பிழை

நீங்கள்
அதிகாலையில் எழுந்து
விடிவெள்ளி பார்த்து
அதன் அருகிருக்கும்
மின்னும்
நட்சத்திரங்கள் பார்த்து
சாணம் மெழுகப்பட்ட தரையின்
மாவுக் கோலங்களைத் தாண்டி
குழையும்
வாலாட்டும் குட்டி நாய்களின்
எல்லைக்குள் நுழைந்து
எல்லை தாண்டி
காகக் கரைதல்களைக் கேட்டவாறு
ஒரு மைல் நடந்து
ஒரு செய்தித்தாளை வாங்கி
கையில் எடுத்துக் கொண்டு
திரும்புவதில்
ஏதோ ஒன்று
பிழையாக
இருக்கிறது