசுரம் 28)

***

"ஆவோடு நிகரான எவ்வுயிரும் ஒன்றென்று
அறிந்தேநல் லொழுக்கமுறவே"

-வடலூர் இராமலிங்க அடிகள்

மதிப்பு மிக்க விவசாயிகளே ! கிராம மக்களே!

நம் நாடு விவசாய நாடு. ஒட்டு மொத்த தேசத்துக்கும் நாட்டின் ஒவ்வொரு கிராமத்திலும் வாழும் ஒவ்வொரு விவசாயின் உழைப்பே உணவளிக்கிறது. விவசாயி தன் உழைப்பால் உருவாக்கும் உணவால் தான் உலகில் அறம் நிலைபெறுகிறது. எனவே தான் ‘’அன்னத்தைப் பெருக்குங்கள் ; அதனை விரதமாக மேற்கொள்ளுங்கள்’’ என தைத்ரீய உபநிஷத் அறைகூவுகிறது. தேசம் விவசாயிகளைச் சார்ந்திருக்கிறது என்பதை முழுமையாக உணர்ந்தே நமது முன்னாள் பிரதமர் லால்பகதூர் சாஸ்திரி ‘’ஜெய் ஜவான்! ஜெய் கிஸான்’’ என்ற முழக்கத்தை முன்னெடுத்தார். நாட்டின் எல்லையைக் காக்க இமைப் பொழுதும் சோராது நின்றிருக்கும் போர்வீரனின் பணிக்கு ஒப்பானது விவசாயியின் பணி என்பதை உலகம் உணரும் விதமாக அவர் ‘’ஜெய் ஜவான்! ஜெய் கிஸான்!’’ என முழங்கினார். 

நம் நாட்டு விவசாயிகளின் வாழ்வுடன் பின்னிப் பிணைந்தவை ஆவினங்கள். பசுவை நாம் அன்னையாகவே எண்ணுகிறோம் ; பசுவை நாம் அன்னையாகவே கருதுகிறோம் ; பசுவை நாம் அன்னையாகவே வணங்குகிறோம். பசுக்கள் பரிபாலிக்கப்படும் கோகுலத்தில் அன்னை யசோதைக்கு மகனாக விளங்கினான் நம் கடவுள் பகவான் ஸ்ரீகிருஷ்ணன்.நம் நாட்டின் விவசாயம் என்பது பல்லாயிரம் ஆண்டு காலமாக ஆவின வளர்ப்புடன் பிணைந்து இருப்பதே. 

நமது அன்றாட உணவில் பசுவின் பால் முக்கிய பங்கு வகிக்கிறது. பால் மட்டுமன்றி பசும்பாலிருந்து உருவாக்கப்படும் தயிர், மோர், வெண்ணெய், நெய் ஆகியவையும் நம் நாட்டு மக்களின் அன்றாட உணவில் தினமும் சேர்த்துக் கொள்ளப்படுகிறது. பசும்பாலிலிருந்து உருவாக்கப்படும் நெய் உலகெங்கும் உள்ள பல்வேறு நாடுகளின் பல்வேறு சமூகங்களின் மக்களால் உட்கொள்ளப்படுகிறது. 

நமது மரபு பசுவை நாம் கோரியதை அளிக்கும் காமதேனு என்கிறது. பசுக்களைப் பாதுகாத்தலை நம் மரபு நமக்கு கடமையாக அளிக்கிறது. 

நமது கிராமத்தில் நாம் அனைவரும் சேர்ந்து ஒரு முயற்சியை முன்னெடுக்க - மேற்கொள்ள இருக்கிறோம். நமது கிராமத்தின் மக்கள்தொகை தோராயமாக 4000 இருக்கக் கூடும். அதில் சரிபாதி எண்ணிக்கையில் (2000) பெண்கள் இருக்கிறார்கள். நம் கிராமத்தின் பெண்கள் அனைவரும் சேர்ந்து அல்லது நம் கிராமத்தின் 1000 பெண்கள் சேர்ந்து ஒரு கூட்டுறவு அமைப்பை உருவாக்க இருக்கிறோம். அந்த கூட்டுறவு அமைப்பின் மூலமாக நாம் உம்பளாச்சேரி, காங்கேயம், ஓங்கோல், கிர், தார்பார்க்கர், சாஹிவால் ஆகிய நாட்டு மாடுகளை வாங்க இருக்கிறோம். 1000 மாடுகள் ஒரு நாளைக்கு 5000 லிட்டர் பால் கறக்கும். நாம் பால் விற்பனை செய்யப் போவதில்லை. மாறாக நவீன உபகரணங்கள் மூலமாக பாலிலிருந்து நெய் தயாரிக்க உள்ளோம். நாம் மாதத்துக்கு 6000 கிலோ நெய் உற்பத்தி செய்ய முடியும். நாட்டு மாட்டின் நெய் வணிகச் சந்தையில் ஒரு கிலோ ரூ. 1000 என்று விலை போகிறது. நெய் விற்பனை மூலம் நம் கூட்டுறவு அமைப்பு மாதம் ரூ. 60,00,000 (ரூபாய் அறுபது லட்சம் ) பொருளீட்ட முடியும். மேலும் 1000 மாடுகளின் சாணத்தைக் கொண்டு நாம் இயற்கை எரிவாயு உற்பத்தி செய்ய உள்ளோம். அதன் மூலம் மாதம் ரூ.10,00,000 ( ரூபாய் பத்து லட்சம்) பொருளீட்ட முடியும். மாடுகள் வாங்கவும் நெய் உற்பத்தி மற்றும் இயற்கை எரிவாயு உற்பத்திக்கான அடிப்படைக் கட்டமைப்புகளை உருவாக்க வங்கிக் கடன் ஏற்பாடு செய்து கொள்ள உத்தேசம் உள்ளது. வங்கிக்கடனுக்கான மாதாந்திரக் கட்டணமாக நாம் மாதம் தோராயமாக ரூ6,00,000 செலுத்த வேண்டியிருக்கும். மாடுகள் பராமரிக்கவும் நெய் உற்பத்தி செய்யவும் நியமிக்கப்படவுள்ள பணியாளர் ஊதியமாகவும் மாடுகளுக்கான பசுந்தீவனம் வாங்கவும் ரூ.29,00,000 செலவிட நேரும். மீதித் தொகை ரூ. 35,00,000 கூட்டுறவு அமைப்பின் லாபமாகும். அதனை கூட்டுறவு அமைப்பின் உறுப்பினர்களான 1000 பெண்களும் ஒவ்வொரு மாதமும் நபர் ஒன்றுக்கு ரூ.3500 வீதம் பெற முடியும். சில ஆண்டுகளில் வங்கிக்கடன் முற்றிலும் செலுத்தப்பட்டு விட்டது எனில் ஒவ்வொரு நபருக்கும் மாதம் ரூ.7000 கிடைக்கும். மாடுகளின் எண்ணிக்கை 3 லிருந்து 4 ஆண்டுகளில் 2000 ஆக வளர்ந்திருக்கும். 

