கிட்டத்தட்ட கடவுள்

அம்மாவின் 
சொல்படிதான்
கடவுள்
எனக்கு
அறிமுகம் ஆனார்
அல்லது ஆனது

ஒவ்வொன்றும்
ஆச்சர்யமாயிருந்த 
அப்பருவத்தில்
கடவுள் மீதும்
ஆச்சர்யம்

அம்மாவின் கடவுள்கள்
குழந்தைகள்
பெண்கள்
ஆண்கள்
மிருக மனித இரு உடலாளர்கள்
வடிவில்

உலகெங்கும்
பெரும்பாலும்
கடவுள்கள் இவ்வண்ணமே உள்ளனர்
விதிவிலக்கு
உண்டு

கடவுள்களின் உலகம்
எனக்கு
சுவாரசியமாக இருந்தது
இங்கு
இருப்பதை விட
அங்கு
இருப்பது
நலமோ என ஐயுற்றேன்

கடவுள்கள் மோதலை விரும்புவதில்லை
சும்மா இருக்கவே விரும்புகிறார்கள்
வேண்டா வெறுப்புடனே
நல்லவர்களைக் காக்கிறார்கள்
மனிதர்களைப் போல் எல்லாவற்றிலும் தலையிடுவதில்லை

மனிதராய் இருப்பதை விட
வசதி
கடவுளாய்
கிட்டத்தட்ட
இருப்பது