மாற்று

ஒரு வசந்த கால மாலையில்
வழியனுப்ப வந்தவன்
புறநகர் ரயில் நிலைய
வாகன நிறுத்தத்தில்
தன் மங்கையிடம்
அவள் எதிர்பாராத கணத்தில்
அவளுக்காக வாங்கிய
சந்தன நிற ஸ்வெட்டரை
அவளிடம்
தருகிறான்
அந்த கணத்தின் எதிர்பாராமையால்
திக்குமுக்காடிய
அவள்
தன் துப்பட்டாவை
சட்டென
அவன் கழுத்தில்
மாலையிடுகிறாள்
ஸ்வெட்டரை அணிந்து கொண்டு
டூ-வீலரின் ரியர் வியூ ஆடியில்
அவன் தோளில் கை போட்டு
பிம்பம் பார்க்கிறாள்
ஆடி
ஸ்வெட்டர் அணிந்த அவளையும்
துப்பட்டா அணிந்த அவனையும்
காட்டுகிறது
அவர்களுக்கு அப்பால்
ரயில் நிலைய
வேப்பமரத்திலிருந்து
வேப்பம்பூக்கள்
காற்றில் மிதந்து
பூமிக்கு வந்து கொண்டிருந்தன