மழை பெய்த ஊர்

ஊரே கழுவப்பட்டிருக்கிறது மழைநீரால்
ஈரத்தரையில் காத்திருக்கின்றனர்
குளித்துக் கிளம்பியிருக்கும் குழந்தைகள்
எப்போதும்
ஒரு குறிப்பிட்ட நேரத்தில்
சாலையில் கடந்து செல்லும்
ஓர் இளம்பெண்
முகத்தில்
சூடியிருக்கிறாள்
கூடுதல் புன்னகையை
முருங்கை இலைகள்
பழுத்து
ஒட்டிக் கொண்டிருக்கின்றன
கார் கண்ணாடி மேல்
மூட்டமான மேகம்
நிலத்தில்
வரைந்து கொண்டிருக்கிறது
புதிதான சில காட்சிகளை
அல்லது
சில காட்சி திருத்தங்களை
நூதனமாய்த் தொங்குகின்றன
ஈரமான சட்டைகள்