தமிழகத்தில் மிக அதிகமாக மக்கள் நேசிக்கும் வணங்கும் தெய்வம் எது ? பிள்ளையார் தான் தமிழக மக்களால் மிக அதிகமாக நேசிக்கப்படும் தெய்வம். குடும்ப உறவுகளை மிக நெருக்கமாக உணரும் தமிழ்க் குடும்பங்கள் சிவக் குடும்பத்தின் மூத்த பிள்ளையான கணபதி மீது பிரியம் கொள்வது இயல்பான ஒன்றே. ஆனையை விரும்பாதவர்கள் இருக்க முடியாது. வலிமை ஆற்றல் பராக்கிரமத்தின் சின்னம் ஆனை. ஆனையின் இயல்பும் குழந்தையின் மனமும் கொண்டவர் கணபதி. சைவம், வைணவம், சாக்தம், கௌமாரம் என எந்த வழிபாடாயினும் அதில் முதல் வணக்கம் கணபதிக்கே.
மானுடன் குழந்தையின் முன் மனம் இளகியிருக்கிறான். ஆனையிடமிருந்து அதன் அம்சத்தின் ஒரு துளியையேனும் பெற விரும்புகிறான்.
சதுர்த்தி கணபதிக்கு உரிய தினம். மூஷித வாகனன் எளிய அருகம்புல் சமர்ப்பணத்தைக் கூட மிகப் பிரியமாக ஏற்றுக் கொள்பவன்.