1000 மாடுகளுக்குத் தேவையான பசுந்தீவனத்தை நாம் சந்தை விலைக்கு வாங்குகிறோம். மாதம் ஒன்றுக்கு நாம் ரூ.25,00,000 மதிப்புக்கு பசுந்தீவனம் வாங்க இருப்பதால் அதனை நம் கிராமத்தின் விருப்பம் கொண்ட விவசாயிகளே உற்பத்தி செய்து தர முடியும். அதாவது நமது கூட்டுறவு அமைப்பின் உறுப்பினர்களான 1000 பெண்களின் குடும்பதினரே உற்பத்தி செய்து தரமுடியும். இதனால் நம் கிராமத்தில் மாதம் ரூ.25,00,000 அளவுக்கு பசுந்தீவனம் மூலமே பணப்புழக்கம் நிகழ்கிறது. மாடுகளைப் பராமரிக்கும் பணியிலும் நெய் உற்பத்திப் பணியிலும் கூட்டுறவு அமைப்பின் உறுப்பினர்களான 1000 பெண்களில் விருப்பமுடையவர்கள் பணியில் சேர்ந்து கொள்ளலாம். அவர்களுக்கு கூட்டுறவு அமைப்பே மாத ஊதியம் அளிக்கும். 

தற்போது கூறப்பட்டிருப்பது ஒரு ஆரம்ப நிலை சித்திரமே ஆகும். முழுமையான விரிவான சித்திரத்தை நாம் ஒன்று கூடி சிந்தித்து விவாதித்து உருவாக்குவோம். 

வான் முகில் வழாது பெய்க மலிவளம் சுரக்க மன்னன்

கோன் முறை அரசு செய்க குறைவு இலாது உயிர்கள் வாழ்க

நான் மறை அறங்கள் ஓங்க நல்தவம் வேள்வி மல்க

மேன்மை கொள் சைவ நீதி விளங்குக உலகம் எல்லாம்.

-கந்த புராணம்

நான் நேசிக்கும் இஸ்ரேல்

நான் சிறுவனாக இருந்த போது - 1990களில் - ‘’இந்தியா டுடே’’ இதழ் மூலமாகவே எனக்கு இஸ்ரேல் அறிமுகமானது. ஆகாஷ்வாணி செய்திகளில் இஸ்ரேலுக்கும் பாலஸ்தீன விடுதலை அமைப்புக்குமான மோதல் என்னும் செய்தி அடிக்கடி ஒலிக்கும். மேற்குக்கரை, காஸா ஆகிய பெயர்கள் செய்திகளில் கேட்கும்.  

இஸ்ரேல் குறித்து நான் கேள்விப்பட்ட ஒரு விஷயம் என்னை இஸ்ரேலுக்கு மிக நெருக்கமாக உணரச் செய்தது. அதாவது, இஸ்ரேல் தேசத்தின் குடிமக்கள் அனைவரும் தங்கள் தேசத்தின் எல்லையை ராணுவ வீரர்களாக மாறி ராணுவ வீரர்களுடன் உடனிருந்து நாட்டின் எல்லையைக் காக்கும் பணியை மேற்கொள்ள வேண்டும் என்னும் விஷயத்தை எவரோ சொல்லக் கேட்டு அறிந்ததிலிருந்து இஸ்ரேல் எனக்கு மிகவும் பிடித்துப் போனது. சிறுவர்கள் எப்போதும் ராணுவப் பணியை மகத்தான பணியாகக் கருதுவார்கள் ; எல்லா சிறுவர்களுக்கும் தாங்கள் ராணுவ வீரனாக வேண்டும் என்பதே அந்தரங்கக் கனவாக இருக்கும். ஆதலால் இஸ்ரேலின் அந்த வழக்கம் எனக்கு மிகவும் பிடித்திருந்தது. நம் நாட்டிலும் அந்த வழக்கம் இருந்தால் நானும் நம் நாட்டின் எல்லையில் நாட்டைக் காக்கும் பணியில் ஈடுபடலாமே என எண்ணினேன். 

1990களில் நிகழ்ந்த சம்பவம் ஒன்று என்னை இஸ்ரேலுக்கு மேலும் நெருக்கமாக்கியது. இஸ்ரேல் கல்லூரி மாணவர்கள் நம் நாட்டில் காஷ்மீருக்கு சுற்றுலாப் பயணிகளாக வந்திருக்கின்றனர். அவர்களை காஷ்மீரில் ஊடுறுவியிருந்த பாகிஸ்தான் பயங்கரவாதிகள் பிணைக் கைதிகளாக கடத்திச் சென்றனர். பாகிஸ்தான் பயங்கரவாதிகள் சிலரை சிறையிலிருந்து விடுவித்தால் மட்டுமே பிணைக் கைதிகளை விடுவிக்க முடியும் என மத்திய அரசை மிரட்டினர். இஸ்ரேலியர்கள் சிறை வைக்கப்பட்டிருந்த இடத்தில் காவலுக்கு இருந்த பயங்கரவாதிகள் தங்கள் இயந்திரத் துப்பாக்கிகளை இஸ்ரேலியர் முன் வைத்து விட்டு பக்கத்து அறைக்குச் சென்றிருக்கின்றனர். அந்த இஸ்ரேலிய கல்லூரி மாணவர்கள் இயந்திரத் துப்பாக்கியை எடுத்து இயக்கி அங்கிருந்த பயங்கரவாதிகளைக் கொன்று விட்டு அங்கிருந்து தப்பித்து வந்தனர். இஸ்ரேலில் எல்லா குடிமக்களுக்கும் அடிப்படை ராணுவப் பயிற்சியும் ஆயுதங்களை இயக்கும் பயிற்சியும் கட்டாயம் உண்டு. இந்த விஷயம் பாகிஸ்தான் பயங்கரவாதிகளின் கவனத்தில் இல்லை. 

இஸ்ரேலியர்கள் மிகுந்த தேசபக்தி கொண்டவர்கள் என்பதையும் இஸ்ரேலின் அரசியல் கட்சிகள் இஸ்ரேலின் நலனை எப்போதும் முதன்மையாகக் கொள்பவை என்பதும் என்னை இஸ்ரேல் மேல் மேலும் ஆர்வம் கொள்ளச் செய்தது. 

இஸ்ரேலின் அண்டை நாடுகள் ஏழு. அவை அத்தனையுமே இஸ்ரேலின் பகை நாடுகள். ஏழு அண்டை நாடுகள் பகை நாடுகளாக இருக்கையில் ஒரு தேசம் அதனை வெற்றிகரமாக எதிர்கொண்டு வெற்றிகரமாக இயங்குகிறது என்பது மகத்தான விஷயமே. 

இஸ்ரேலிய தேசம் ஒரு பாலைவன தேசம். ஆனால் இஸ்ரேலியர்கள் உலகுக்கே வழிகாட்டும் வகையிலான விவசாயத்தையும் நீர் மேலாண்மையையும் நடைமுறைப்படுத்தினர் என்பது அந்த தேசத்தை மேலும் நேசிக்கச் செய்தது. 

