செய்தி நீக்கம்

அலைபேசியில்
அனுப்பிய
குறுஞ்செய்திகளை
துழாவிக் கொண்டிருந்தேன்

புறப்பட்ட செய்தி
பத்திரமாக வீடு வந்த சேதி
வீட்டு முகவரி
வங்கிக் கணக்கு எண்
சில அலைபேசி எண்கள்
நன்றி
வாழ்த்து

சிலருக்கு அளித்த அறிக்கை
சிலருக்கு சொன்ன ஆறுதல்
சிலருக்கு செய்த உதவி

உற்சாகம் கொண்டு அனுப்பிய செய்திகளை
இப்போதும் பிரித்தறிய முடிகிறது

பெரும்பாலானதை நீக்கினேன்
அச்செய்திகளும்
அவை அனுப்பப்பட்ட தருணங்களும்
இயல்பாகக்
கடந்து போயிருந்தன

கடக்க முடியாத உணர்வுகளும்
குறுஞ்செய்திகளாயிருந்தன
எனினும்
அச்சொற்கள் மாமூலானவை
அவற்றையும் நீக்கினேன்

ஒரு பெரிய வீட்டில்
ஒற்றை ஆளாய் இருப்பது போல்
மிகை இடைவெளியால்
நிரம்பியிருந்தது
செய்திப் பெட்டி

அடர்த்தி குறைந்த நினைவுகள் போல
அடர்த்தி குறைந்தது மனம்

எதிர் வீட்டுச் சுவரில்
அமர்ந்த காகம்
கா கா என்றது
என்ன செய்தியோ