பாலர் ஆடும் மைதானம்

எல்லா மைதானங்கள் போலவே
பெரும்பாலும் இருக்கின்றன
பாலர் ஆடும் மைதானங்கள்
ஒருத்தனிடம் ஸ்டம்புகள்
இன்னொருத்தனும் ஸ்டம்புகள் வைத்துள்ளான்
பந்து வைத்திருப்பவன்
ஆட்டத்துள் ஆட்டம் என
தனி ஆட்டம் ஆடுகிறான்
பொறுமை இழந்த ஒருவன்
திடீரென
குறுக்கும் நெடுக்கும்
சைக்கிள் ஓட்டுகிறான்
அருகில் உள்ள வீட்டில்
தண்ணீர் குடிக்கச் சென்றவன் பின்னால்
மூன்று பேர் சென்று விடுகின்றனர்
வீட்டுக்கு கிளம்புகிறான் ஒருத்தன்
ஆட்ட நேரம் விட
ஆட்டம் துவங்க ஆகும் நேரம்
அதிகமாக இருக்கிறது

மற்றபடி

எல்லா மைதானங்கள் போலவே
பெரும்பாலும் இருக்கின்றன
பாலர் ஆடும் மைதானங்கள்