அணி

அவள் மிகவும் அழகானவள்
உலகின் மிக அழகிய பெண்களில் ஒருத்தி

அவள் அணிகள்
ஒவ்வொரு கையிலும் ஒவ்வொரு வளையல்
ஒரே ஒரு வளையல்
மிகச் சிறிதாய்
மிக மிகச் சிறிதாய்
ஒரு ஜோடி தோடு
செவிமடலுக்குக் கீழே
பட்டிழை இடைவெளியில் வளைந்து
உடன்
மேல் செல்லும் தோடு
மெலிந்த
மிக மெல்லிய
ஒற்றைக் கழுத்துச் சங்கிலி

எப்போதும்
எந்த
ரசாயனமும்
பூசிக்  கொள்ளாத முகம்
இருக்கிறதா
இல்லையா
என அறுதியிட முடியாத
சின்னஞ்சிறு
ஸ்டிக்கர் பொட்டு

ஒருநாள் ஒப்புதல்  வாக்குமூலம் தந்தாள்
’எனக்கு அணி செய்து கொள்ளத் தெரியாது
சிறு  வயது முதலே பழக்கமில்லை’

தனது
எளிய
தூய
அகத்தால்
கணமும்
தான்
அணிசெய்யப்படுவதை
அவள்
அறிந்திருக்கிறாளா
என்பது
தெரியவில்லை