ஒரு சிறு சிற்பம் போல
அத்தனை வசீகரமாக
அவ்வளவு ஆர்வமூட்டுவதாக
ஏந்திக் கொண்டிருப்பது தத்தளிக்கச் செய்வதாக
உணர்ந்திருக்கிறேன்
உன்னைப் பற்றி
உன்னுடன் இருக்கும் பொழுதுகளில்
பனி நாட்களின்
ஆற்று நீர் போல
குளிர்ந்தும் சுட்டும்
கோடையின் ஆறென
சுட்டும் குளிர்ந்தும்
இருந்திருக்கின்றன
உனது
தற்செயலான தீண்டல்கள்
சிட்டுக்குருவியின் துள்ளல்களை
புறாக்களின் சிறகடிப்புகளைக்
கண்டிருக்கிறேன்
உற்சாகமாய்
நீ
சித்தரிக்கும் தருணங்களில்
மென் காற்றாக
ஒரு விருட்சத்தின் நிழலாக
விடாய் தீர்க்கும்
ஒரு டம்ளர்
பானை நீராக
நீ
அனுபவமாகிறாய்
என் அகப் பாலையில்
பூத்து நிற்கும்
தாலப்பனையாகவும்
