தீர்த்தனின் அன்னை சார்டட் அக்கவுண்டண்ட். தீர்த்தனின் தந்தை கட்டிடப் பொறியாளர். ஆகவே தீர்த்தனின் பெற்றோர் எண்களுடன் அணுக்கமும் பயிற்சியும் தேர்ச்சியும் திறனும் கொண்டவர்கள். தீர்த்தனின் தந்தை இலக்கிய வாசகர். தமிழ் ஆங்கிலம் ஆகிய மொழிகளில் கடந்த ஐந்து ஆண்டுகளாக குறிப்பிடத்தகுந்த அளவில் வாசித்து வருகிறார். கணவனின் ஆர்வத்தால் தீர்த்தனின் அன்னையும் இலக்கிய வாசிப்பை மேற்கொள்கிறார்.
தீர்த்தனுக்கு இயல்பாகவே கணிதமும் மொழியும் வசப்படும் வாய்ப்புகள் மிக அதிகம்.
இன்று அவர்களுடன் தொலைபேசியில் உரையாடிக் கொண்டிருந்த போது அவர்களிடம் ஒரு விஷயம் சொன்னேன். தீர்த்தனுக்கு மொழிப்பாடமாக சமஸ்கிருதம் போதிக்க வேண்டும் என்று கேட்டுக் கொண்டேன். சென்னையில் வசிப்பதால் அங்கே சமஸ்கிருதம் பயில வாய்ப்புகள் அதிகம். மொழி அறிமுகம் குழந்தைகளுக்கு ஐந்து வயதுக்குள் நிகழும் எனில் அந்நிகழ்வு மகத்தானது.
சமஸ்கிருதம், தமிழ், ஆங்கிலம், ஏதேனும் ஒரு ஐரோப்பிய அல்லது ஆசிய மொழி என நான்கு மொழிகளில் தீர்த்தனுக்கு அறிமுகமும் பரிச்சயமும் செய்து வைக்க வேண்டும் என்று பேசிக் கொண்டோம்.
தங்கள் வீட்டுக் குழந்தை கல்வி கேள்விகளில் சிறந்து விளங்க வேண்டும் என்பதே நம் நாட்டின் குடும்பங்களின் விருப்பமாக அனாதி காலமாக இருக்கிறது