‘’இந்தியா டுடே’’வில் தான் ‘’மொஸார்ட்’’ என்னும் பெயரை வாசித்தேன். இஸ்ரேல் உளவு அமைப்பின் பெயர் அது. குட்டி நாடான இஸ்ரேலின் உளவு அமைப்பு எவ்விதம் சி ஐ ஏ , கே ஜி பி ஆகிய பெரிய நாடுகளின் உளவு அமைப்புகளை விட வலுவாக நுட்பமாக இருக்கிறது என்பது சிறுவனான எனக்கு பேராச்சர்யம் தந்தது. 

இஸ்லாமிய பயங்கரவாதம் உலக நாடுகள் பலவற்றுக்கு நிகழ்த்த இருந்த பல அழிவு வேலைகளை  உளவறிந்து அந்த நாடுகளுக்குக் கூறி அவை நிகழாமல் தடுப்பதில் ‘’மொஸார்ட்’’ மகத்தான பணியை ஆற்றுகிறது. 

இரண்டு ஆண்டுகளுக்கு முன்னால் இஸ்லாமிய பயங்கரவாதிகள் இஸ்ரேலின் அப்பாவி பொதுமக்களைத் தாக்கிக் கொன்ற போது உலகமே இஸ்ரேலுக்காக கண்ணீர் சிந்தியது ; துயர் கொண்டது. அவ்விதம் துயர் கொண்டவர்களில் நானும் ஒருவன். 

இஸ்ரேல் குறித்து விரிவாக வாசிக்க வேண்டும் என்பது நீண்ட நாள் விருப்பங்களில் ஒன்று. 

முழுமை

1000 நாட்டு மாடுகள் வளர்க்கப்படுகின்றன.

1000 நாட்டு மாடுகளுக்குத் தேவையான புல் வளர்க்கப்படுகிறது. 

பசு மாடுகள் பால் தருகின்றன. 

பாலிலிருந்து தயிர் உருவாக்கப்பட்டு அதிலிருந்து வெண்ணெய் எடுக்கப்பட்டு வெண்ணெய் உருக்கப்பட்டு நெய் தயாராகிறது. 

நெய் விற்பனை செய்யப்படுகிறது. 

மாட்டுச் சாணத்துடன் புல் கலக்கப்பட்டு மக்க வைக்கப்பட்டு அதிலிருந்து சி பி ஜி என்னும் பயோ கேஸ் தயாரிக்கப்படுகிறது. 

சி பி ஜி விற்பனை செய்யப்படுகிறது. 

சி பி ஜி உருவான பின் ஸ்லரி கிடைக்கிறது. 

ஸ்லரி காயவைக்கப்பட்டு ஸ்லரி விறகுகளாக ஆக்கப்படுகின்றன. 

ஸ்லரி விறகுகள் எரிக்கப்பட்டு மின்சாரம் தயாரிக்கப்படுகிறது.  

நீறும் நெருப்பும்

 காண இனியது நீறு கவினைத் தருவது நீறு

பேணி அணிபவர்க் கெல்லாம் பெருமை கொடுப்பது நீறு

மாணந் தகைவது நீறு மதியைத் தருவது நீறு

சேணந் தருவது நீறு திருஆல வாயான் திருநீறே.  

- திருநீற்றுப் பதிகம் (திருஞானசம்பந்தர்)

ஒரு பெரும்பணி திட்டமிடப்படுவதன் உற்சாகத்தில் இருக்கிறேன். 

ஒரு கிராமத்தின் ஒட்டுமொத்த மக்களையும் முழுமையாக ஒன்றிணைக்க வேண்டும். மக்களை ஒற்றுமைப்படுத்தும் முயற்சிக்கு இயற்கையின் மகாநியதி உளத்துணையாக இருக்கும் என்னும் நம்பிக்கை உறுதியாக இருக்கிறது. 

விரிவாக சிந்திக்க வேண்டும். 

சாத்தியமான எல்லா வழிகளையும் பரிசீலிக்க வேண்டும். 

நமது முயற்சி இயற்கையைப் பாதுகாக்கும் தன்மை கொண்டது என்பதால் எல்லா விதத்திலும் எல்லாருக்கும் நலம் பயப்பது. 

நாம் முன்னேறிச் செல்வோம்.  

புதிய முயற்சிகள்

விஜயதசமியில் தொடங்கப்படும் முயற்சிகள் முழு வெற்றியடையும் என்பது நம் நாட்டு மக்களின் நம்பிக்கை. 

இன்று இயற்கை எரிவாயு உற்பத்தி கேந்திரங்கள் சிலவற்றை நேரடியாகச் சென்று பார்வையிடலாம் என விரும்பி ஊருக்குப் பக்கத்தில் எங்கே இருக்கின்றன என இணையத்தில் தேடிப் பார்த்தேன். ஊரிலிருந்து 80 கி.மீ தொலைவில் இருந்தன. அலைபேசி மூலம் தொடர்பு கொண்டேன். வருகை புரிய உகந்த நாளையும் நேரத்தையும் ஓரிரு நாட்களில் தெரிவிப்பதாகக் கூறினார்கள். 

எனது நண்பர் ஒருவர் இயற்கை எரிவாயு உற்பத்தியில் முனைவர் பட்டம் பெற்றவர். அவரை நேரில் சந்தித்தேன். சென்னையில் உள்ள பல்கலைக்கழகம் ஒன்றில் இயற்கை எரிவாயு உற்பத்தி செய்யப்படுகிறது ; அங்கே சென்று பார்வையிடுவோம் எனக் கூறினார்.  

நண்பனின் கேள்வி

கான முயலெய்த அம்பினில் யானை

பிழைத்தவேல் ஏந்தல் இனிது

-திருக்குறள்

எனது நண்பன் என்னிடம் ஒரு கேள்வியை எழுப்பினான். ‘’அண்ணன்! உங்க கிட்ட 2 வருஷத்துக்கு ஒரு திட்டம் இருந்துட்டே இருக்கு. நீங்க உத்தேசிக்கிற எல்லா திட்டமும் தொடங்கிடுறீங்களா? தொடங்குற எல்லாம் நீங்க நினைக்கற படியே சக்ஸஸ் ஆகுதா?’’ எனக் கேட்டான்.  

பரிசீலிக்க வேண்டிய முக்கியமான கேள்வி தான். 

(1) கோவிட் பெருந்தொற்று காலத்தில் நம் நாடு கோவிட்டுக்கு தடுப்பு மருந்தைக் கண்டுபிடித்தது. நமது அரசாங்கம் cowin என்ற இணையதளம் மூலம் ஒவ்வொரு துளி தடுப்பு மருந்தும் நாட்டின் எந்தெந்த மருத்துவமனைகளில் எவ்வளவு இருக்கிறது என்பதையும் எத்தனை குடிமக்கள் எத்தனை முறை தடுப்பூசி போட்டிருக்கிறார்கள் என்பதையும் கணப்பொழுதில் அறியும் வகை செய்தது. நாம் உலகின் பல நாடுகளுக்கு ‘’ஆபரேஷன் மைத்ரி’’ மூலம் கோவிட் தடுப்பு மருந்து அளித்து பல தேச மக்களைக் காத்தோம். 

