பள்ளிகள் முடிந்து கோடை விடுமுறை துவங்கி விட்டது. சிறுவர் சிறுமிகளின் நடமாட்டத்தைப் பகல் பொழுதில் சற்று அதிகமாகக் காண முடிகிறது. வீதிகளில். கோவில்களில். கடைத்தெருவில். தாத்தா பாட்டி வீடுகளுக்கு வெளியூரிலிருந்து வந்திருக்கின்றனர். சிலர் தாத்தா பாட்டி வீடுகளுக்குச் சென்றிருக்கின்றனர். பள்ளி செல்ல அவசியமில்லை என்னும் மகிழ்ச்சி எல்லா குழந்தைகளின் முகத்திலும்.
வீதியில் இரு சக்கர வாகனத்தில் செல்லும் போது இரண்டு சிறுவர்கள் என்னை நிறுத்தினார்கள். இருவருக்கும் 8 வயது இருக்கும். ஒரு வீட்டின் வாசலில் ஒரு பூமரம் பூத்துக் குலுங்கிக் கொட்டியிருந்தது. இந்த இருவரும் போவோர் வருவோரிடம் தாங்கள் பூமாலை வணிகம் செய்வதாகவும் பூமாலைகள் வேண்டுமெனில் தங்களிடம் சொல்லவும் என்று கூறிக் கொண்டிருக்கிறார்கள். இது அவர்களுக்கு ஒரு விளையாட்டு.
அந்த சிறுவர்களைச் சந்தித்தது மகிழ்ச்சியாக இருந்தது.