கோவிட் பெருந்தொற்று காலத்திலும் நம் நாட்டின் எதிர்க்கட்சிகள் அரசியல் செய்தன. அப்போது தமிழகத்தின் எதிர்க்கட்சி தலைவராயிருந்த அரசியல்வாதி கோவிட் தடுப்பு மருந்தை ஒரு தனியார் மருத்துவமனைக்குச் சென்று போட்டுக் கொண்டார். அது மக்களை திசை திருப்பும் செயல். அந்த அரசியல்வாதி நன்றாக அறிவார் ; தனியார் மருத்துவமனையிலும் அரசு அளிக்கும் தடுப்பு மருந்தே இடப்படுகிறது என. எனினும் மக்களை திசை திருப்ப தடுப்பூசியை தனியார் மருத்துவமனையில் இட்டுக் கொண்டார். ஒரு அரசியல் கட்சியின் தலைவர் ’’புதிதாகக் கண்டுபிடிக்கப்பட்ட தடுப்பு மருந்தை இட்டுக் கொள்ள குடிமக்கள் சோதனை எலிகளா?’’ என்று கேட்டார். 

சாமானியமாகவே ஒரு விஷயத்தைப் புரிந்து கொள்வதில் குழப்பம் அடையும் பொதுமக்கள் எதிர்க்கட்சித் தலைவர்களின் கோவிட் தடுப்பூசி குறித்த பேச்சுகளால் மிகவும் குழம்பினார்கள். கோவிட் தடுப்பூசி இடப்படுபவர்களுக்கு மாரடைப்பு ஏற்பட்டு மரணம் சம்பவிக்கிறது என்னும் வதந்தி பரவத் தொடங்கியது. அதனால் பொதுமக்கள் மேலும் குழம்பினர். 

இந்நிலையில் ‘’காவிரி போற்றுதும்’’ ஒரு கிராமத்தை எடுத்துக் கொண்டு அந்த கிராம மக்களிடம் கோவிட் தடுப்பூசி போட்டுக் கொள்ளுமாறு ஒவ்வொரு வீடாகச் சென்று சந்தித்துக் கூறியது. துண்டுப் பிரசுரம் வினியோகித்தது. ’’எட்வர்ட் ஜென்னர்’’ எவ்விதம் தடுப்பூசியைக் கண்டுபிடித்தார் என்பதையும் அது எவ்விதம் பெரியம்மையிலிருந்து உலகைக் காத்தது என்பதையும் கோவிட் தடுப்பூசி அதே போல் அவர்கள் குடும்பத்தைக் காக்கும் என்பதையும் ‘’காவிரி போற்றுதும்’’ எடுத்துக் கூறியது. 

கிராம மக்கள் ‘’காவிரி போற்றுதும்’’ தடுப்பூசி குறித்தும் எட்வர்ட் ஜென்னர் குறித்தும் உலகம் தடுப்பூசி மூலம் பல நோய்களிலிருந்து காக்கப்பட்டதையும் புரிந்து கொண்டார்கள். எனினும் அதனை விட அதிகமாக தங்கள் வீட்டு வாசலுக்கு வந்து தடுப்பூசி போட்டுக் கொள்ளுமாறு பணிந்து கேட்டுக் கொள்பவன் தங்கள் ந்லனுக்காக தங்கள் குடும்ப நலனுக்காகவே கேட்கிறான் என்பதை அவர்கள் ஒவ்வொருவரும் உணர்வுபூர்வமாக உணர்ந்தார்கள். அவர்கள் முதல் தடவை மட்டுமே சந்தித்திருந்த அப்போது மட்டுமே அறிமுகமாகியிருந்த எளியவன் ஒருவனின் சொற்களுக்கு செவி சாய்த்தனர். சில நாட்களில் அந்தக் கிராமம் மாவட்டத்திலேயே தடுப்பூசி போட்டுக் கொண்டதில் முதன்மை கிராமமாக மாறியது. அந்தக் கிராமத்தின் 95 சதவீத மக்கள் தடுப்பூசி போட்டுக் கொண்டனர். அந்த கிராமத்தின் ஊராட்சி மன்றத் தலைவருக்கு கோவிட் தடுப்பூசி இட்டுக் கொண்டதில் அந்தக் கிராமம் முன்னிலை பெற்றிருந்ததால் நாட்டின் சுதந்திர தினத்தன்று மாவட்ட ஆட்சித் தலைவரின் பரிசு கிடைத்தது. 

இதில் இன்னொரு விஷயமும் கவனிக்க வேண்டியது. தமிழகத்திலேயே மிகக் குறைவாக தடுப்பூசி போட்டுக் கொண்ட மாவட்டங்களில் மயிலாடுதுறையும் ஒன்று. இங்கே மாவட்ட சராசரி 60 சதவீதம். அதாவது மொத்த மாவட்ட மக்கள் தொகையில் 60 சதவீதம் மக்கள் மட்டுமே தடுப்பூசி போட்டுக் கொண்டனர். ‘’காவிரி போற்றுதும்’’ பரப்புரை செய்த கிராமத்தில் 95 சதவீதம் தடுப்பூசி போட்டுக் கொண்டனர் 

மக்கள் மனப்போக்கையும் மக்கள் தொடர்பு விதங்களின் சவால்களையும் முழுமையாக அறிந்தவர்களால் மட்டுமே ‘’காவிரி போற்றுதும்’’ ஒரு கிராமத்தின் 95 சதவீத மக்களுக்கு தடுப்பூசி போடச் செய்ததன் முக்கியத்துவத்தை உணர முடியும். 

(2) எந்த கிராமத்தில் முழுமையான தடுப்பூசி இடப்பட்டதோ அந்த கிராமத்தின் ஒவ்வொரு வீட்டுக்கும் ஒரு நந்தியாவட்டை கன்று தரப்பட்டது. வீட்டு வாசலில் நடுமாறு கேட்டுக் கொண்டோம். நம் நாட்டின் குடியரசு தினத்தன்று அந்த கிராமத்தில் உள்ள எல்லா வீடுகளும் காலை 7 மணிக்கு வீட்டு வாசலில் நந்தியாவட்டை மரக்கன்றுகளை நட்டனர். காலை மாலை வாசல் தெளித்து கோலமிடும் போது அந்த மரக்கன்றுக்கு கொஞ்சம் நீர் ஊற்றுங்கள் என்று கேட்டுக் கொண்டோம். அவ்விதமே மக்கள் செய்தனர். நந்தியாவட்டை இலைகளை ஆடு மாடுகள் மேய்வதில்லை . எனவே அந்த கிராமத்தின் ஒவ்வொரு வீட்டு வாசலிலும் இருக்கும் நந்தியாவட்டை கன்றுகள் சிறப்பாக வளர்ந்து தினமும் பூ பூக்கின்றன. 

(3) விவசாயத்தின் அடிப்படைகள் கூட அறிந்திராத தனது கிராமத்தில் தனது 3 ஏக்கர் நிலத்தை ஆண்டுக்கு ஒரு முறையோ இரு முறையோ தற்செயலாகச் சென்று பார்வையிடும் வழக்கம் கொண்டிருந்த ஐ டி நிறுவன ஊழியர் எனது ஆலோசனைப்படி 3 ஏக்கர் நிலத்தில் தேக்கு நட்டார். இன்று அவை மிகச் சிறப்பாக வளர்ந்திருக்கின்றன. மரம் நட்டு 4 ஆண்டுகள் ஆகிறது. இன்னும் 10 ஆண்டுகளில் அவருக்குத் தன் 3 ஏக்கர் நிலத்தில் இருக்கும் 1000 தேக்கு மரங்கள் மூலம் ரூ. 10 கோடி வருமானம் கிடைக்கும். விவசாயம் மூலம் கிடைத்த வருவாய் என்பதால் அந்தப் பணத்துக்கு வருமான வரி கிடையாது. முழுமையாக அதனை அஞ்சலக சேமிப்புக் கணக்கிலோ அல்லது அஞ்சலக சேமிப்புத் திட்டங்களிலோ முதலீடு செய்து கொள்ளலாம். 

(4) மேற்படி நண்பரின் முயற்சியைக் கண்ட அவர் நண்பர் ஒருவரும் உறவினர் ஒருவரும் தலா 2 ஏக்கர், 5 ஏக்கர் என்ற வீதத்தில் தேக்கு பயிரிட்டுள்ளனர். அவை சிறப்பாக வளர்ந்து வருகின்றன. 

(5) ’’காவிரி போற்றுதும்’’ தன் முதல் பணியாக எடுத்துக் கொண்ட ஒரு கிராமத்தின் வீடுகளுக்கு தேவைப்படும் முழுமையான மரக்கன்றுகளை வழங்கும் திட்டமும் வெற்றிகரமான ஒன்றே. 

ஒவ்வொரு பணியிலிருந்தும் நாம் ஒவ்வொரு விதமான அனுபவத்தைப் பெறுகிறோம். உதாரணத்துக்கு ‘’காவிரி போற்றுதும்’’ தன் முதல் பணிக்காகத் தேர்ந்தெடுத்த கிராமம் 25 கிலோ மீட்டர் தொலைவு கொண்டது. அங்கே நமக்குக் கிடைத்த அனுபவத்தின் மூலம் கோவிட் தடுப்பூசி பரப்புரையை ஊரிலிருந்து 2 கிலோ மீட்டர் தொலைவில் இருக்கும் கிராமத்தில் மேற்கொண்டோம். தொலைதூரத்திலிருந்த கிராமத்தில் வெற்றிகரமாகப் பணியாற்றியதால் 2 கிலோ மீட்டர் தொலைவில் இருக்கும் கிராமத்தில் பணி புரிவது மேலும் எளிதாக இருந்தது. ( இன்னும் சொல்லப் போனால் 2 கிலோ மீட்டர் தொலைவில் இருக்கும் கிராமத்தில் உழைப்பு பல மடங்கு அளிக்கப்பட்டது. 25 கிலோ மீட்டர் தொலைவில் உள்ள கிராமத்துக்கு தினம் ஒரு முறை சென்று 4 மணி நேரம் இருப்பேன் என்றால் 2 கிலோ மீட்டர் தொலைவில் உள்ள கிராமத்துக்கு தினமும் 3 முறை சென்று 8 மணி நேரத்திலிருந்து 10 மணி நேரம் இருக்க நேர்ந்தது)

(6) சில ஆண்டுகளுக்கு முன்னால் ‘’நீறு பூத்த நெருப்பு’’ திட்டமிடப்பட்டது. 

(7) தற்போது ‘’நீறு பூத்த நெருப்பு’’ இன்னொரு வடிவம் பெற்று ‘’1000 பெண்கள் - 1000 பசுக்கள் ‘’ உருவாகியிருக்கிறது. 

வங்கி மேலாளர்களுக்குக் கடிதம்

அனுப்புநர்

ர.பிரபு

*****

****

***

பெறுநர்

1.கிளை மேலாளர்

*** **** வங்கி

*******

2. கிளை மேலாளர்

***** வங்கி

*****

3. கிளை மேலாளர்

*** *** வங்கி

****

ஐயா,

பொருள் : மயிலாடுதுறை மாவட்டம், **** வட்டம், ***** கிராமத்தில் 1000 பெண்களை இணைத்து கூட்டுறவு அமைப்பொன்றை உருவாக்கி அவர்களுக்கு 1000 நாட்டுப் பசுமாடுகள் வாங்கிக் கொடுத்து நெய் உற்பத்தி, இயற்கை எரிவாயு உற்பத்தி, இயற்கை உரம் உற்பத்தி மற்றும் இவற்றின் விற்பனை மூலம் ***** கிராமத்துக்கும் ***** கிராமத்தின் பெண்களுக்கும் பொருளாதார வளர்ச்சியை உருவாக்குதல் - வங்கி ஆதரவைக் கோருதல் 

மயிலாடுதுறை மாவட்டம், **** வட்டம், ***** கிராமம் 4000 மக்கள்தொகை கொண்டது. அதில் சரிபாதி எண்ணிக்கையில் பெண்கள் இருக்கிறார்கள். அந்தக் கிராமத்தின் 1000 பெண்களை இணைத்து அவர்களுக்கு வங்கிக் கடன் மூலம் 1000 நாட்டு மாடுகள் வாங்கிக் கொடுத்து அதன் மூலம் நெய் உற்பத்தி, இயற்கை எரிவாயு உற்பத்தி , இயற்கை உரம் உற்பத்தி ஆகியவை செய்து அவற்றை விற்பனை செய்வதன் மூலம் அந்தக் கிராமத்தின் பெண்களின் பொருளாதார வளர்ச்சியை உருவாக்க ஒரு முயற்சி திட்டமிடப்படுகிறது. 

தற்போது இந்த விஷயம் கொள்கை அளவிலான விவாதத்தில் இருக்கிறது. மிக விரைவில் செயலாக்கம் பெறும். இந்த விஷயம் செயலாக்கம் பெற பலவிதமான ஆதரவு தேவைப்படுகிறது. அதில் வங்கிகளின் ஆதரவு என்பது மிக முக்கியமானது. ***** கிராமத்துக்கு அருகாமையில் இருக்கும் வங்கிகள் என்ற விதத்தில் தங்கள் வங்கியின் ஆதரவும் கோரப்படுகிறது. 

5 ஏக்கர் பரப்புள்ள இடத்தை வாடகைக்கு ஏற்பாடு செய்து கொண்டு அதில் மாட்டுக் கொட்டகை , இயற்கை எரிவாயு உற்பத்தி தளவாடங்கள், நெய் உற்பத்தி தளவாடங்கள் ஆகியவற்றை அமைத்துக் கொள்ள திட்டம். 1000 பெண்களுக்கு 1000 நாட்டு மாடுகள் வாங்கித் தரப்படும். 1000 பெண்களை இணைத்து உருவாக்கப்படும் கூட்டுறவு அமைப்பு 1000 மாடுகளை வாங்கிப் பராமரிக்கும். அமைப்பின் உறுப்பினர்களான 1000 பெண்களில் விருப்பம் தெரிவிப்பவர்கள் மாட்டுக் கொட்டகை பராமரிப்பு, எரிவாயு உற்பத்தி, நெய் உற்பத்தியில் ஈடுபட்டு அதற்கான ஊதியத்தைப் பெற்றுக் கொள்வார்க்ள். மாடுகளுக்குத் தேவையான பசுந்தீவனம் அந்தக் கிராமத்திலேயே உற்பத்தி செய்யப்பட்டு கூட்டுறவு அமைப்புக்கு விற்பனை செய்யப்படும். 

துவக்க நிலைக் கணக்கீடு கீழே வழங்கப்பட்டுள்ளது. திட்ட அறிமுகம் என்னும் அளவிலேயே இக்கணக்கீடு செய்யப்பட்டுள்ளது. தங்களை நேரில் சந்தித்து தங்கள் ஆலோசனைகளைப் பெற்று மேலும் தளவாட உற்பத்தியாளர்களிடம் விலைப்புள்ளிகளைக் கோரி பெற்ற பின் முழுமையான திட்ட வரைவு உருவாக்கப்படும். 

கணக்கீடு:

குறிக்கோள் : கிராமத்தின் 1000 பெண்களை இணைத்து கூட்டுறவு அமைப்பொன்றை உருவாக்கி அவர்களுக்கு வங்கிக் கடன் மூலம் 1000 நாட்டு மாடுகள் வாங்கிக் கொடுத்து மேலும் வங்கிக் கடன் மூலம் நெய் உற்பத்தியும் இயற்கை எரிவாயு உற்பத்தியும் செய்து விற்பனை செய்வதன் மூலம் கிராமத்தின் பெண்களின் பொருளாதாரத்தை உயர்த்துதல், கிராமப் பொருளாதாரத்தை உயர்த்துதல் மற்றும் நாட்டுப் பசுமாடுகளைப் பாதுகாத்தல். 

தேவை : கிராமத்தில் வாடகைக்கு 5 ஏக்கர் நிலம். மாட்டுக் கொட்டகை அமைக்க. நெய் உற்பத்தி சாதனங்கள் அமைக்க. இயற்கை எரிவாயு தயாரிக்க. (1000 மாடுகளுக்கு பசுந்தீவனம் உற்பத்தி செய்ய 100 ஏக்கர் நிலம் தேவை. எனினும் அந்தக் கிராமத்தின் விவசாயிகளிடமிருந்து பசுந்தீவனம் உற்பத்தி செய்து தரச் சொல்லி விலைக்கு வாங்கிக் கொள்ளலாம். கிராம மக்கள் தொகை 4000ல் ஆயிரம் பெண்கள் என்றால் ஒவ்வொரு குடும்பத்திலும் ஒரு பெண் இடம் பெற்றிருப்பார். எனவே கிராமத்தின் எல்லா குடும்பங்களும் இதில் பங்கு பெற்றிருப்பார்கள். அந்தக் கிராமத்தில் இருப்பவர்களே பசுந்தீவனம் உற்பத்தி செய்து தருவதால் அதனை வாங்க அளிக்கப்படும் தொகையும் கிராமத்தின் பொருளாதாரத்தை உயர்த்தும்)

நாட்டு மாடு ஒன்றின் விலை ரூ. 1,00,000 - 2,50,000 இருக்கும். கணக்கீட்டுக்கு ரூ.1,00,000 என்றே கொள்வோம். 

1000 மாடுகளின் விலை = ரூ. 10 கோடி

அடிப்படைக் கட்டமைப்புகள் - ரூ. 2 கோடி

பெண்கள் கூட்டுறவு அமைப்பு, கால்நடை வளர்ப்பு, இயற்கை எரிவாயு ஆகியவை இணைந்திருப்பதால் 25 சதவீதம் வரை மானியம் கிடைக்கலாம். 

அவ்வாறெனில் மூலதனம் = ரூ. 9 கோடி

மாத உற்பத்தி - நெய் - 6000 கிலோ - ரூ. 60 லட்சம்

மாத உற்பத்தி : இயற்கை எரிவாயு- ரூ.10 லட்சம்

மொத்த மாத வருவாய் - ரூ. 70 லட்சம்

மாதாந்திர இயக்க செலவு - ரூ. 35 லட்சம்

மாதாந்திர லாபம் = ரூ. 35,00,000

மாதாந்திர இ எம் ஐ - ரூ. 8,00,000 

மாதாந்திர லாபம் - ரூ. 27,00,000

முதல் 3 ஆண்டுகள் லாபத்தை எடுத்துக் கொள்ளாமல் வங்கிக் கடனை பெண்கள் கூட்டுறவு அமைப்பு அடைத்தால் 3 ஆண்டுகளுக்குப் பின் அந்தக் கூட்டுறவு அமைப்புக்கு மாதம் ரூ. 35,00,000 லாபம் கிடைக்கும். 

மேலும் அந்தக் கூட்டுறவு அமைப்புக்கு 1000 மாடுகளும் அடிப்படைக் கட்டமைப்பு வசதிகளும் முற்றிலும் சொந்தமாகியிருக்கும். 

3 ஆண்டுகளில் 1000 மாடுகள் 2000 மாடுகளாகப் பெருகியிருக்கும்.  

அந்தக் கிராமத்தின் ஒவ்வொரு பெண்ணுக்கும் மாதம் ரூ.3500 லாபமாகக் கிடைக்கும். 

இந்த 1000 பெண்களில் விருப்பம் உள்ளவர்கள் மாடுகளைப் பராமரிக்கும் பணியிலும் நெய் உற்பத்திப் பணியிலும் இயற்கை எரிவாயு உற்பத்திப் பணியிலும் ஈடுபட்டு ஊதியம் பெற்றுக் கொள்ளலாம். 

*********

இந்த வாரத்தில் நேரில் சந்தித்து தங்கள் வழிகாட்டுதல்களையும் தங்கள் ஆலோசனைகளையும் பெறுகிறேன். 

நன்றி!

தங்கள் உண்மையுள்ள,

இடம் : மயிலாடுதுறை

நாள் : 19.10.2026

நகல்

1. மாவட்ட ஆட்சியர்

மாவட்ட ஆட்சியர் அலுவலகம்

மயிலாடுதுறை

2. வருவாய் கோட்டாட்சியர்

வருவாய் கோட்டாட்சியர் அலுவலகம்

சீர்காழி

3. தலைமை அலுவலகம்

*** **** வங்கி

*******

4. கோட்ட மேலாளர்

கோட்ட அலுவலகம்

***** வங்கி

*********

5. கோட்ட மேலாளர்

கோட்ட அலுவலகம்

*** *** ***

*****

ஒற்றுமைப்படுத்தும் அரசியல்

உலகெங்கும் அரசியல் என்பது அரசியல் அதிகாரம் பொதுமக்களிடம் வரி வசூல் செய்வது என சுருக்கமாகக் கூற முடியும். பொதுமக்கள் 99 சதவீதத்தினர் என்றால் அரசியல் அதிகாரம் கொண்டவர்கள் 1 சதவீதம் இருக்கிறார்கள். எல்லா விதமான அரசியல் அதிகாரத்திலும் எண்ணிக்கை இவ்விதமாகவே இருக்கிறது. இருபத்து ஓராம் நூற்றாண்டின் இன்றைய தினத்திலும் உலக மக்கள் தொகையில் 40 சதவீதத்தினர் மட்டுமே ஜனநாயக அரசியல் அதிகாரம் கொண்டவர்களாக இருக்கின்றனர். மீதி 60 சதவீதத்தினர் மன்னராட்சியிலும் சர்வாதிகார ஆட்சியிலும் ராணுவ ஆட்சியிலும் வாழ்கின்றனர். அரபு நாடுகளில் இன்னும் மன்னராட்சியே நடக்கிறது. அரபு நாடுகளில் இன்னும் ஜனநாயக ஆட்சி உருவாகவில்லை. சீனாவில் சர்வாதிகார ஆட்சி நடக்கிறது. ரஷ்யாவிலும் சர்வாதிகார ஆட்சியே நடக்கிறது. ஆஃப்கனில் ராணுவ் ஆட்சி நடக்கிறது.   

1 சதவீத எண்ணிக்கை கொண்ட குழு 99 சதவீத மக்களிடம் அதிகாரம் செலுத்த மிக அதிகமாகப் பயன்படுத்தும் உபாயம் - ‘’பிரித்து ஆளுதல்’’. மக்கள் குழுக்களுக்குள் ஐயங்கள் உருவாக்கி மக்கள் ஒன்றுபடாமல் பிரிப்பது. பிளவுபட்ட மக்கள் தங்களுக்குள் மோதிக் கொள்ளத் தொடங்குவர். தாங்களே மோதலை உருவாக்கி பின்னர் அந்த மோதல் மூலம் குழுக்களை வலுவிழக்கச் செய்து எல்லா குழுக்கள் மீதும் அதிகாரம் செலுத்துவதே ‘’பிரித்து ஆளும் அரசியல்’’. காலனி ஆதிக்கம் உலகெங்கும் ‘’பிரித்து ஆளும் அரசியலைக்’’ கொண்டு சென்றது. ஆபிரகாமிய மதங்களான யூதம், கிருஸ்தவம் , இஸ்லாம் ஆகியவற்றில் ‘’தான் - பிறர்’’ என்னும் வலுவான எதிரிடை உண்டு. கிருஸ்தவமும் இஸ்லாமும் மேற்காசியாவில் வலுப்பெற்ற போது யூதர்கள் உலகெங்கும் அடித்து விரட்டப்பட்டனர். ‘’காஃபிர்கள்’’ எனக் குறிப்பிடப்பட்டு அவர்கள் தேசம் இன்றளவும் குறி வைக்கப்படுகிறது. அவர்கள் மக்கள் இன்றளவும் குறிவைக்கப்படுகின்றனர். நமது தேசம் ஆபிரகாமிய மதத்தினரின் தாக்குதலை 800 ஆண்டுகளுக்கு மேலாக எதிர்கொள்கிறது. இன்றும் எதிர்கொள்கிறது. நம் பண்பாடு உருவாக்கியிருந்த கலையையும் கட்டிடங்களையும் கல்வியையும் அழிப்பதை ஆபிரகாமிய மதத்தினர் தங்கள் மதம் தங்களுக்கு அளித்திருக்கும் கடமை எனக் கருதுகின்றனர்.  

ஆபிரகாமிய மதத்தின் காரணமாக நம் நாடு பிரிக்கப்பட்டது. பிரிந்து போன ஆபிரகாமிய மதத்தின் தேசம் இன்று துண்டு துண்டாகி உடையும் நிலையில் உள்ளது. நம் தேசம் ஒன்றுபட்டு இருக்கிறது. 

மக்களை ஒற்றுமைப்படுத்தி ஒருங்கிணைப்பதன் மூலம் மகத்தான விஷயங்களை சாதிக்க முடியும். 

நீதான் அது

உபநிடதத்தில் ஒரு கதை உள்ளது. உத்தாலகர் என்ற முனிவர் தன் மகன் சுவேதகேது மறை பயின்றும் அகத்தில் அகங்காரம் கொண்டிருப்பதைக் கண்டு வருந்தி அவனிடம் 100 மாடுகள் கொண்ட மந்தையை அளித்து அவை 1000 ஆகப் பெருகியதும் வீடு திரும்புமாறு கூறினார். சுவேதகேது பசுக்களுடன் வாழ நேர்கையில் தன் அகத்தில் இருந்த அகங்காரம் முழுதும் நீங்கப் பெற்று தன் இருப்பை மட்டும் உணர்ந்தவனானான். உத்தாலகர் சுவேதகேது வசித்த வனத்துக்கு வந்து ‘’மகனே ! உன் மந்தை 1000 பசுக்களாகப் பெருகி விட்டது’’ என்று கூறினார். சுவேதகேது தன் மாட்டு மந்தையை எண்ணிப் பார்த்தான். 1001 பசுக்கள் இருந்தன. மீண்டும் மீண்டும் எண்ணினான். பசுக்களின் எண்ணிக்கையில் ஒன்று கூடுதலாகவே இருந்தது. தந்தையிடம் , ‘’தந்தையே! எத்தனை முறை எண்ணினாலும் ஒரு பசு கூடுதலாகவே உள்ளது’’ என்றான். உத்தாலகர் ‘’நீதான் அது (தத்வமஸி) ‘’ என்றார். அகங்காரம் முற்றிலும் அகன்ற சுவேதகேது தன்னை ஒரு பசுவாக உணரத் தொடங்கியதால் ஆயிரம் பசுக்களுடன் தன்னையும் ஒரு பசுவாக எண்ணி 1001 எனக் கூறினான்.  

பசு என்னும் உயிர் இனியது. அன்பும் கருணையும் பிரியமும் கொண்டது. மானுடர்க்கு அன்னையாகவும் குழந்தையாகவும் ஒரே சமயம் இருப்பது. 

’’1000 பெண்கள் - 1000 பசுக்கள்’’ தொடர்பான சிந்தனைகள் மனதில் நிறைந்திருந்ததால் இன்று ஊரிலிருந்து 25 கிலோ மீட்டர் தொலைவில் உள்ள 1000 பசுக்கள் கொண்ட கோசாலையில் உள்ள பசுக்களுடன் சில மணி நேரங்கள் இருக்க விரும்பி அங்கு சென்றிருந்தேன். அந்த கோசாலையில் 1000க்கும் மேற்பட்ட பசுக்கள் இருக்கின்றன. உம்பளாச்சேரி, காங்கேயம், ஓங்கோல், காங்கிரேஜ், கிர், பிருந்தாவனம், சாஹிவால் ஆகிய மாட்டினங்கள் இருக்கின்றன.

சிந்து சமவெளி நாகரிகத்தில் ’’பசுபதி முத்திரை’’ உள்ளது. அதில் இடம் பெற்றிருக்கும் மாரு ‘’காங்கரேஜ்’’ மாடு ஆகும். கிருஷ்ணரின் ஆட்சியில் யாதவர்கள் மேய்த்த மாடுகள் ‘’கிர்’’ மாடுகள் ஆகும். குஜராத்தின் கிர்னார் மலைப்பகுதியில் வாழ்ந்த மாடுகள் ஆதலால் அவை ‘’கிர்’’ மாடுகள் எனப்படுகின்றன. கோகுலத்தில் கிருஷ்ணன் மேய்த்த மாடுகள் ‘’பிருந்தாவனம்’’ என்னும் மாடுகள் ஆகும். பரம்பொருள் மாடு மேய்க்கும் சிறுவனாக அவதரித்து மாடுகளுடன் இருக்க விரும்பியிருக்கிறது என்பது மாடுகளின் அன்பு பரம்பொருளையே ஈர்க்க வல்லது என்பதை உணர்த்துகின்றது. வைணவ மரபு எல்லா உயிர்களையும் பசுக்கள் என்கிறது ; கிருஷ்ணன் எல்லா உயிர்களையும் இடையன் மாடுகளைப் பேணுவது போல பேணுகிறான் என்கிறது வைணவம். 

நாட்டு மாடுகள் அளவில் பெரியவை. அவற்றின் தோல்பரப்பில் பலவிதமான நுண்ணுயிர்கள் வாழும். எனவே நாட்டு மாடுகள் மனிதர்களின் ஸ்பரிசத்தை விரும்பும். நாம் மாட்டிடம் சென்று அதன் உடலைத் தடவிக் கொடுத்தால் உடல் முழுதும் தடவுமாறு கேட்கும். மாடுகளுடன் பழகியவர்களுக்கு அது தெரியும். இன்று பல மாடுகளின் உடலைத் தடவிக் கொடுத்தேன். மிக நெகிழ்ச்சியான தருணமாக இருந்தது. 

பிராணிகள் அன்பு காட்டுபவை ; அன்புக்கு வசப்படுபவை. மாடு, நாய், காகம், குருவி, குதிரை, யானை, ஆடு என அனைத்துமே மானிடர்க்கு அன்பு காட்டுபவை. 

*****

மாடுகள் வாழிடத்தை எவ்விதம் அமைப்பது என்பது குறித்து சில மனச்சித்திரங்கள் உருவாயின. 

(1) கான்கிரீட் என்பது இரண்டாம் உலகப் போர் நிகழ்ந்த போது பாலங்கள் கட்ட  உருவான தொழில்நுட்பம். இன்று உலகம் முழுதும் கட்டுமானங்கள் அனைத்திலும் கான்கிரீட் வியாபித்து விட்டது. 

(2) உருவாக்க இருக்கும் மாடுகள் வாழிடம் தென்னங்கீற்றுகளால் ஆன கொட்டகையாகவே இருக்கும். அவ்விதமாகவே 3000 ஆண்டுகளாக இருந்து வந்துள்ளது. 

(3) தீ அபாயத்தைத் தவிர்க்க எப்போதும் தண்ணீர் மேல்நிலை தொட்டியில் இருக்கும் விதமாக ஏற்பாடு செய்யலாம். இரவும் பகலும் பணியாளர்கள் காவலில் இருக்கும் விதமாக ஏற்பாடு செய்யலாம். 

(4) மாடுகள் வாழிடத்தின் தரையை செங்கல்லால் அமைக்க உள்ளேன். சாணமும் கோநீரும் அமிலத்தன்மை மிக்கவை என்பதால் தரையை அவை அரிக்கும். தேவையெனில் 3 ஆண்டுக்கு ஒருமுறை தரையின் செங்கற்களை உடைத்து எடுத்து விட்டு புதிதாக செங்கல் பாவிக் கொள்ளலாம். 

(5) கீற்று, மூங்கில், செங்கல், களிமண் கொண்டே மாடுகளின் வாழிடம் உருவாக்கப்படும். 

(6) நெய் உற்பத்தி, இயற்கை எரிவாயு உற்பத்தி ஆகியவற்றுக்கு கான்கிரீட் பயன்படுத்திக் கொள்ளலாம். கான்கிரீட் இல்லாமல் செங்கல் கட்டு வேலையாக அமைத்தால் சிறப்பு. 

(7) சொந்தமாக இடம் வாங்கத் தேவையில்லை என எண்ணுகிறேன். இடம் வாடகைக்கு எடுத்துக் கொண்டால் போதுமானது. 

(8) 4000 பேர் கொண்ட அந்த கிராமத்தில் தற்போது இருக்கும் ஆடு மாடுகள் அனைத்துக்கும் ஒரு பட்டி உருவாக்கி அதில் அவை அனைத்துக்கும் கூட்டுறவு அமைப்பு சார்பாகவே தீவனம் விலையில்லாமல் வழங்கி விடலாம். அவ்வாறு செய்வதன் மூலம் அந்தக் கிராம விவசாயிகள் பசுந்தீவனம் உற்பத்தி செய்வது சிரமமில்லாமல் நிகழும். ஆடு மாடுகள் ஊரெங்கும் மேய்ந்து கொண்டிருந்தால் பசுந்தீவனம் உற்பத்தி செய்பவர்கள் தங்கள் வயலைச் சுற்றி வேலி அமைக்க பெரும் செலவு செய்ய நேரும். இவ்விதம் ஒரு பட்டியில் அடைத்தால் அந்தக் கிராமத்தின் தானிய உற்பத்தி பல மடங்கு பெருகும். பருப்பு வகைகளை வயலின் வரப்புகளில் பயிர் செய்ய முடியும். 

(9) 1000 பேரை நாம் இணைத்தால் பல ஆக்கபூர்வமான விஷயங்களை மிக எளிதில் செய்து விட முடியும். ஒற்றுமையே வலிமை என்பது ஆகப் பெரிய உண்மை. 

(10) பெரும் திட்டம். பெரும் செல்வம் தேவைப்படுவது. பெரும் முயற்சி தேவைப்படுவது. இவை அனைத்தையும் உணர்கிறேன். பராமரிக்க விரும்பும் 1000 பசுக்களிடம் இந்த விஷயத்தை மானசீகமாக ஒப்படைத்து விடுவது இந்த விஷயம் நிகழ ஆகச் சிறந்த வழி என்று உணர்கிறேன்.